Categories
Habari

Raila atoa wito kwa viongozi wanawake kuunga mkono BBI

Kinara wa chama cha ODM Raila Odinga amesema kuwa ripoti ya BBI inalenga kuwaweka wanaume na wanawake walio kwenye ulingo wa siasa katika kiwango sawa.

Raila alisema kuwa kupitia kwa ripoti hiyo, taifa hili litaweza kuafikia sheria ya thuluthi mbili katika maswala ya jinsia.

Raila ambaye alikuwa akiwahutubia viongozi wa wanawake wa mashinani katika kaunti ya Nairobi, alitoa wito kwao kupigia debe ripoti hiyo kwa vile watanufaika pakubwa iwapo itaungwa mkono na kuidhinishwa na wakenya.

Kwa mara nyingine alishtumu kampeini tata zinazolenga kuhujumu mchakato huo huku akitoa wito kwa viongozi wa kike kuiunga mkono.

Alikashifu matamshi yanayohusishwa na upande unaomuunga mkono naibu wa Rais  William Ruto ambao unadai kuwa mchakato wa  BBI si swala muhimu kwa sasa.

Kwa mujibu wa Raila, naibu wa rais na washirika wake hawaambii wakenya ukweli.

Alisisitiza kuwa ripoti ya BBI ndio zawadi bora  ambayo yeye na rais  Uhuru Kenyatta wanaweza kukabidhi kwa kizazi kijacho.

Categories
Habari

Rais Kenyatta apuuzilia mbali wazo la uongozi wa urithi

Rais Uhuru Kenyatta amesema kuwa uongozi wa nchi hii sio wa kurithi wala uliotengewa jamii mbili pekee.

Rais aliyehudhuria mazishi ya Mama Hannah Mudavadi katika kaunti ya Vihiga, alisema kwa vile Kenya ni nchi ya demokrasia ambapo viongozi huchaguliwa kupitia uchaguzi wa kiushindani, hakuna yeyote anayeweza kudai kuwa kiongozi wa nchi hii bila kutafuta jukumu hilo kutoka kwa wakenya.

Akihimiza heshima kwa viongozi, Rais Kenyatta alipuuzilia mbali wazo la uongozi wa urithi akisema kuwa ukitekelezwa basi jamii ambazo zimetoa marais kufikia sasa zinafaa kuziruhusu nyingine kutwaa urais.

Rais alisema kuwa alimtafuta kiongozi wa upinzani Raila Odinga baada ya uchaguzi mkuu wa mwaka 2017 ili kusaidia kuleta umoja na amani nchini kufuatia suitafahamu iliyofuatia uchaguzi huo.

Alisema kuwa mpango wa maridhiano-BBI, ulitokana na mashauriano baina yake na Odinga, yaliyonuiwa kuhakikisha amani na uthabiti wa kudumu nchini.

Rais Kenyatta aliwakumbusha viongozi kwamba anathibiti serikali yake na hahitaji mihadhara kutoka yeyote kuhusu jinsi anavyofaa kuongoza.

Rais alimwomboleza marehemu Mama Hannah Mudavadi kuwa mama aliyelea familia yake vyema na kuwatunza watu wote sawia na watoto wake.

Alisema kuwa kifo cha mama ndio wakati mgumu zaidi katika maisha ya mtu yeyote.

Categories
Habari

Wanaopinga BBI watahadharishwa dhidi ya kueneza propaganda

Waziri wa kilimo Peter Munya amewatahadharisha wale wanaopinga ripoti ya jopo la maridhiano- BBI, dhidi ya kueneza propaganda kuhusu yaliyomo kwenye ripoti hiyo.

Akitetea rekodi ya maendelo ya rais Uhuru Kenyatta, Munya alisema wakosoaji wa ripoti hiyo wanawapotosha Wakenya kuhusu ripoti hiyo kwa maslahi yao ya kibinafsi.

Munya aliyekuwa akiongea kwenye viwanja vya Ruring’u na Gichira katika kaunti ya Nyeri alipuuzilia mbali madai ya kiranja wa bunge la seneti, Irungu Kang’ata kwamba ripoti hiyo haiungwi mkono katika eneo la katikati ya nchi.

“Ripoti hiyo inapendekeza nyongeza ya mgao wa pesa kwa kaunti kutoka asilimia 15 hadi asilimia 35 ambazo zitawafaidi Wakenya. Je mbona ripoti hii isiwe nzuri kwa kuafikia maendeleo katika maeneo ya mashinani?,” aliuliza Munya.

