Categories
Michezo

Tanzania yasajili ushindi wa kwanza CHAN na kuitimua Namibia

Taifa Stars ya Tanzania ilisajili ushindi wa kwanza katika michuano ya CHAN inayoendelea baada ya kuwaangusha Namibia goli 1-0 katika mechi ya kundi D iliyochezwa Jumamosi usiku katika uwanja wa Limbe.

Farid Mussa ambaye pia alitawazwa mchezaji bora alifunga bao hilo katika dakika ya 65 alitumia makosa ya mabeki wa Namibia walioshindwa kuondosha mpira katika lango lao na kufyatua mkwaju ulimwacha hoi kipa wa Namibia Kamaijanda Ndisiro.

Namibia maarufu kama Brave warriors walijaribu kwa udi na uvumba kurejesha bao hilo bila mafanikio huku kipa wa Taifa Stars Aishi Manula akipangua mikwaju mingi ya Wanamibia.

Matokeo hayo yanafufua matumaini ya Tanzania kufuzu kwa robo fainali wakihitaji ushindi dhidi ya Guinea Jumatano ijayo ili kufuzu kwa robo fainali.

Katika mechi ya awalia ya kundi hilo Jumamosi jioni Zambia walihitaji bao la dakika ya 87 ili kujinusuru na kulazimisha sare ya 1-1 dhidi ya Guinea na kuacha kundi hilo wazi kwa nafasi ya kutinga robo fainali.

Victor Kantabadouno aliwaweka Guinea kifua  mbele kwa bao la dakika ya 58  kabla ya Spencer Sautu kusawazishia Zambia dakika ya 87.

Mechi za Kundi A zinakamilika Jumapili usiku Mali wakichuana Zimbabwe nao  Burkinafasso wapimane nguvu na  wenyeji Cameroon .

Mechi hizo zitabaini timu mbili zitakazofuzu kwa robo fainali ya Jumamosi na Jumapili ijayo.

Categories
Burudani

Sukari, Zuchu

Zuchu mwanamuziki anayeangaziwa zaidi katika kampuni ya WCB nchini Tanzania ana kibao kipya kwa jina “Sukari” ambacho alikiachia rasmi kwenye You Tube tarehe 20 mwezi Januari mwaka 2021.

Wimbo huo ulikuwa umesubiriwa kwa hamu na ghamu kutokana na namna alikuwa amefanya matayarisho ya ujio wake kwenye mitandao ya kijamii hasa Instagram.

Alitafuta usaidizi wa watu kadhaa maarufu nchini Tanzania ambao wana umuhimu kwenye jamii kwa jumla ambao walirekodi video fupi kuhusu wasifu wao na mwisho wote wanamalizia kujirejelea kama sukari.

Mamake mzazi ambaye pia ni msanii kwa jina Khadija Omar Kopa ni kati ya waliosaidia kutangaza ujio wa kibao hicho cha Sukari. Kwenye video yake, Khadija anasifia burudani yake ambayo anasema ikosekanapo watu hutaharuki na watu huwa tayari kuigharamia wakati wowote. Onyesho zuri la usaidizi wa mama kwa mwanawe hasa katika kuendeleza talanta.

Mwingine kati ya watu hao mashuhuri ni muigizaji Wema Sepetu ambaye alisema kwamba urembo wake ndio ulimjengea jukwaa analosimamia kwa sasa tangu mwaka 2006 baada ya kushinda shindano la ulimbwende wakati huo na kutawazwa “Miss Tanzania”.

Aligusia pia kipaji chake cha uigizaji ambacho anasema ni cha hali ya juu zaidi na kwamba yeye ni sukari.

Kabla ya kuachilia kibao hicho, Zuchu naye alitoa video akisema kwamba anaamini kila mwanadamu ana umuhimu wake katika jamii. Umuhimu huo ndio anafananisha na ladha ya sukari huku akijirejelea kama sukari ya Zanzibar alikozaliwa.

