Categories
Burudani

Baba Levo amshukuru Diamond Platnumz

Mwanamuziki na mtangazaji wa kituo cha redio cha Wasafi Fm nchini Tanzania Revokatus Kipando maarufu Baba Levo anamshukuru mwanamuziki Diamond Platnumz kwa kumsaidia kuendelea umaarufu wake jambo ambalo limemletea mengi mazuri.

Kupitia Instagram mtangazaji huyo aliandika, “KUWA KARIBU NA WEWE IMETOSHA KUNIPA PESA AMABAYO SIKUTEGEMEA KUJA KUISHIKA NA UZEE HUU.. Naomba Niweke wazi Kwa Mashabiki Wangu Kwamba Kabla Ya Mwezi Huu Kuisha Nitakuwa Nimesain Mikataba Na MAKAMPUNI TISA MAKUBWA Yote Yanataka Niwe BALOZI Wao Kwenye Bidhaa Zao Tofauti Tofauti… Niseme Tena ASANTE @diamondplatnumz Asante Sanaaa..”

Diamond alijibu usemi huo wa Baba Levo akimwita “Fundi Majumba” na kisha kuweka ishara ya moto na kilipuzi kuonyesha kwamba amekubali shukrani zake.

Wiki tatu zilizopita msanii huyo alizua minong’ono kwenye mitandao ya kijamii kwa kusema kwamba yeye angekuwa mwanamke kama Zuchu, angemzalia Diamond watoto watatu.

Usemi huo ulisababisha wengi kumrejelea Baba Levo kama chawa jina ambalo analikubali kwa kuwa mara nyingi huwa yuko karibu sana na Diamond Platnumz ambaye ni mkubwa wake kikazi.

Huwa anazungumzia utajiri wa Diamond Platnumz hadharani huku akisema kwamba anakubali kamzidi kifedha lakini atatumia umaarufu wake ili naye aendelee.

Categories
Burudani

Maoni ya Baba Levo

Msanii na mtangazaji wa Tanzania Baba Levo ametoa maoni yake kuhusu sakata ya msanii mweza Rayvanny na msichana kwa jina Paula Majani ambayo inaendelea kwenye mitandao ya kijamii.

Baba Levo ambaye ni mtangazaji kwenye kituo cha redio kinachomilikiwa na Diamond Platnumz Wasafi Fm, alihojiwa na wanahabari ambapo alisema kwamba Paula ambaye wengi wanadhani ni mtoto wa shule sio mwanafunzi kwani yuko nyumbani wakati wanafunzi wengine wa kidato cha tano wamesharejea shuleni.

Alisema pia kwamba Paula, mtoto wa mwigizaji Frida Kajala Masanja na Bwana Majani ameshafikisha umri halali wa utu uzima wa miaka 18.

Haya yanatokana na video ambayo mwanamuziki Rayvanny aliiweka kwa muda kwenye akaunti yake ya Instagram akimbusu mwanadada huyo kwa jina Paula kitendo ambacho kimeghadhabisha wengi nchini Tanzania ambao ni wasanii, watu maarufu na ni wazazi vile vile.

Mama Paula, Frida Kajala alielekezewa lawama kwa kutomlea mtoto wake vizuri kwa maadili yanayostahili naye akaelekeza kidole cha lawama kwa Hamisa Mobeto. Hamisa alijitetea kiasi cha kutoa ithibati ya video ambayo inaonyesha akiwa na Paula kwenye gari siku ambayo alimpeleka kupata chakula cha mchana.

Frida anasema kwamba siku hiyo hiyo ndiyo Hamisa alimpeleka kwa Rayvanny ambapo walimywesha pombe na mengine yakaendelea.

Baba Levo alifichua kwamba babake Paula kwa jina P Funk Majani alichoka na visa vyake na akanawa mikono na kuachia mamake malezi.

Msanii huyo anashauri kwamba Paula aachwe aolewe na Rayvanny kwani wameonyesha wanapendana na kwamba Rayvanny ana uwezo wa kifedha anawenza kumtunza vywema.

