Tag: William Ruto

Categories
Habari

Ruto aahidi kumsaidia “Cucu wa Gikandu”

Naibu Rais Dkt. William Ruto amesema atapiga jeki biashara ya kilimo ya mama Margaret Njambi mwenye umri wa miaka  64.

Njambi almaarufu  “Cucu wa Gikandu” alijulikana baada ya video yake kutamba mitandaoni akipinga ripoti ya BBI mapema mwezi huu.

Ufahamu wake wa lugha ya Kingereza uliwafurahisha wakenya alipokuwa akimhimiza mbunge wa Kiharu Ndindi Nyoro amkutanishe na naibu Rais William Ruto.

Ombi lake lilitimia baada ya kukutana ana kwa ana na naibu wa rais mtaani Karen siku ya Jumatano.

“Nilizungumza na Margaret Njambi ambaye ni mkulima baada ya video yake kutamba katika mitandao ya kijamii wakati wa mkutano kuhusu maendeleo katika eneo bunge la Kiharu ambapo alielezea angependa kukutana na naibu Rais,” alisema Ruto.

Baadae Naibu Rais aliomboleza na familia ya marehemu mbunge John Oroo Oyioka nyumbani kwake Kitengela kaunti ya Kajiado.

Naibu Rais pia aliomboleza na familia ya marehemu mbunge wa Juja Francis Munyua Waititu nyumbani kwake Juja kaunti ya Kiambu.

“Tunaomba Mwenyezi Mungu apatie familia hizo nguvu na pia azifariji wakati huu ngumu wa majonzi,” alisema naibu rais.

Categories
Habari

Ruto aonya dhidi ya kutumia taasisi za serikali kisiasa

Naibu rais Dkt William Ruto amezitahadharisha taasisi za serikali dhidi ya kujihusisha katika siasa kabla ya uchaguzi mkuu wa mwaka 2022.

Alitoa mfano wa kukamatwa kwa wanasiasa katika kaunti ya Kisii wakati wa mazishi ya aliyekuwa wakati mmoja waziri Simeon Nyachae.

Alisema wanasiasa wanapasa kuruhusiwa kufahamisha umma ajenda zao bila kusumbuliwa na yeyote.

“Tunapaswa kukoma kuwatumia polisi kisiasa lakini wanasiasa wanapaswa kuuza sera zao. Siasa za vitisho na kutiwa uwoga zimepitwa na wakati,” alisema naibu rais.

Akihutubia wananchi baada ya ufunguzi rasmi wa Parokia ya Joseph The Worker,Kituro,huko Kabarnet,kaunti ya Baringo, Ruto aliwatahadharisha wanasiasa dhidi ya kubuni miungano ya kisiasa kwa misingi ya kikabila,lakini badala yake kuwaeleza wananchi sera zao.

“Wanaotafuta nyadhifa za uongozi wanapaswa kukomesha ukabila. Wanahitajika kuhamasisha umma kuhusu manifesto zao,”alifoka naibu rais.

Alisema viongozi sharti wavumiliane na kuhimiza amani miongoni mwa jamii mbali mbali.

Alitaja kisa ambapo naibu Gavana wa Kisii Joash Maangi na mbunge Sylvanus Osoro miongoni mwa viongozi wengine walitiwa nguvuni,  Ruto alisema hulka ya ukandamizaji imepitwa na wakati katika karne ya 21.

Tangu lini imekuwa ni makosa kuwa rafiki wa naibu Rais ambaye ni rafiki wa Rais aliye muunga mkono kwa uchaguzi nne?” aliuliza naibu wa rais.

Categories
Habari

William Ruto na Gideon Moi wahubiri amani katika mazishi ya Hosea Kiplagat

Hosea Kiplagat ambaye alikuwa msaidizi wa marehemu Rais mstaafu Daniel Arap Moi alizikwa Ijumaa katika mazishi yaliyowaleta pamoja Naibu Rais William na Seneta wa Baringo Gideon Moi.