Zuchu alikwenda kuhojiwa katika kituo cha redio cha Wasafi Fm katika kipindi cha jioni kwa jina Mgahawa ambapo alionyesha waliokuwepo jinsi ya kuuchezea wimbo huo.

Ikumbukwe kwamba alipoingia WCB alimhusisha mkubwa wake Diamond kwenye nyimbo kadhaa ambazo zilisababisha minong’ono kwamba wana uhusiano wa kimapenzi.

Walikuwa wakiandamana kwenye maonyesho kadhaa lakini zamu hii Zuchu alikuwa peke yake alipokwenda kuhojiwa. Alisema Diamond alimpa ahadi ya kumshika mkono alipokuwa akianza lakini pia alimwambia kwamba kuna wakati atamwachilia afanye kazi peke yake.

Kama ilivyo mazoea nchini Tanzania, wengi wamerekodi video wakichezea wimbo huo mpya wa Zuchu kwa jina sukari na amechapisha hizo video kwenye akaunti yake ya Instagram.

Categories
Michezo

Guinea na Zambia watema cheche za moto kombe la CHAN

Syli Nationale ya Guinea na Chipolopolo ya Zambia walisajili ushindi mkubwa katika mechi za kundi D kuwania kombe la CHAN Jumanne usiku katika uwanja wa Reunification nchini Cameroon.

Guinea waliisasambua Brave Warriors ya Namibia magoli 3-0 Yakhouba Gnagna Barry mshambulizi wa klabu ya AC Horoya  akipachika bao la kwanza kunako dakika ya 13  kufuatia makosa ya kutoelewana kati ya kipa wa Namibia Edward Maova na difenda  Immanuel Heita aliyetoa  pasi hafifu ya nyuma.

Morlaye Sylla aliongeza bao la pili kwa Guinea katika dakika ya mwisho ya mazidadi kipindi cha kwanza ,huku Guinea wakienda mapumziko kwa uongozi wa 2-0.

Kipindi cha pili Guinea waliongeza mashambulizi wakati wenzao Namibia wakionekana kupotea katika mechi na kulazimika kujihami katika mlango wao .

Hata hivyo katika dakika ya 86  Yakhouba Gnagna Barry alipiga tobwe lililomzidia kasi kipa na kupiga bao lake na pili linalomfanya kuwa mfungaji bora kufikia sasa .

Guinea watarejea uwanjani Jumamosi dhidi Zambia nao Tanzania wapimane nguvu na Tanzania.

Awali katika kundi hilo Tanzania waliangushwa mabao 2-0 na Zambia  Collins Sikombe na Emmanuel Chabula wakipachika bao moja kila mmoja katika kipindi cha pili.

Tanzania walicheza vizuri kipindi cah kwanza lakini wakalemewa kunako kipindi cha pili ingawa kipa Aishi Manula aliwaepushia fedheha zaidi kwa kupangua mikwaju kadhaa.

Categories
Burudani

Steve Nyerere akumbuka wema wa Mr. Nice

Jamaa mmoja nchini Tanzania kwa jina Steve Nyerere ambaye ni mchekeshaji amemkumbuka mwanamuziki wa nchi ya Tanzania Mr. Nice kwa mema aliyomtendea.

Kulingana na Nyerere, yeye na wengine walikuwa walinzi wa Mr. Nice wakati alikuwa maarufu sana na muziki ulikuwa ukimlipa vizuri.

Nyerere anakumbuka kwamba yeye na wenzake walikuwa wakipigwa kila mara walipokuwa wakimpeleka mkubwa wao kwenye matukio mbali mbali.

Anakumbuka wakati mmoja yeye na rafiki yake Ray Kigosi walikuwa na njaa na hawakuwa na la kufanya. Wakahimizana waende nyumbani kwa Mr. Nice kutafuta usaidizi.

Anasema walibisha lango kuu wa muda bila jibu ndiposa wakaamua kuruka ua wa ukuta na kuingia ndani ambapo walimpata Mr. Nice amelala wakamwamsha.