Inasubiriwa kuona jinsi sakata hii itaisha huku kukiwa na tetesi kwamba mamake Paula na msanii Harmonize walionekana jana wakikwenda kwenye kituo cha polisi na wengi wanakisia kwamba alikwenda kumshtaki Rayvanny.

Rayvanny alizindua kibao kwa ajili ya siku ya wapendanao na maneno ya wimbo huo yanaonekana kumzungumzia Paula.

Categories
Burudani

Sijawahi kumroga mume wangu!

Ndivyo alivyojitetea mwanamuziki wa Tanzania Queen Darleen ambaye kwa muda mrefu alichukuliwa kuwa dadake Diamond Platnumz kuhusu uhusiano wake na mume wake Isihaka.

Minong’ono ilikuwa imesheheni mitandao ya kijamii awali kwamba kamshikia dawa ya mapenzi ndiposa anampenda na kusahau mke wake wa kwanza.

Queen ni mke wa pili wa Isihaka na wakati fulani kulinuka ugomvi kati yake na mke wa kwanza ambaye anaitwa Sabra na wakati fulani alipohojiwa Darleen akasema anajua ameolewa yeye peke yake wengi wakadhani labda mke wa kwanza kaachwa.

Lakini jana wanandoa Isihaka na Darleen walifafanua kwamba wako wote kwenye ndoa hiyo na ndipo alisema kwamba hajawahi kumtafutia mume wake dawa ya mapenzi ili awe naye. Aliendelea kwa kusema kwamba akiamua kumroga basi atakuwa mke pekee kwenye ndoa hiyo.

Walikuwa wakihojiwa kwenye kituo cha redio cha Wasafi FM ambacho kinaendeleza mahojiano ya wapenzi na wanandoa mwezi huu wa mapenzi.

Isihaka alisema kwamba huwa anagawa siku zake za wiki kati ya wake zake wawili, siku nne kwa mke mkubwa na tatu kwa mke mdogo.

Darleen naye alielezea kwamba anamjali mume wake sana ndio maana lazima amheshimu mke mwenza kwani mume wake anampenda sana mke mkubwa. Hiyo alisema ndiyo sababu aliacha kupachika picha za Isihaka kwenye akaunti zake za mitandao ya kijamii kila mara.

Mwanadada huyo ambaye ni mwanamuziki chini ya Kampuni ya WCB ya Diamond Platnumz alisifiwa sana na mume wake ambaye alisema kwamba anajua sana kutekeleza majukumu yake kama mke na kwamba anapokuwa nyumbani yeye sio Queen Darleen bali ni Mwanahawa kwani hata mavazi hubadilika wakiwa pamoja.

Categories
Burudani

Kibao cha Harmonize na Anjella kuzinduliwa siku ya wapendanao

Harmonize anayemiliki kampuni ya wanamuziki kwa jina Konde Music aligonga vichwa vya habari mwishi wa mwaka jana baada ya kuomba kufanya kazi na msanii anayeibukia nchini Tanzania kwa jina Anjella.

Anjella anaishi na ulemavu na amekuwa tu akitumbuiza kwa kurudia nyimbo za wasanii wengine wakubwa na hapo ndipo Harmonize alifurahishwa na uwezo wake wa kuimba.

Kinyume na matarajio ya wengi Harmonize msanii mkubwa alimtumia Anjella ujumbe kwenye Instagram akimwomba afanye kazi naye jambo ambalo Anjella hakuamini.

Lakini baadaye wasanii hao wawili walikutana na kuanza kupanga mikakati ya kushirikiana kikazi na kazi hiyo inaonekana kukamilika kulingana na tangazo la Harmonize kwamba kibao chao kitaanguka tarehe 14 mwezi huu wa Februari siku ya wapendanao.

Awali Harmonize alikuwa amepanga kwamba kazi yake na Anjella iwe ya kwanza ya mwaka huu lakini anaonekana kubadili mipango kwani tayari amezindua wimbo mwingine kwa jina “Anajikosha” na amemhusisha Anjella kwenye video.