Wanasiasa hao walitoa maoni tofauti walipowahutubia waombolezaji katika sehemu ya Cheplambus iliyoko kaunti ya Baringo.

Naibu wa Rais aliwataka wakenya wajiepushe na viongozi wanaowadunisha viongozi wenzao akisema wakati umewadia kwa mtu yeyote bila kujali misingi ya familia yake kuiongoza nchi hii.

Aliongeza kusema kwamba wakenya wanapasa kuwachagua viongozi kulingana na rekodi yao ya maendeleo na wala sio makabila.

Wakati uo huo, Dkt Ruto aliwahimiza viongozi kuvumilia maoni tofauti kutoka kwa wenzao kwa minajili ya amani na maendeleo ya nchi hii.

Dkt. Ruto alimuenzi marehemu Kiplagat kuwa mtu mnyenyekevu na kuiongozi bora.

Alisema marehemu Kiplagat alikuwa mfanyabiashara mkubwa, mshauri na nguzo muhimu katika siasa za nchi hii.

Naye Seneta wa Baringo Gideon Moi aliyeongea kwa ligha ya Kikalenjin alimshutumu naibu wa Rais kwa kuwapa wakenya ahadi za uongo.

Alidai kwamba miradi ya ujenzi wa barabara iliyoaahidiwa na Dkt. Ruto katika kaunti ya Baringo haijajengwa hadi leo na akawatahadharisha wakazi wa sehemu hiyo dhidi ya kuhadaiwa na siasa za maneno matupu.

Hatahivyo aliwataka wakazi wa Baringo wasijali tofauti kati yake na naibu wa rais akisema huenda wakaungana siku za usoni.

Seneta wa kaunti ya Narok Ledama Ole Kina aliwahiza viongozi hao wawili waungane na kuendeleza ajenda ya eneo la Rift Valley akisema tofauti kati yao si nzuri kwa maendeleo ya eneo hilo.

Viongozi wengine waliohudhuria mazishi hayo ni pamoja na Gavana wa Nakuru Lee Kinyanjui, Gavana wa Turkana Josphat Nanok, Mbunge wa Mathira Rigathi Gachagua miongoni mwa wengine.

Categories
Habari

Ruto akanusha madai kuwa anashindana na Rais Kenyatta

Naibu Rais Dkt. William Ruto amekariri kuwa hashindani na Rais Uhuru Kenyatta na kukanusha madai kuwa anahujumu ajenda ya serikali.

Akiongea Jumamosi wakati wa hafla ya kuchangisha pesa za kanisa katika sehemu ya Ngaremara, kaunti ya Isiolo, naibu Rais alisema anamheshimu Rais Kenyatta na hajawahi kukosa kutekeleza majukumu anayopatiwa jinsi ilivyoratibishwa kwenye katiba.

Dkt. Ruto amesema Rais Kenyatta ndiye anayesimamia kikamilifu serikali ya Jubilee na kama naibu wake hashindani kwa vyovyote vile na kiongozi wa nchi.

” Ninamheshimu Rais sana. Yeye ndiye kiongozi. Yeye ndiye hufanya maamuzi yote ya serikali. Sijawai zungumza kinyune na Rais kwa sababu ya jinsi ninavyomheshimu,” alisema Ruto.

Ruto alisema amekuwa mwaminifu hata wakati ambapo baadhi ya majukumu yake kuondolewa na kupewa mawaziri.

Wakati huo huo naibu huyo wa  Rais amewashtumu viongozi wa upinzani akisema ndio wanaohujumu serikali ya Jubilee.

Amewataka washirika wa salamu za maridhiano serikalini kuunga mkono kikamilifu ajenda ya serikali au wajiondoe badala ya kuendelea kukosoa serikali wanayoshirikiana nayo.

Ruto aidha amesisitiza umuhimu wa ajenda nne kuu za mandeleo za serikali na kuelezea kuhusu mafanikio ya maendeleo yaliyoafikiwa katika kaunti ya Isiolo.

