Categories
Burudani

Wasafi Tv kurejea mwisho wa mwezi!

Adhabu iliyotolewa kwa kituo cha runinga cha Wasafi nchini Tanzania imerekebishwa. Mamlaka ya mawasiliano nchini Tanzania TCRA ilitangaza hayo leo kupitia kwa mkurugenzi mkuu Bwana James Kilaba.

TCRA inasema ilipokea rufaa kutoka kwa usimamizi wa Wasafi Tv inayomilikiwa na msanii Diamond Platnumz kuhusu adhabu hiyo na baada ya kutathmini wameamua kwamba marufuku hiyo ambayo ingekamilika mwezi Juni mwaka huu wa 2021 ikamilike tarehe 28 mwezi Februari mwaka huu wa 2021.

Tangazo la kufungwa kwa kituo hicho lilitolewa na TCRA tarehe tano mwezi Januari mwaka huu na tarehe 21 mwezi huo, usimamizi wa Wasafi Tv ukaandikia TCRA kuomba adhabu yao irekebishwe. Tarehe 28 mwezi Januari, wasimamizi hao wa runinga ya Wasafi walirejea tena TCRA ambapo walipata kusikilizwa.

Bwana Kilaba anasema kwamba Wasafi Tv ilikiri kukiuka kanuni fulani za maadili.

Sababu kuu ya Wasafi Tv kupoteza leseni ya kupeperusha matangazo ni hatua yao ya kupeperusha moja kwa moja tumbuizo la mwanamuziki Gigy Money ambaye anasemekana kuvaa mavazi ambayo yalionyesha umbo lake visivyo.

Msanii huyo Gigy money pia aliadhibiwa na BASATA au ukipenda “Baraza la Sanaa la Taifa” ambapo alifungiwa asiwahi kufanya kazi yoyote ya sanaa kwa muda wa miezi sita.

Gigy siku hiyo kwenye tamasha la Wasafi Media, aliingia jukwaani akiwa amevaa dera kisha baadaye akalivua na kubakia na vazi la kushikilia mwili ambalo rangi yake ilikaribia kufanana na rangi ya ngozi yake ungedhania yuko uchi.

Usimamizi wa Wasafi haujasema lolote kuhusu kupunguziwa adhabu.

Categories
Burudani

Wasafi Tv yafungwa kwa miezi sita

Kituo cha runinga kwa jina Wasafi Tv cha Tanzania kinachomilikiwa na mwanamuziki Diamond Platnumz kimefungiwa kisipeperushe vipindi na matangazo kwa muda wa miezi sita na mamlaka ya mawasiliano nchini humo TCRA.

Inasemekana kwamba kituo hicho kilikiuka kanuni na maadili wakati kilipeperusha tamasha moja mubashara ambapo msanii kwa jina Gigy Money alionyeshwa akiwa uchi jukwaani wakati wa tamasha la Wasafi Media huko Dodoma.

Msanii Gigy Money naye amezuiwa kujihusisha na shughuli zote za sanaa kwa muda wa miezi sita.

Kaimu mkurugenzi wa TCRA Bwana Johannes Kalungule ndiye alitangaza hayo na kuutaka usimamizi wa kituo hicho cha runinga kuomba umma msamaha.

Kulingana na Kalungule uamuzi huo wa kukifunga kituo hicho cha runinga uliafikiwa baada ya mkutano kati ya pande hizo mbili.

Kufikia sasa usimamizi wa kituo hicho haujasema lolote hata kuomba msamaha kulingana na maagizo.

Hii sio mara ya kwanza kampuni ya Wasafi inajipata pabaya, mwaka jana kituo chake cha redio kwa jina Wasafi fm kilifungiwa kwa muda wa siku saba kwa sababu sawia ya kukiuka maadili.

Marufuku hiyo ilianza kutekelezwa tarehe 12 mwezi septemba mwaka jana na usimamizi wa kituo hicho uliamua kupeleka watangazaji wake katika eneo la wasafi village ambapo walikumbushwa maadili ya kazi na kupata muda pia wa kujiliwaza.

Watangazaji wa vipindi vya “The Switch” na “Mashamsham” wanasemekana kutumia maneno ambayo yalikuwa kinyume na maadili kati ya tarehe mosi na tarehe nne mwesi Agosti mwaka 2020.

Categories
Burudani

Siku 40 za mtoto Balqis Isihaka ulimwenguni

Balqis Isihaka ni mtoto wa kike wa mwanamuziki wa nchi ya Tanzania Queen Darleen na Isahaka mtoro. Queen Darlene ni dadake Diamond Platnumz lakini hakuhudhuria arusi ya wawili hao mwisho wa mwaka jana kwani alikuwa amesafiri.

Darlene ni mke wa pili wa mwanabiashara Isihakia.

Jumamosi tarehe 21 mwezi Novemba mwaka huu wa 2020, mtoto huyo alitimiza siku arobaini tangu kuzaliwa na ilikuwa sherehe ya kipekee.

Imekuwa kawaida kwa wafuasi wa dini ya kiisilamu kwa mama na mtoto kukaa nyumbani kwa siku arobaini za kwanza na zinapokamilika, sherehe inafanyika.

Mojawapo ya mambo ambayo hufanyika kwenye sherehe hiyo ni kunyolewa kwa mtoto kwani nywele ambayo alizaliwa nayo inachukuliwa kuwa chafu kwa hivyo inaondolewa ili kutoa nafasi kwa nywele safi kumea.

Sherehe ya jumamosi ilisheheni mbwembwe za kipekee na ilikuwa ya wageni waalikwa tu na hata kwenye tangazo mahali pa tukio hapakutajwa . Diamond Platnumz alifika akiwa ameandamana na meneja wake ambaye sasa ni mbunge wa Morogoro Kusini na watu wengine wengi japo kwa kuchelewa.

Walipohojiwa, wazazi wa mtoto huyo walisema tayari ameanza kupata kazi za mauzo.

Wengi walidhania kwamba Diamond hangehudhuria kwani alikuwa akiunda muziki studioni na gwiji wa muziki toka Congo Koffi Olomide.

Mwanamuziki aliyepia mwanamitindo Gigy Money naye alihudhuria sherehe ya mtoto Balqis. Queen Darleen na Diamond Platnumz wana baba mmoja ambaye anajulikana kama Abdul Juma, mzee huyo pia alihudhuria sherehe ya mjukuu wake.

Darleen na Diamond awali hawakuwa na uhusiano mzuri na mzee Abdul Juma lakini wakati fulani waliridhiana. Tukio la jumamosi lilionyeshwa mubashara kwenye runinga ya Wasafi.