Wimbo wao unaitwa “All Night” na kwenye tangazo lake, Harmonize anadai kwamba ni wimbo mzuri sana na utamuinua Anjella sana. anamshukuru pia kwa kazi yake na kukubali kufanya kazi naye.

Harmonize amebadilisha muonekano wa Bi. Anjella ambaye awali alikuwa anavaa tu kawaida na hakuwa anatumia vipodozi.

Anjella alivyokuwa akionekana awali na anavyoonekana sasa

Wanaofuatilia muziki nchini Tanzania wanaonelea kwamba hatua ya Harmonize ya kuleta Anjella na kufanya naye kazi ni ya kujaribu kushindana na Diamond Platnumz ambaye alimchukua Zuchu akaanza kufanya naye kazi na sasa Zuchu anafanya vywema.

Awali Harmonize alikuwa chini ya usimamizi wa Diamond kwenye WCB lakini akagura na kuanzisha kampuni yake ya muziki kwa jina “Konde Music”. Kila mara huwa anatoa nyimbo na kusema maneno ambayo wengi huwa wanahisi yanamlenga Diamond ila Diamond hajawahi kujibu.

Wakati mmoja Harmonize alikiri heshima na mapenzi yake kwa Diamond na Diamond hakujibu. Juzi juzi akihojiwa kwenye kituo cha Wasafi Fm, Diamond alisema hakujibu utambuzi wa Harmonize kwani alihisi kwamba yeye sio mkweli na huwa anatumia jina lake kujitafutia umaarufu.

Categories
Burudani

Diamond akiri Mzee Abdul Sio babake

Habari kuhusu baba mzazi wa Diamond Platnumz mwanamuziki wa Tanzania zilisheheni mitandao ya kijamii kwa siku kadhaa zilizopita baada ya Ricardo Momo kufichua kwamba yeye na Diamond ni ndugu maanake baba yao ni mmoja.

Momo akiwa bado kwenye studio za Wasafi Fm kuhojiwa wakati huo, mamake Diamond alipigiwa simu na akadhibitisha kwamba kweli Diamond ni kakake.

Kwa muda Diamond alisalia kimya kuhusu jambo hilo ila jana aliamua kuweka mambo bayana pale alipohojiwa kwenye kituo cha redio cha Wasafi Fm ambacho anamiliki.

Alisema kwamba ukweli Mzee Abdul sio babake mzazi na alijua haya yapata miaka ishirini iliyopita lakini akaendelea kumpenda kwa sababu yeye ndiye aliona na kuishi naye kama baba.

Kulingana naye, Mzee Abdul ndiye alijiweka mbali naye na zaidi kilichomkera Bi. Sanura Kassim ambaye ni mama mzazi wa Diamond, ni hatua ya Mzee Abdul kujitokeza kwa vyombo vya habari na kudai kwamba Diamond hakuwa anampa usaidizi wowote ilhali alikuwa akimsaidia.

Mzee Abdul kwa ushirikiano na msanii kwa jina Gumbo waliwahi kutoa wimbo kwa jina “Charanga” ambapo Mzee huyo anajiita baba Diamond Platnumz na Babu Tiffah. Tiffa ni mtoto wa Diamond na Zari.

Kwenye wimbo huo anasimulia jinsi amekosa mwana pamoja na mama.

Diamond hata hivyo alisema kwamba hata kama sasa ukweli umejulikana, hatatenga yeyote ambaye awali alikuwa na mahusiano mema naye akijua ni ndugu.

Categories
Burudani

Agnes amkana Uchebe!

Muda mfupi baada ya Shilole na Uchebe kutengana mwaka jana, Uchebe alijitokeza kutangaza kwamba ashajipatia mpenzi mpya kwa jina Agnes Suleiman ambaye ni muigizaji na mwanabiashara.

Uchebe na Agnes waliweka picha na video kwenye mitandao ya kijamii ambazo zilionyesha jinsi walikuwa wanapendana swala ambalo wengi walitilia shaka.