Alisema mapendekezo ya ripoti hiyo yanaweza kutatua suala la ghasia za baada ya uchaguzi bali na kuhakikisha usawa wa uakilishi na ugavi mapato.

Waziri huyo alitilia shaka utafiti wa kiranja wa bunge la Seneti Irungu Kang’ata iliyoonyesha ripoti ya BBi haiungwi mkono katika eneo la Mlima Kenya.

“Nyinyi mliulizwa?” aliuliza umati.

Alisema wale wanaokosoa ripoti hiyo wanatumia mitandao ya kijamii kudhalalisha rekodi ya maendeleo ya rais Uhuru Kenyatta katika eneo la katikati ya nchi.

“Tunajuwa kuna wanablogu ambao wamelipwa kuandika mambo mabaya kuhusu Rais. Tunawafahamu na mahali wanapohudumia,” alifichua Munya.

Categories
Habari

Wauguzi wamsihi Rais Kenyatta kusuluhisha mzozo katika sekta ya afya

Maafisa wa chama cha kitaifa cha wauguzi sasa wanamtaka rais Uhuru Kenyatta kuingilia kati kukomosha mzozo unaokumba sekta ya afya.

Katibu mkuu wa chama cha kitaifa cha wauguzi, Seth Panyako amesema mazungumzo yaliyonuiwa kumaliza mgomo wa wauguzi wa mwezi mmoja yanahujumiwa na maafisa wa serikali ya taifa na zile za kaunti.

Panyako alisema magavana wamekataa kutia saini mkataba wa makubaliano ya kurejea kazini.

“Baraza la Magavana limekataa kutia saini utaratibu wa kurejea kazini likidai halikushauriwa. Huo ni uwongo mtupu. Baraza hilo liliwakilishwa wakati wote wa majadiliano.” Alifoka Panyako.

Akizungumza na wanahabari Ijumaa, Panyako alipuzilia mbali madai kwamba serikali za kaunti hazina fedha za kufadhili utaraibu wa kurejea kazini.

“Serikali ya kitaifa imekubali kufadhili mpango wa kurejea kazini. Swala eti serikali za kaunti hazina fedha ni potovu,”  alisema katibu huyo mkuu.

Chama hicho kinasema wanachama wake wameamua kusimama kidete na kuendelea na mgomo hadi makubaliano yatakapoafikiwa.

Wauguzi hao humu nchini wamegoma kwa siku 32 sasa.

Categories
Habari

Rais Kenyatta aratibisha ajenda 4 katika baraza la Usalama la Umoja wa Mataifa

Rais Uhuru Kenyatta ameratibisha ajenda nne ambazo Kenya itapigia debe baada ya kuchukua wadhifa wake kama mwanachama asiye wa kudumu wa Baraza la Usalama la Umoja wa Mataifa.

Rais alitaja ushirikishaji wa wadau wanaohusika na mikasa na uungwaji mkono Baraza la usalama na mashirika mengine ya Umoja wa Mataifa kuimarisha asasi za mataifa kukabiliana na mizozo kama baadhi ya ajenda Kenya itakayounga mkono.

Akiongea Jumatano usiku wakati wa kikao cha mitandaoni cha Baraza la Usalama la Umoja wa Mataifa kuhusu changamoto za kudumisha amani, Rais Kenyatta alisema Kenya pia itaunga mkono juhudi za kushirikisha bara Afrika na mataifa ya Kusini katika mfumo wa uongozi ulimwenguni bali na kuhakikisha janga la Covid-19 halitahatarisha usalama.

Rais Kenyatta alisema ikiwa mataifa yasiyo na uwezo hayatapata chanjo dhidi ya ugonjwa huo, changamoto zao za kiuchumi huenda zikageuka kuwa masuala ya kisiasa na usalama.

Alisema utoaji chanjo hiyo kwa wote na kwa bei nafuu itakuwa njia moja ya kuwekeza katika amani.

Kushiriki kwa Rais Kenyatta kwenye mkutano huo kumejiri baada ya Kenya kuchukua wadhifa wake kwenye Baraza hilo siku ya jumatatu ambapo itahudumu kwa miaka miwili.

Categories
Habari

Rais Kenyatta awataka wakenya kuwa na mtazamo mpya mwaka 2021

Rais  Uhuru Kenyatta ametaja mwaka wa  2021 kuwa mwaka wa kujenga upya huku akitoa wito kwa wakenya kuweka kando masaibu na mikatale ya mwaka wa 2020.

