Categories
Habari

Rais Kenyatta azindua kiwanda cha kutengeneza bunduki nchini

Rais Uhuru Kenyatta amezindua kiwanda cha utengenezaji bunduki katika viwanda vya vifaa vya usalama wa kitaifa mtaani Ruiru.

Akiongea wakati wa uzinduzi huo, rais alisema kiwanda hicho kitasaidia katika kuimarisha uchumi wa kitaifa na ufanisi wa kiteknolojia hapa nchini.

Alisema viwanda hivyo vitapunguza gharama ya ununuzi wa silaha na kuwezesha sekta ya usalama kuwa huru.

Uhuru amesema Kenya itaimarisha utengenezaji wa vifaa vya kisasa vya usalama.

Mradi huo wa thamani ya shilingi bilioni 15 unalenga kuboresha kiwango cha kujitegemea kwa nchi hii katika utengenezaji wa vifaa vya usalama.

Kiwanda hicho kinatarajiwa kutengeneza zaidi ya bunduki 1,000 kwa mwezi sawia na 12,000 kwa mwaka.

Bunduki hizo zitapunguza kiwango cha nchi hii kutegemea uagizaji wa bunduki kwa hadi asilimia 60

Categories
Habari

Raila: ODM inaunga mkono kikamilifu mswada wa marekebisho ya katiba

Chama cha ODM kimekariri kujitolea kwake kwa mpango wa maridhiano na Rais Uhuru Kenyatta, ambao umechangia katika kuleta mazingira ya amani na uthabiti hapa nchini.

Kwenye taarifa kwa vyombo vya habari iliyotiwa saini na kinara wa chama hicho Raila Odinga, chama hicho pia kimesema kinaunga mkono kikamilifu mswada wa marekebisho ya katiba ,ambao umetokana na mchakato wa BBI.

Odinga ambaye aliongea baada ya kukutana na baadhi ya maafisa wa chama hicho siku ya Jumatano, alisema chama hicho kwa sasa kinaangazia kampeni inayoendelea ya chanjo dhidi ya ugonjwa wa Covid-19 ,uzingatiaji hatua za kuthibiti ugonjwa huo zilizotangazwa na serikali,hali ya uchumi wa taifa hili pamoja na matukio ya kisiasa yanayojiri hapa nchini.

Odinga alitoa wito kwa Wakenya kuendelea kuzingatia kanuni za kuthibiti ugonjwa wa Covid-19 zilizotangazwa na wizara ya afya, na pia kujitokeza kuchanjwa.

Taarifa hiyo iliongeza kuwa chama hicho pia kingependa kuona bunge likiharakisha kupitisha mswada wa marekebisho ya katiba wa mwaka 2020,ili kuwezesha kutolewa kwa hati hiyo kwa Wakenya na kuamua hatma yake kupitia kura ya maamuzi.

Categories
Habari

Rais Kenyatta amuomboleza marehemu Paul Koinange

Rais Uhuru Kenyatta ametuma risala za rambirambi kwa   familia na wakazi wa eneo bunge la  Kiambaa kufuatia kifo cha mbunge  wao Paul Koinange.

Koinange alifariki Jumatano alfajiri katika hospitali ya Nairobi ambako alikuwa  akipokea matibabu.

Katika ujumbe wake, Rais alisema Kenya imepoteza mmojawapo  wa viongozi wake wa kutegemewa ambaye mtazamo wake  ulikuwa wa kukuzua umoja, uthabiti  na maendeleo ya nchi.

“Kifo kimetupokonya kiongozi shupavu. Kiongozi ambaye alizingatia sana amani, udhabiti na maendeleo ya taifa hili,” alisema rais

Kiongozi wa nchi alisema  aliunga mkono uthabiti wa ajenda ya amani ya nchini  kupitia Kamati ya bunge ya  Utawala na Usalama wa Kitaifa ambayo alikuwa Mwenyekiti wake.