Oktoba 24 mwaka 2020, Agnes na Uchebe walihojiwa kwenye kipindi cha Mashamsham cha kituo cha redio cha Wasafi Fm ambapo walisema kwamba wanapendana. Agnes aliulizwa ni kwa nini alikubali kuingia kwa mahusiano na mwanaume ambaye ashasemekana kwamba alikuwa akimpiga mke wake wa awali akasema kwamba sio ukweli, uchebe sio mpenda vita.

Agnes na Uchebe kwenye studio za Wasafi Media

Waliulizwa pia ikiwa ni uhusiano walibuni tu kwa ajili ya kujipatia umaarufu na wakakana na Agnes akammiminia sifa Uchebe kwamba ni mtu anayempenda na kumjali.

Alisimulia kwamba walikutana kwa mara ya kwanza na Uchebe ambaye ni fundi gari wakati alipeleka gari lake likatengenezwe na Uchebe akampokea vyema na kumpa huduma nzuri na mapenzi yakaota.

Kulingana na simulizi yake wakati huo kwenye Wasafi Fm, Uchebe alimpa gari lake akaenda nalo nyumbani akabaki na lake akilitengeneza na baadaye akampelekea nyumbani kwake.

Sasa mwanadada huyo Agnes amejitokeza kusema kwamba uhusiano wake na Uchebe ni kitu ambacho kilipangwa tu. Akihojiwa na Dizzim Online, mwanadada huyo alisema kwamba Uchebe alimwomba waigize ili kumkera Shilole aliyekuwa mke wa Uchebe.

Agnes anasema Uchebe alivunjika moyo sana baada ya kuachwa na Shishi Baby na ndio maana akaamua kujionyesha kama ambaye yuko sawa ila hakuwa sawa.

Alisongwa na mawazo kiasi cha kutoweza kuendelea na kazi yake ya gereji kwa muda.

Kulingana naye, kuonekana kwake hadharani na Uchebe, kumemharibia jina na wengi wanaamini ameshapita naye lakini anasema anataka watanzania wajue kwamba hakuwahi kuwa na uhusiano halisi wa mapenzi na Uchebe.

Categories
Burudani

Mbosso atangaza ujio wa Albamu yake

Mwanamuziki wa Tanzania kwa jina Mbosso Khan ametangaza kwamba atazindua albamu yake ya kwanza tarehe 14 mwezi Februari mwaka huu wa 2021 ambayo ni siku ya wapendanao ulimwenguni.

Siku hiyo ya wapendanao inaonekana kuwa wakati mwafaka wa kuachilia kazi hiyo yake kwani inahusu mapenzi na inaitwa “Defination of Love”.

Akizungumza wakati wa mahojiano asubihi ya leo kwenye kituo cha Wasafi Fm, Mbosso alifichua kwamba kwa kipindi fulani, baada ya bendi yake ya Yamoto kusambaratika, alikosa mpango wa kuendeleza muziki binafsi na akawa amezamia mpira wa miguu.

Rich Mavoko ndiye alikwenda kumtafuta nyumbani akampata akifanya mazoezi ya mpira wa miguu kisha akamchukua wakafanye colabo. Hivyo ndiyo aliingia WCB mpaka sasa.

Alisajiliwa na kampuni ya wanamuziki ya Wasafi Classic Baby – WCB yake Diamond Platnumz mwezi Januari mwaka 2018 na tangu wakati huo amekuwa akifanya vizuri katika ulingo wa muziki.

Mwezi Septemba mwaka 2020, Mbosso kwa jina halisi Joseph Kilungi, alijipatia kazi yake ya kwanza ya kuwa balozi wa bidhaa za maziwa za kampuni ya Tanga Fresh mkataba ambao nia yake ilikuwa kuongeza mauzo ya bidhaa hizo.

Mkubwa wake Diamond Platnumz alionekana kumpongeza kwa hatua hiyo huku akimtia moyo aendelee na kazi yake ya muziki.

Wakati huo pia, Mbosso alikiri kuwa na tatizo la kutetemeka mikono ambalo anasema alizaliwa nalo lakini wengi walidhani kwamba lilitokana na utumizi wa mihadarati lakini baadaye walielewa.