Katika hotuba yake ya mwaka mpya, rais alitoa wito kwa wakenya kubadili mitazamo yao na kuzingatia mwoyo wa kujenga upya na matumaini ili kuwepo kwa ukuaji katika mwaka ujao.

“Tutaibuka washindi dhidi ya changamoto tulizokumbana nazo mwaka 2020 na tutaanza upya mwaka 2021, ninaamini tutakuwa na fursa nyingi zisizo kipimo,” alisema rais.

Alisema kuwa taifa hili haliwezi kurudisha hasara zilizopatikana na lakini linaweza kujijenga upya na kurejesha walivyokuwa navyo kabla ya kuzuka kwa virusi vya corona.

Alitoa wito kwa wakenya kuja pamoja ili kugeuza changamoto kuwa fursa za ufanisi.

Rais alimshukuru kila mmoja ambaye ametekeleza jukumu muhimu katika kukabiliana na janga la  Covid 19 nchini.

Wakati huo huo, Rais alisisitiza kuwa wanafunzi wote wanatarajiwa kurejea shuleni tarehe 4 mwezi Januari mwakani.

“Tarehe 4 mwezi Januari mwaka 2021, wanafunzi wote watarejea shuleni. Ningependa kuwahakikishia wazazi, wanafunzi na walezi kwamba serikali yangu itafanya kila iwezalo kuona kuwa afya na usalama wao unazingatiwa kikamilifu,” aliongeza Rais.

Categories
Habari

Marehemu Evan Gicheru amiminiwa sifa sufufu

Rais Uhuru Kenyatta amemsifu aliyekuwa jaji mkuu marehemu Evan Gicheru kuwa zawadi kutoka kwa mwenyezi Mungu, mtu aliyeamini katika uzingatiaji sheria na ambaye alihakikisha uhuru wa idara ya mahakama.

Kwenye hotuba yake iliyosomwa na mwanasheria mkuu, Kihara Kariuki kwenye ibada ya wafu, rais alimpongeza marehemu Gicheru kwa kupambana na ufisadi katika idara ya mahakama.

Akimsifu marehemu Gicheru, Jaji mkuu David Maraga alisema atakumbukwa milele kwa kuleta uhuru katika huduma ya idara ya mahakama humu nchini.

“Hakuchoka kupigania uzingatiaji sheria na katika kulinda uhuru wa idara ya mahakama. Atakumbukwa kwa maamuzi aliyofanya, mageuzi aliyofanya na wale aliowakuza,” alisema Maraga.

Maraga alidokeza kuwa ni wakati wa himaya ya Gicheru ambapo alichaguliwa jaji wa mahakama kuu.

“Alinipatia jukumu langu la kwanza katika wadhifa huo mpya, alitekeleza wajibu wake kwa kujitolea,” aliongeza Maraga.

Aliyekuwa mwanasheria mkuu, Seneta Amos Wako, kwa upande wake  alimkumbuka rafikiye wa muda mrefu,akisema alikuwa katika mstari wa mbele kuhakikisha uhuru wa idara ya mahakama.

Ibada ya wafu ya marehemu Gicheru iliandaliwa Alhamisi asubuhi  katika kanisa la St. Francis Karen jijini Nairobi.

Jaji huyo mstaafu aliaga dunia Ijuma iliyopita akiwa na umri wa miaka 79 baada ya kuugua.

Justice Gicheru alihudumu wadhifa wa jaji mkuu kati ya mwaka 2003 na 2011 na kuwa jaji mkuu aliyehudumu kwa muda mrefu zaidi hapa nchini.

Categories
Habari

Rais Kenyatta amwomboleza jaji mstaafu marehemu Evans Gicheru

Rais Uhuru Kenyatta ametuma risala za rambi rambi kwa familia, jamaa na marafiki wa Jaji mkuu mstaafu Evans Gicheru aliyefariki Jumamosi asubuhi.

Kiongozi wa taifa alisema nchi hii imempoteza kiongozi ambaye mchango wake katika ukuaji wa idara ya sheria hususan uhuru wa mahakama umeendelea kuimarisha demokrasia ya taifa hili.

“Ni huzuni tumempoteza mmoja wa magwiji wa sheria hapa nchini. Jaji Gicheru alifanya kazi bila kuchoka alipokuwa katika himaya ya idara ya mahakama, kuhakikisha demokrasia ya taifa hili inaafikiwa”, alisema rais.