Seneta wa Baringo Gideon Moi alimuomboleza Koinange akimtaja kuwa kiongozi mtulivu na aliyejitolea katika kazi yake. Seneta huyo alisema kifo cha Koinange ni pigo kubwa kwa nchi hii.

Categories
Habari

Mbunge wa Kiambaa Paul Koinange amefariki

Mbunge wa Kiambaa Paul Koinange ameaga dunia Jumatano alfajiri alipokuwa akitibiwa katika Nairobi hospital.

Koinange alikuwa mwenyekiti wa kamati ya bunge kuhusu usalama wa taifa na utawala.

Rais Uhuru Kenyatta amemwomboleza Koinange kama kiongozi shupavu na aliyetegemewa na taifa hili.

Kupitia kwa bunge la taifa ambapo alikuwa mwenyekiti wa kamati ya utawala na usalama wa kitaifa, Koinange aliwezesha kubuniwa kwa sera zilizokusudiwa kuhakikisha taifa lililo moja na lenye amani,” Rais alimwoboleza Koinange.

Koinange alichaguliwa mbunge wa Kiambaa kwa tikiti ya chama cha Jubilee na amewahudumia wakazi wa Kiambaa tangu mwaka 2017.

Categories
Habari

Rais Kenyatta na Mama Taifa Margaret Kenyatta wachanjwa dhidi ya Covid-19

Rais Uhuru Kenyatta, mama wa taifa Bi. Margaret Kenyatta, na waziri wa afya Mutahi Kagwe wamechanjwa dozi ya kwanza ya chanjo dhidi ya virusi vya corona huku wakilenga kuwahakikishia wananchi kuhusu usalama wa chanjo hiyo.

Walipokea chanjo hiyo baada ya Rais kutoa wito kwa watu walio na umri wa zaidi ya miaka 58 kujitokeza kupewa chanjo hiyo.

Katika hotuba yake kwa taifa, Rais Uhuru Kenyatta alisema kuwa kiwango cha maambukizi ya virusi vya corona cha asilimia 22 kinatisha, huku taifa hili likinakili kiwango cha juu cha vifo cha watu saba kila siku katika mwezi wa Machi.

Kiwango hicho ni cha juu zaidi tangu kuripotiwa kwa kisa cha kwanza cha Covid 19 mwezi Machi mwaka uliopita.

Serikali imenunua chanjo ya Oxford-AstraZeneca lakini kumekuwa na wasiwasi kuhusu chanjo hiyo huku watu wachache wakijitokeza kuchanjwa.

Wakenya wameelezea wasiwasi kuhusu chanjo hiyo hasa baada ya kuibuka kwa ripoti kuhusu usalama wake.

Serikali ilinunua dozi milioni 1.02 ya chanjo hiyo ya Oxford-AstraZeneca huku wafanyikazi wa mstari wa mbele wa afya, walimu na maafisa wa usalama kote nchini wakilengwa kuchanjwa.

Taifa hili linatarajiwa kupokea dozi nyingine milioni 24 za chanjo hiyo mwezi ujao.

Mapema juma hili chama cha madaktari cha KMPDU, kiliidhinisha uzinduzi na utoaji wa chanjo hiyo huku kikisema kuwa ongezeko la maambukizi ya virusi vya corona linatatiza utendaji kazi na kuathiri rasilmali chache zilizoko za sekta ya afya nchini.

Categories
Habari

Masomo ya darasani yapigwa marufuku hapa nchini

Rais Uhuru Kenyatta ameagiza kusitishwa kwa masomo yote ya darasani katika taasisi za humu nchini, zinazojumuisha taasisi za elimu ya juu, vyuo vya anuwai,vyuo vikuu na vyuo vya kiufundi.

Kulingana na Rais Kenyatta, hatua hiyo ni kutokana na idadi inayozidi kuongezeka ya maambukizi ya virusi hatari vya Covid-19 ambapo nchi hii imenakili kiwango cha maambukizi cha  asilimia 22.

Hata hivyo waliosazwa katika agizo hilo ni wale wanaofanya mitihani na wanafunzi wanaosomea utabitu kwa kuwa wameruhusiwa kuendelea na masomo yao.