Alielezea kwamba katika hospitali zote alizozuru kutafuta tiba, madaktari walimwambia kwamba tatizo hilo haliwezi kurekebishwa na kwamba ataishi nalo milele.

Categories
Burudani

Sukari, Zuchu

Zuchu mwanamuziki anayeangaziwa zaidi katika kampuni ya WCB nchini Tanzania ana kibao kipya kwa jina “Sukari” ambacho alikiachia rasmi kwenye You Tube tarehe 20 mwezi Januari mwaka 2021.

Wimbo huo ulikuwa umesubiriwa kwa hamu na ghamu kutokana na namna alikuwa amefanya matayarisho ya ujio wake kwenye mitandao ya kijamii hasa Instagram.

Alitafuta usaidizi wa watu kadhaa maarufu nchini Tanzania ambao wana umuhimu kwenye jamii kwa jumla ambao walirekodi video fupi kuhusu wasifu wao na mwisho wote wanamalizia kujirejelea kama sukari.

Mamake mzazi ambaye pia ni msanii kwa jina Khadija Omar Kopa ni kati ya waliosaidia kutangaza ujio wa kibao hicho cha Sukari. Kwenye video yake, Khadija anasifia burudani yake ambayo anasema ikosekanapo watu hutaharuki na watu huwa tayari kuigharamia wakati wowote. Onyesho zuri la usaidizi wa mama kwa mwanawe hasa katika kuendeleza talanta.

Mwingine kati ya watu hao mashuhuri ni muigizaji Wema Sepetu ambaye alisema kwamba urembo wake ndio ulimjengea jukwaa analosimamia kwa sasa tangu mwaka 2006 baada ya kushinda shindano la ulimbwende wakati huo na kutawazwa “Miss Tanzania”.

Aligusia pia kipaji chake cha uigizaji ambacho anasema ni cha hali ya juu zaidi na kwamba yeye ni sukari.

Kabla ya kuachilia kibao hicho, Zuchu naye alitoa video akisema kwamba anaamini kila mwanadamu ana umuhimu wake katika jamii. Umuhimu huo ndio anafananisha na ladha ya sukari huku akijirejelea kama sukari ya Zanzibar alikozaliwa.

Zuchu alikwenda kuhojiwa katika kituo cha redio cha Wasafi Fm katika kipindi cha jioni kwa jina Mgahawa ambapo alionyesha waliokuwepo jinsi ya kuuchezea wimbo huo.

Ikumbukwe kwamba alipoingia WCB alimhusisha mkubwa wake Diamond kwenye nyimbo kadhaa ambazo zilisababisha minong’ono kwamba wana uhusiano wa kimapenzi.

Walikuwa wakiandamana kwenye maonyesho kadhaa lakini zamu hii Zuchu alikuwa peke yake alipokwenda kuhojiwa. Alisema Diamond alimpa ahadi ya kumshika mkono alipokuwa akianza lakini pia alimwambia kwamba kuna wakati atamwachilia afanye kazi peke yake.

Kama ilivyo mazoea nchini Tanzania, wengi wamerekodi video wakichezea wimbo huo mpya wa Zuchu kwa jina sukari na amechapisha hizo video kwenye akaunti yake ya Instagram.

Categories
Burudani

Mamake Diamond afichua babake mzazi

Mama mzazi wa mwanamuziki tajika nchini Tanzania Diamond Platnumz ambaye anajulikana kama Bi. Sandra amefichua baba mzazi wa Diamond.

Bi Sandra, Sanura Kassim, ambaye anajiita Mama Dangote kwenye mitandao ya kijamii alitangaza haya kupitia kituo cha redio cha Wasafi Fm ambacho kinamilikiwa na mwanawe.

Mohamed Salum Iddy maarufu kama Ricardo Momo ambaye hufanya kazi kwa karibu na mwanamuziki Diamond alikuwa akihojiwa kituoni humo ambapo alifichua kwamba yeye na Diamond ni watoto wa baba mmoja.