Rais alidokeza kuwa mageuzi makuu yaliyofanywa katika idara ya mahakama na jaji Gicheru, yameendelea kuwa chanzo cha matumaini kwa wakenya wengi kuwa sote tuko sawa chini ya sheria.

“Kama taifa tunafurahia mageuzi katika idara ya mahakama yaliyoshinikizwa na jaji Gicheru kupitia uongozi wake katika idara hiyo. Atakukumbwa kwa kukabiliana na ufisadi na hali ya kutojali sheria katika idara ya mahakama” aliongeza rais Kenyatta.

Rais Kenyatta alimwomba Mungu kuifariji familia ya marehemu jaji Gicheru wakati huu mgumu wa maombolezi.

Kwa upande wake naibu wa Rais Dkt William Ruto alimtaja marehemu jaji Gicheru kuwa mfanyikazi aliyejitolea kuhakikisha mageuzi katika idara ya mahakama.

Kiongozi wa chama cha ODM Raila Odinga alimwomboleza Gicheru kama mtu ambaye alijukumiwa kurejesha uzingatiaji wa sheria nchini baada ya mpito wa mwaka 2002.

Categories
Habari

Rais Kenyatta atoa wito kwa kituo cha CDC kuhakikisha mikutano salama ya AU

Rais Uhuru Kenyatta amehimiza kituo cha bara Afrika kuhusu kinga na udhibiti wa magonjwa (Africa CDC), kuandaa kanuni zilizowianishwa za kuzuia kuenea kwa ugonjwa wa Covid-19, ambazo zitahakikisha washiriki wote wako salama wakati wa kongamano la muungano wa Afrika lililopangiwa kufanywa mwezi februari mwaka ujao.

Rais Kenyatta alieleza kwamba kanuni hizo ndizo zitakazo-amua iwapo mikutano ya muungano wa Afrika (AU), inafanyika moja kwa moja au kwa njia za video kwa kutilia maanani changamoto zilizoletwa na janga la Covid-19.

Rais Kenyatta alikuwa akiongea alhamisi jioni wakati wa mkutano wa njia za mitandaoni wa kongamano la viongozi wan chi na seriokali wanachama wa muungano wa Afrika (AU), na pia wenyeviti wa jumuiya za kiuchumi katika kandaa hii (RECs).

Mkutano huo uliandalwia na Rais Cyril Ramaphosa wa Afrika kusini, ambaye pia ni mwenyekiti wa muungano wa Afrika (AU), kujadili taratibu za maandalizi ya kikao cha 34 cha kawaida cha kongamano  la muungano wa AU, kikao cha 38 cha kawaida cha baraza kuu na pia kikao cha cha kawaida cha kamati ya mabalozi wa Muungano wa Afrika (AU).

Ma-Rais Abdel Fattah al-Sisi wa Misri, Felix Tshisekedi wa Jamhuri ya Ki-demokrasia ya Congo DRC, Filipe Nyusi wa Musumbiji, Paul Kagame wa Rwanda na pia Nana Akufor-Addo wa Ghana walihudhuria mkutano huo wa njia za mitandao.

Wakati wa mkutano huo, mweneykiti wa tume ya muungano wa Afrika -(AUC), Moussa Faki Mahamat alitoa ratiba ya kamili ya mikutano ya Muungano wa (AU), iliyopangiwa kufanywa mwaka ujao ambapo pia viongiozi wapya wa tume ya muungano wa Afrika -(AUC),  watachaguliwa.

Categories
Habari

Baraza la mawaziri laenda likizo ya krismasi

Baraza la mawaziri litaenda likizoni kuanzia Jumanne tarehe 22 mwezi huu hadi Jumapili tarehe 3 mwezi Januari mwakani.

Kwa mujibu wa arifa kwenye gazeti rasmi la serikali ratiba ya shughuli za rais itaendelea kama kawaida, ilhali kalenda ya baraza la kitaifa la usalama na kamati ya ushauri kuhusu usalama wa kitaifa pia itaendelea kama ilivyoratibiwa.

Kamati za baraza la mawaziri hazitakuwa na shughuli zozote isipokuwa tu kama atakavyoagiza Rais endapo kuna masuala ya dharura ama yenye umuhimu wa kitaifa.

Likizo hii ya mwisho wa mwaka inanuiwa kuwapa mawaziri mapumziko kutoka kwa mikutano ya kila wiki ya kamati za baraza la mawaziri na fursa ya kusherehekea siku kuu na familia zao kabla ya kurejelea mwaka mpya ambao utakuwa na shughuli nyingi.