Katika hotuba kwa taifa siku ya Ijumaa alasiri, kiongozi wa nchi pia alidokeza kuwa safari za kimataifa za kuingia na kutoka humu nchini zitaendelea kwa kuzingatia mwongozo uliopo kuhusu safari za kimataifa.

“Wale watakaoruhusiwa kuingia hapa nchini lazima wawe na vyeti vya kuthibitisha hawana virusi vya Covid-19. Vyeti hivyo havipaswi kuwa vimetolewa zaidi ya saa  96 kabla ya kuwasili humu  nchini,” alisema rais.

Rais pia aliagiza bunge la taifa na lile la Seneti kusitisha vikao vyake.

Wakati huo huo,kiongozi huyo wa nchi amepiga marufuku mabaa kuhudumu katika kaunti ya Nairobi,Nakuru,Kajiado,Kiambu na Machakos kutokana na msambao wa juu wa virusi vya Covid-19.

Mahoteli na mikahawa katika kaunti hizo tano zimetakiwa kuuza vyakula vilivyopakiwa kwani wateja hawataruhusiwa kula ndani ya mikahawa hiyo. Aidha mahoteli hayataruhusiwa kuuza vileo.

Categories
Habari

Usafiri wapigwa marufuku katika kaunti tano nchini kudhibiti msambao wa Covid

Rais Uhuru kenyatta amepiga marufuku kuingia au kutoka katika kaunti tano ambazo amezitaja kuwa zilizo na idadi kubwa ya maambukizi ya Covid-19.

Kaunti ambazo zimeathiriwa na marufuku hayo ya usafiri ni pamoja na Nairobi, Kiambu,Kajiado,Machakos na Nakuru.

Akihutubia taifa Ijumaa alasiri, Rais alisema usafiri wowote wa barabarani, angani au kupitia gari moshi hautaruhusiwa kwa vyovyote katika kaunti hizo husika.

Kiongozi huyo wa taifa pia alitangaza kuwa kafyu katika kaunti ya Nairobi, Kiambu,Kajiado,Nakuru na Machakos itaaza saa mbili usiku hadi saa kumi asubuhi. Hata hivyo saa za kafyu katika maeneo mengine nchini yatasalia kuwa kati ya saa nne usiku hadi saa kumi alfajiri.

Rais Uhuru aliagiza kusitishwa kwa mikutano yote katika katika kaunti ya Nairobi,Machakos,Nakuru,Kajiado na Kiambu.

Rais Kenyatta alisema amesikitishwa mno na kiwango cha maambukizi ya virusi vya Korona katika kaunti hizo tano hususan kaunti ya Nairobi ambayo ni kitovu cha msambao wa ugonjwa huo ikinakili kiwango cha maambukizi cha asilimia-60.

Katika masharti hayo mapya ya kudhibiti msambao wa virusi vya Covid-19, kiongozi wa nchi alisema ni watu 15 pekee ambaao wataruhusiwa kuhudhuria hafla za mazishi huku watakaoruhusiwa kuhudhuria hafla za harusi hawatazidi watu 30.

Categories
Habari

Rais Kenyatta amtaja marehemu John Magufuli kuwa mzalendo wa kuigwa

Rais  Uhuru Kenyatta amemtaja hayati  Dkt. John Pombe Magufuli kuwa mzalendo wa kweli wa bara Afrika ambaye alionyesha kuwa bara hili linaweza kusimamia rasil mali zake.  

Akiongea katika uwanja wa  Jamhuri mjini  Dodoma nchini Tanzania wakati wa misa ya wafu ya hayati John Pombe Magufuli, Rais  Kenyatta ambaye ndiye mwenyekiti wa sasa wa Jumuia ya Afrika Mashariki, alisema Tanzania iliafikia maendeleo makubwa katika kipindi kifupi .

Rais  Kenyatta alisema  Kenya itaendelea kushirikiana kwa karibu na  Tanzania kwa manufaa ya watu wa nchi hizi  mbili, jumuia ya Afrika Mashariki na bara Afrika kwa jumla.