Baadhi ya maendeleo aliyotaja katika kaunti ya Isiolo ni pamoja na awamu ya mwisho ya kuunganisha umeme, ujenzi wa barabara na mradi wa maji taka ambao tayari umekamilika mjini Isiolo.

Categories
Habari

BBI yapata pigo la kwanza Baringo

Bunge la Kaunti ya Baringo limekuwa la kwanza kukataa mswada wa marekebisho ya katiba wa mwaka 2020.

Mswada huo uliopendekezwa kupitia mpango wa maridhiano ya kitaifa, BBI, umezua mjadala mkali uliokumbwa na ghasia katika bunge la kaunti hiyo.

Ghasia hizo zimeanza mara tu baada ya Mwenyekiti wa kamati ya masuala ya sheria n haki Charles Kosgei kuwasilisha mswada huo, hatua ambayo imezua mabishano makali kati ya wanaounga mkono na wanaopinga mswada huo.

Wanachama wa bunge hilo wanaopinga mswada huo walitaka ujadiliwe na kupigiwa kura mara moja, huku wale wanaouunga mkono wakitaka mjadala uahirishwe ili kutoa fursa ya ushirikishi wa umma.

Spika wa Bunge la kaunti hiyo alikuwa na wakati mgumu kurejesha utulivu huku polisi wa kukabiliana na ghasia walilazimika kutumia vitoa machozi katika  kutuliza hali bungeni humo.

Baadaye mjadala ulianza na hatimaye wawakilishi wadi wakapiga kura ambapo angalau 30 kati yao wamepiga la na kumlazimu spika kutangaza matokeo hayo hasi.

Uhasama wa kisiasa kati ya Naibu Rais William Ruto na Seneta wa kaunti hiyo Gideon Moi ulijitokeza wazi wazi, huku ghasia zilizokumba bunge hilo zikiwa baina ya wawakilishi wadi wanaomuunga mkono Moi dhidi ya wale wa Ruto.

Kwa sasa mswada huo umepitishwa na mabunge matatu katika Kaunti za Siaya, Kisumu na Homabay na unahitaji kupitishwa na angalau mabunge 21 zaidi ndipo uwasilishwe kwenye Bunge la Kitaifa.

Categories
Habari

Serikali za kaunti zatengewa fedha zaidi

Serikali za kaunti zitatengewa shilingi bilioni 53.5 zaidi katika kipindi cha matumizi ya pesa cha mwaka wa 2021/2022

Hatua hiyo iliafikiwa kufuatia makubaliano ya mkutano wa baraza la kushughulikia maswala ya bajeti na uchumi la serikali ya kitaifa na serikali za kaunti ulioongozwa na naibu wa rais William Ruto.

Hatua hiyo mpya ina maanisha kuwa serikali za kaunti zitapata jumla ya shilingi bilioni 409.88 katika kipindi hicho.

Ruto aliuambia mkutano huo kuwa hatua hiyo iliafikiwa kwa kufanyia marekebisho mgao wa kaunti wa mwaka wa 2020/21 wa shilingi bilioni 316.5 kwa shilingi bilioni 36.1 na kubadilisha ruzuku zinazotolewa kwa masharti na kuzifanya kuwa ruzuku zinazotolewa bila masharti.

Mkutano huo ulihudhuriwa na waziri wa fedha Ukur Yattani, magavana, mwenyekiti wa tume ya ugavi wa mapato Dkt.Jane Kiringai, msimamizi wa bajeti Dkt. Margaret Nyakang’o, makatibu wa wizara na wanachama wa kamati kuu katika kaunti mbalimbali.

Categories
Habari

Ruto akemea baadhi ya viongozi kwa kuendeleza siasa za kikabila

Naibu Rais William Ruto amewakosoa baadhi ya wanasiasa dhidi ya kumdunisha Rais Uhuru Kenyatta hadi kiwango cha kiongozi wa eneo la Mlima Kenya.