Jambo la kwanza alitaka kujua toka kwao ni jinsi waliingia humo, wakawa wakweli wakasema waliruka ua. Akaita mlinzi kudhibitisha hayo akapata ni kweli.

Baada ya hapo aliwapa sikio ili kujua kilichowaleta kwake na wakamwambia walikuwa wanahisi njaa na hawakuwa na pesa za kununua chakula.

Hawakuamini macho yao pale ambapo Mr. Nice aliwapa kadi yake ya benki, namba za siri na akawaamrisha wakajitolee milioni moja tu pesa za Tanzania kasha wairudishe.

Steve Nyerere anasema waliimba nyimbo za Mr. Nice mwendo wote na kurudi. Anamshukuru mwanamuziki huyo ambaye sikuhizi anasuasua katika kazi yake ya muziki na kumwombea Baraka kwa mwenyezi Mungu.

Mr. Nice ni mmoja kati ya wanamuziki walioanzisha mtindo wa kizazi kipya nchini Tanzania kwa jina Bongo Fleva.

Anasemekana kupata pesa nyingi wakati huo ambazo wengi wanasema hakuwekeza ila katumia vibaya.

Categories
Burudani

Ushauri wa Professor Jay

Mwanamuziki wa muda mrefu nchini Tanzania ambaye pia ni mwanasiasa Professor Jay kwa jina halisi Joseph Haule ametoa ushauri kwa wanamuziki nchini Tanzania.

Ushauri huo aliupa mada ya “Shule ya Bure” kasha akaandika “Sio lazima kila siku uimbe matusi na mambo ya kitandani ili wimbo wako uwe mkubwa na upendwe, bali unaweza kuimba wimbo wenye mafunzo mema kwa jamii na wadau wakakushika mkono kwa kiwango cha juu kabisa. Kwa pamoja tunaweza kuokoa kizazi hiki.”

Jay anaonekana kukwama kwenye maadili yaliyokuwepo kwenye fani ya muziki tangu wakati walianza muziki.

Bidii yake ya kutafuta kurejesha maadili inaonekana kushabihiana na ile ya mashirika mbali mbali ya serikali nchini Tanzania kama vile BASATA.

Maajuzi Professor Jay amerejelea muziki baada ya mapumziko ya zaidi ya miaka mitano wakati akihudumu kama mbunge wa eneo la Mikumi.

Wimbo wake na Stamina kwa jina Baba unaendelea kufanya vyema kwenye mitandao ya kijamii.

Unagusia uhusiano kati ya mvulana na babake na maadili kwa jumla. Mvulana huyo anamkosea babake heshima kwa sababu ya ufukara na baadaye babake anamfichulia kwamba yeye sio babake mzazi ila ni baba mlezi.

Muda mfupi baada ya uzinduzi wa wimbo huo, ndipo habari zilichipuza kuhusu baba mzazi wa mwanamuziki Diamond Platnumz na wengi wanashangaa ikiwa Jay na Stamina walikuwa na habari kuhusu hilo.

Categories
Burudani

Rayvanny kuzindua albamu

Msanii wa Bongo Fleva Raymond Shaban Mwakyusa almaarufu Rayvanny ama ukipenda vanny Boy ametangaza kwamba ataachilia albamu yake ya kwanza hivi karibuni.

Vanny ambaye anafanya kazi ya muziki chini ya kampuni ya Diamond Platnumz Wasafi Classic Baby – WCB alianza muziki mwaka 2011 akiwa shule ya upili lakini hajawahi kuzindua albamu.

Alijiunga na WCB rasmi mwaka 2015 na mwaka 2016 akaachilia kibao “Kwetu” ambacho kilivuma sana Afrika mashariki.

Mwezi wa pili mwaka 2020 Rayvanny alizindua EP yake kwa jina “Flowers” ambayo ilifanya vyema kwenye mitandao ya kijamii.

EP au ukipenda ‘Extended Play’ ni mkusanyiko wa nyimbo ambazo hazitoshi kuitwa albamu. Mwanamuziki huyo ameteuliwa kuwania na kushinda tuzo kadhaa.