Rais alitoa wito kwa Rais mpya wa  Tanzania Samia Suluhu Hassan kufuata nyayo za hayati Dkt. Magufuli ili kuendeleza urathi wake.

Marais wengine waliohudhuria hafla hiyo ni Cyril Ramaphosa wa Afrika Kusini , Lazarus Chakwera wa Malawi , Mokgweetsi Masisi wa Botswana , Edgar Lungu wa Zambia ,  Emmerson Mnangagwa wa Zimbabwe Felix Tshisekedi wa Jamhuri ya kidemokrasia ya Congo mioongoni mwa viongozi wengine wa dunia .

Categories
Habari

Rais Kenyatta amuomboleza naibu Gavana wa Kericho Susan Kikwai

Rais  Uhuru Kenyatta ametuma risala za rambi rambi kwa familia, gavana na wakazi wa kaunti ya  Kericho kufuatia kifo cha naibu gavana wa kaunti hiyo Susan Kikwai.

Naibu gavana huyo alifariki alipokuwa akipokea matibabu katika hospitali moja iliyo kaunti ya Kericho.

Kwenye ujumbe wake, Rais alimtaja marehemu kuwa mfanyikazi aliyejitolea katika majukumu yake na kuhakikisha  kuwa taifa hili linasonga mbele.

Rais alitoa mfano wa wakati ambapo Kikwai alihudumu kama mkurugenzi mkuu wa halmashauri ya uwekezaji nchini, akisema alisaidia kuangazia taifa hili kuwa nchi bora ya kuwekeza.

“Susan alikuwa mtumishi wa umma shupavu. Alipokuwa akifanya kazi katika serikali ya taifa,alitekeleza jukumu muhimu kuwavutia wawekezaji wa humu nchini,wa kanda na wale wa kimataifa,”  Rais alimwomboleza naibu huyo wa Gavana.

Rais  Kenyatta aliomba maulana kuifariji familia yake na wakazi wa Kericho wakati huu wa majonzi.

Categories
Habari

Rais Kenyatta: Kenya itasimama na Tanzania wakati huu mgumu

Rais Uhuru Kenyatta Jumamosi asubuhi alitembelea makazi ya balozi wa Jamhuri ya Tanzania hapa nchini Dkt. Stephen Simbawachane, ambako alitoa heshima zake kwa marehemu hayati Rais John Pombe Joseph Magufuli.

Rais akiandamana na maafisa wa ngazi ya juu serikalini,miongoni mwao kaimu jaji mkuu Philomena Mwilu, na maspika wa mabunge yote mawili Justin Muturi na Ken Lusaka, alituma risala zake za rambirambi kwa familia ya marehemu Rais huyo na watu wa jamhuri ya Tanzania.

Rais Kenyatta alimhakikishia balozi huyo kwamba Kenya itasimama na watu wa Tanzania wakati huu mgumu na kutuma risala yake binafsi na pia kwa niaba ya Wakenya kwa rais Samia Suluhu Hassan.

Rais Kenyatta alisifia uhusiano mwema uliopo kati ya nchi hizo mbili,akitoa mfano wa mwanzilishi wa taifa hilo Julius Nyerere aliyekuwa tayari kuahirisha uhuru wa nchi yake hadi mataifa mengine yote ya Afrika Mashariki pia yapate uhuru.

Rais Kenyatta ambaye alikuwa ameandamana na mkuu wa utumishi wa umma Dkt.Joseph Kinyua alimtaja hayati Magufuli kuwa kiongozi mtetezi wa umoja wa Afrika na mchapa kazi ambaye aliitilia umuhimu mkubwa ukuzi wa uchumi sio tu kwa Tanzania lakini pia eneo la Afrika Mashariki na bara la Afrika kwa jumla.

Spika wa bunge la taifa Justin Muturi na mwenzake wa Senate Ken Lusaka, pia walitoa rambi rambi zao kwa niaba ya bunge hizo mbili,wakisema wanasimama na Tanzania wakati huu mgumu.