Amesema inasikitisha kuona kwamba viongozi hao wanampa Rais Kenyatta sifa ya kiongozi wa kikabila.

Ruto amesema Rais alichaguliwa na Wakenya kutoka pande zote za nchi na anastahili kuwa alama ya umoja wa kitaifa.

Akizungumza kwenye hafla ya mazishi ya mamaye Mbunge wa Thika Mjini Patrick Wainaina katika eneo la Mang’u, Kaunti ya Kiambu, Ruto amesema hajajitaja kama kiongozi wa eneo la Bonde la Ufa bali mtumishi wa Wakenya wote.

“Mkisema Rais Kenyatta ni kiongozi wa eneo hili [la Kati], basi sisi kiongozi wetu ni nani?” akauliza.

Amewahimiza viongozi kuepukana na siasa za ukabila na wawahudumie wananchi bila kuzigatia swala la kikabila.

Naibu Rais pia amewataka viongozi kushirikiana na kufanya kazi ili kuafikia amani, mafanikio na umoja wa taifa hili.

“Hatuwezi kuruhusu nchi hii irudi katika siasa za kikabila. Tunataka tufanye kazi pamoja ili tusongeshe nchi hii mbele,” akaongeza.

Naye Mbunge wa Gatundu Kusini Moses Kuria amemkosoa Katibu Mkuu wa Chama cha Jubilee Raphael Tuju kwa kumtimua Seneta wa Kaunti ya Murang’a kutoka wadhifa wa Kiranja wa wengi katika Bunge la Seneti.

Kuria amesema uamuzi huo haufai, huku akihoji kwamba Kang’ata ameadhibiwa kwa kuzungumza ukweli. Mbunge huyo ameonekana kurejelea barua aliyoiandika Kang’ata akimwambia Rais Uhuru Kenyatta kuhusu maswala mbali mbali likiwemo lile la umaarufu wa BBI katika eneo la Mlima Kenya.

Viongozi wengine waliohudhuria mazishi hayo ni pamoja na Waziri wa Kilimo Peter Munya, Mbunge wa Kikuyu Kimani Ichung’wa, mwenzake wa Kieni Kanini Kega, Martha Wangari wa Gilgil miongoni mwa wabunge wengineo.

Categories
Habari

Rais Kenyatta kukutana na Maseneta wa Jubilee Jumanne

Rais Uhuru Kenyatta ameitisha mkutano wa maseneta kabla ya kurejelewa kwa vikao vya bunge Jumane alasiri.

Mkutano huo unatarajiwa kuanza saa nne katika jumba la mikutano ya kimataifa la Kenyatta-KICC.

Mwaliko wa mkutano huo ulitumwa na naibu wa kiranja wa walio wengi bungeni Farhiya Hajii.

Mkutano huo unafanyika wakati huu ambapo kiranja wa walio wengi bungeni seneta Irungu Kang’ata ametofautiana na uongozi wa chama hicho baada ya kuandika waraka kwa rais Kenyatta akitilia shaka umaarufu wa mpango wa maridhiano ya kitaifa-BBI katika sehemu ya Mlima Kenya.

Maseneta Kipchumba Murkomen wa Elgeyo Marakwet na John Kinyua wa Laikipia,ambao ni wandani wa naibu rais William Ruto wamethibitisha kupokea mwaliko wa mkutano huo.

Murkomen alivuliwa wadhifa wa kiongozi wa walio wengi bungeni,huku mwenzake wa Nakuru Susan Kihika akipokonywa wadhifa wa kiranja wa bunge kwenye mkutano kama huo uliofanyika mwaka jana.

Kurejelewa kwa shughuli za bunge kunawadia wakati huu ambapo kuna msisimko mkubwa wa kisiasa nchini kuhusiana na mjadala kuhusu mpango wa-BBI na uchaguzi mkuu ujao.