Ni kati ya wanamuziki wanaofanya vizuri katika WCB na mkubwa wake Diamond aliwahi kufichua kwamba alikuwa akijenga studio zake za muziki isijulikane kama atagura WCB alivyofanya Harmonize.

Diamond alisifia sana studio hizo akisema kwamba zikikamilika zitakuwa bora zaidi Afrika mashariki.

Rayvanny amejulikanisha ujio wa albamu hiyo kwa jina “Sound From Africa” kupitia picha na video ambazo amekuwa akiweka kwenye mtandao wa Instagram lakini hajatangaza tarehe rasmi ya kuiachilia.

Categories
Burudani

Maggy Bushiri arejea Tanzania

Mwanamuziki Maggy Bushiri amerejea nchini Tanzania kutoka Marekani anakoishi kwa ajili ya kuzindua nyimbo kadhaa.

Alikuwa ameandamana na mpenzi wake kwa jina Martin Classic ambaye pia ni mwanamuziki na wameshirikiana katika nyimbo kadhaa. Wawili hao waliwasili wakiwa wamevalia barakoa nyeusi ila walizivua mara tu walipolakiwa na wenyeji wao.

Barakoa hazitumiki nchini Tanzania hasa baada ya serikali nchini humo kutangaza mwaka jana kwamba ugonjwa wa Covid 19 ulikuwa umeisha humo.

Maggy Bushiri ni mzaliwa wa Congo, ila alilelewa nchini Tanzania kwa muda kidogo na baadaye yeye, ndugu zake na mamake wakahamia marekani kama wakimbizi.

Kulingana naye, aliondoka Tanzania akiwa na umri wa miaka miwili kuelekea Mozambique na baadaye wakaelea Marekani.

Alipohojiwa mwaka 2019 nchini Tanzania, alielezea kwamba babake aliaga dunia kabla wagure Tanzania na mamake akaaga dunia mwaka 2009 wakiwa nchini Marekani.

Kwenye mahojiano hayo pia alifichua kwamba alikuwa mwanafunzi wa chuo cha Los Angeles anakoishi na anasomea mambo ya uanahabari hasa uundaji wa vipindi.

Mwaka 2018 alihojiwa na jarida la Los Angeles kwa jina “VoyageLA” ambapo alifichua kwamba haikuwa rahisi kuingilia muziki kwani mara nyingi aliambiwa hatoshi.

Wimbo wake ambao anasema ulifanya ajulikane zaidi ni “Swing Your Body”. Wakati huo alifichua mipango yake ya siku za halafu, ile ya kufungua kampuni ya mavazi ambapo rangi kuu itakuwa Zambarau au ukipenda Purple.

Anapenda sana rangi hiyo naye hujiita “The Purple Queen” ila alipowasili Tanzania jana, hakuwa na nywele za rangi ya Zambarau kama siku za awali.

Alizungumzia pia mipango ya kurejea alikozaliwa na kuanzisha kituo kikubwa ambacho kitakuwa makazi ya kuhudumia mayatima.

Inasubiriwa sasa kuona mazuri ambayo ameletea mashabiki wake wa Tanzania mwaka huu wa 2021.

Categories
Burudani

Shosholites, Eric Omondi

Baada ya kumalizana na kipindi cha awali ambacho kilichanganya wengi kwa jina “Wife Material” muigizaji Eric Omondi amezamia kingine kwa jina “Shosholites”.

Kwenye wife material alihusisha mabinti wengi wakidhani kwamba kweli alikuwa akitafuta mke kikweli. Alichagua binti mmoja mwimbaji katika Band Beca mpaka wakafunga arusi ambayo wengine walidhania ni ya ukweli ila yote yalikuwa maigizo tu.

Kwa muda sasa, Eric omondi amekuwa akiachilia picha na video zinazoonyesha kina mama wazee ambao wanajaribu mitindo ya kisasa ambayo inachukuliwa na wengi kuwa ya wanawake wa umri mdogo kama vile kujipodoa.

