Wakulima wa miwa wapinga ukodishaji viwanda vya sukari

Wakulima wa miwa katika kaunti ya Nandi wamepinga uamuzi wa serikali wa kukodisha viwanda vya sukari.

Wakulima hao kwa ushirikiano na Gavana wa Nandi, Stephen Sang, sasa wanamtaka waziri wa kilimo  Peter Munya,  abatilishe uamuzi huo na kuruhusu ushiriki wa umma.

Gavana Sang alisema kwamba waziri huyo alipaswa kufanya maamuzi kulingana na ripoti ya jopo  lililobuniwa  2018,  kujadili maswala yanayoathiri sekta ya  sukari nchini,  na ambalo lilipendekeza ubinafsishaji wa viwanda na wala  sio kukodishwa viwanda.

“ Tulikutana na jopokazi  na kujadiliana na wadau pamoja na wakulima kisha tukakubaliana viwanda hivyo vibinafsishwe,” alisema Sang

Katibu wa chama cha  wakulima wa  miwa katika kaunti ya  Nandi,  David Sum, alikosoa hatua ya  waziri wa kilimo ya kukodisha kampuni za sukari bila hata kutangaza  hadharani sheria na masharti ya makubaliano ya kukodishwa kwa viwanda hivyo.

“ kama wakulima wa miwa, tulienda mahakamani kuzuia hatua ya waziri wa kilimo  na mahakama ilisitisha hatua hiyo hadi kesi iliyowasilishwa itakapoamuliwa,” alisema Sum.

Kaunti hiyo ina zaidi ya wakulima elfu 20 ambao ni sehemu ya   wakulima wa  miwa wa kanda ya   Nyando.

Viwanda  vinavyotarajiwa kukodishwa ni  Chemelil, Miwani, Sony na Nzoia,  kwa kipindi cha miaka 25.