Aidha unajiri siku moja baada ya mahakama kuu kusitisha hatua ya tume huru ya uchaguzi na mipaka-IEBC kuidhinisha kupigiwa kura ya maamuzi mswada wa marekebisho ya katiba kabla ya kesi zilizowasilishwa mahakamani dhidi ya mchaskato huo kusikizwa na kuamuliwa

Categories
Habari

Wabunge waliokutana na Ruto wasema marekebisho ya katiba si kipaumbele kwa sasa

Baadhi ya wabunge wamekosoa mswada wa marekebisho ya katiba wakisema haufai, na kwamba umewadia kwa wakati usiofaa.

Wabunge hao waliokutana na Naibu Rais William Ruto nyumbani kwake katika eneo la Karen Jijini Nairobi, wamesema serikali inafaa kuweka kipaumbele shughuli za kufufa uchumi ulioathiriwa na janga a korona nchini badala ya kubadilisha katiba.

Mkutano huo ulilenga kutafakari yaliyomo kwenye mswada wa marekebisho ya katiba chini ya mchakato wa maridhiano wa BBI, ambao umeanza kujadiliwa kwenye mabunge ya kaunti.

Baada ya mkutano huo wa faragha wa takribani saa sita, wabunge hao walijitokeza na kukosoa shinikizo zinazoendelea za marekebisho ya katiba.

Wakiongozwa na Mbunge wa Kilifi Kaskazini Owen Baya, mwenzake wa Garrisa Mjini Aden Duale, wa Gatundu Kusini Moses Kuria, Seneta wa Elgeiyo Marakwet Kipchumba Murkomen, viongozi hao wamesema mchakato wa marekebisho ya katiba haufai.

“Kipaumbele kwa Wakenya sasa ni kuboresha maisha yao, sio mambo ya BBI. Lakini hata kama watalazimisha kwamba watu waangalie mambo ya BBI, Wakenya wapewe nafasi ya kujisomea wenyewe hii BBI wajue nini ambacho watapigia kura,” amesema Mbunge wa Kilifi Kaskazini Owen Baya.

Mkutano huo umejiri huku mabunge ya kitaifa na Seneti yakitarajiwa kurejelea shughuli Jumanne ambapo wabunge wameahidi kushinikiza utekelezaji wa miswada itakayoangazia changamoto zinazowakumba wakulima humu nchini, miongoni mwa maswala mengineyo.

Wabunge hao pia wamelalamika kuhusu kuondolewa kwa walinzi wao na pia ukosefu wa usalama wa kutosha katika mikutano ya Naibu Rais William Ruto, wakisema hali hiyo inawahatarishia maisha.

Wametoa wito kwa Inspekta Jenerali wa Polisi Hillary Mutyambai kuhakikisha kwamba wanapata ulinzi wa kutosha kulingana na matakwa ya kikatiba.

Categories
Habari

Ruto atoa wito wa umoja wa kitaifa huku uchaguzi mkuu ukikaribia

Naibu Rais William Ruto ametoa wito wa kuwepo kwa umoja miongoni mwa Wakenya huku nchi hii ikijiandaa kwa uchaguzi mkuu mwaka ujao.

Akiongea katika ibada ya Kanisa la A.C.K All Saints, Parokia ya Mtwapa Kaunti ya Kilifi, Ruto amewataka Wakenya kujiepusha na siasa za ukabila.

Amewataka viongozi na Wakenya kwa jumla kuwa na uvumilivu wa kisiasa, akisema kila mtu ana uhuru wa kutoa maoni yake.

“Katika harakati tuliyo nayo, la muhimu zaidi katika taifa letu la Kenya ni umoja. Sote ni Wakenya na Mungu ako na kusudi la sisi sote kuishi katika taifa moja,” amesema Naibu Rais.

Ruto amesema wanasiasa wanapaswa kukumbatia siasa zinazotoa kipau mbele katika kuinua hali ya maisha ya wasiojimudu katika jamii.

Amelitaka kanisa kuendelea kuombea nchi hii kabla ya uchaguzi ili mapenzi ya Mwenyezi Mungu yatimie wakati wa uchaguzi.