Hapo ndipo mtangazaji wa kipindi cha mashamsham kwa jina Dida aliamua kumpigia simu mama Dangote ili kudhibitisha. Mama Dangote alithibitisha kwamba Diamond ni mtoto wa Marehemu Salum Iddy Nyange ambaye ndiye baba mzazi wa Ricardo Momo.

Kwa muda sasa Diamond amejikuta pabaya huku akilaumiwa kwa kumtelekeza babake ambaye wengi walidhani ni Mzee Abdul aliyekuwa mume wa Bi. Sandra lakini Sandra alielezea kwamba alimwoa akiwa tayari ana ujauzito wa Diamond.

Diamond amesutwa sana kuhusu kutelekeza babake kiasi cha kutungiwa wimbo na mwanamuziki Harmonize au ukipenda Konde Boy.

Alipohojiwa baada ya ufichuzi wa baba mzazi wa Diamond, Mzee Abdul alisema anafurahia maanake ni kama ambaye ametua mzigo mzito huku akimsihi Diamond aache kutumia jina lake “Abdul” na kwamba anamtakia kila la heri maishani.

Jina halisi la Diamond ni “Nasibu Abdul”.

Mzee Abdul alisema hakujua kuhusu uzazi halisi wa Diamond hadi alipofichua Bi Sandra hiyo jana.

Tangu jana Bi. Sandra amekuwa akiweka picha za zamani za Diamond na marehemu Salum Iddy Nyange na watumizi wa mitandao wanasema wawili hao wanafanana.

Kwa muda mrefu Ricardo Momo amekuwa akijitambulisha kama kakake Diamond na wengi hawakujua undugu wao hadi jana.

Ricardo alielezea kwamba Diamond alitambulishwa kwake rasmi mwaka 1999 na marehemu babake Salum Iddy Nyange, na wakati huo Diamond alikuwa na umri wa miaka 10.

Hii ina maana kwamba Queen Darleen na Diamond Platnumz hawana ukoo wa damu ila tu walilelewa na mzee Abdul.

Categories
Burudani

Wasafi Tv yafungwa kwa miezi sita

Kituo cha runinga kwa jina Wasafi Tv cha Tanzania kinachomilikiwa na mwanamuziki Diamond Platnumz kimefungiwa kisipeperushe vipindi na matangazo kwa muda wa miezi sita na mamlaka ya mawasiliano nchini humo TCRA.

Inasemekana kwamba kituo hicho kilikiuka kanuni na maadili wakati kilipeperusha tamasha moja mubashara ambapo msanii kwa jina Gigy Money alionyeshwa akiwa uchi jukwaani wakati wa tamasha la Wasafi Media huko Dodoma.

Msanii Gigy Money naye amezuiwa kujihusisha na shughuli zote za sanaa kwa muda wa miezi sita.

Kaimu mkurugenzi wa TCRA Bwana Johannes Kalungule ndiye alitangaza hayo na kuutaka usimamizi wa kituo hicho cha runinga kuomba umma msamaha.

Kulingana na Kalungule uamuzi huo wa kukifunga kituo hicho cha runinga uliafikiwa baada ya mkutano kati ya pande hizo mbili.

Kufikia sasa usimamizi wa kituo hicho haujasema lolote hata kuomba msamaha kulingana na maagizo.

Hii sio mara ya kwanza kampuni ya Wasafi inajipata pabaya, mwaka jana kituo chake cha redio kwa jina Wasafi fm kilifungiwa kwa muda wa siku saba kwa sababu sawia ya kukiuka maadili.

Marufuku hiyo ilianza kutekelezwa tarehe 12 mwezi septemba mwaka jana na usimamizi wa kituo hicho uliamua kupeleka watangazaji wake katika eneo la wasafi village ambapo walikumbushwa maadili ya kazi na kupata muda pia wa kujiliwaza.

Watangazaji wa vipindi vya “The Switch” na “Mashamsham” wanasemekana kutumia maneno ambayo yalikuwa kinyume na maadili kati ya tarehe mosi na tarehe nne mwesi Agosti mwaka 2020.