Kwenye maelezo ya hizo picha na video Eric alionekana kuhimiza wafuasi wake kumtumia video za nyanya zao wakifanya mambo yasiyo ya kawaida kwa umri wao na huenda wakajishindia hela.

Mshindi atapatiwa laki moja, atakayeibuka wa pili atajinyakulia shilingi elfu hamsini, wa tatu elfu thelathini na nambari nne atapatiwa majani chai ya mwezi mzima na kampuni ya Old Farm.

Kampuni hiyo ya Old Farm Tea ndiyo inadhamini kipindi hicho cha Eric Omondi kwa jina Shosholites ambacho kinazinduliwa leo kwenye akaunti ya Eric Omondi ya Youtube.

Kulingana naye, hili litakuwa shindano la kipekee la talanta.

Eric Omondi na wachekeshaji wengine wanaonekana kugeukia mitandao ya kijamii ili kuendeleza fani yao kutokana na masharti mengi ya kuzuia kusambaa kwa virusi vya korona.

Masharti hayo yamepiga marufuku mikutano mikubwa na ile ya usiku maanake kuna kafyuu ya saa nne usiku hadi saa kumi alfajiri.

Lakini maajuzi yeye na Mc Jessy wametumbuiza nchini Tanzania ambapo hakuna masharti makali baada ya serikali nchini humo kutangaza mwaka jana kwamba ugonjwa wa Covid 19 ulikuwa umeisha.

Categories
Burudani

Mwanamuziki wa Tanzania CPwaa aaga Dunia

Mwanamuziki wa nchi ya Tanzania CPwaa ambaye alijulikana sana kwa mitindo kama vile Hip Hop, Rap na Crunk aliaga dunia jana akipokea matibabu katika hospitali ya Muhimbili Jijini Daresalaam.

CPwaa ambaye jina lake halisi ni Ilunga Khalifa anasemekana kuugua ugonjwa wa homa ya mapafu kwa muda.

Mwili wake tayari umezikwa nyumbani kwao katika eneo la Magomeni kulingana na tamaduni za dini ya kiisilamu.

Binamu yake Murad Omar Khamis aliyehojiwa alifichua kwamba Cpwaa amekuwa akiumwa kwa muda wa wiki mbili lakini akazidiwa jumatano na wakamkimbiza hospitali ambapo alilazwa kwenye chumba cha wagonjwa walio hali mahututi.

Alikata roho alfajiri jumapili tarehe 17 mwezi huu wa Januari mwaka 2021.

Wasanii wengi wa Bongo, akiwemo Ali Kiba na TID walifika nyumbani kwa mamake Cpwaa huko Magomeni kwa ajili ya kuifariji familia.

Cpwaa alikuwa akiimba kwenye kundi linalofahamika kama “Park lane” na lilikuwa la watu wawili, yeye na msanii Suma Lee.

Wakiwa pamoja walirekodi na kuzindua vibao kama vile Nafasi nyingine na Aisha lakini kundi hilo baadaye lilisambaratika.

Wasanii wengi na watu maarufu nchini Tanzania walimwomboleza kwenye mitandao ya kijamii kama vile mtayarishaji muziki kwa jina S2kizzy kwenye Instagram. Aliweka picha ya marehemu Cpwaa na kuandika, “RIP big brother Cpwaa. Gone too soon.”

Categories
Burudani

Shilole afurahia matokeo mazuri ya binti yake

Kila mzazi huridhika mtoto wake anapofanya vizuri kwenye mitihani shuleni kwani huwa wanawekeza hela nyingi katika elimu yao na mwanamuziki na mjasiriamali wa Tanzania Zena Yusuf Mohamed maarufu kama Shilole anapitia kipindi hicho.

Matokeo ya mtihani wa kidato cha nne yalitangazwa maajuzi nchini Tanzania na jana Shishi Baby alikuwa mwingi wa furaha huku akimsherehekea binti yake mkubwa.

Msichana huyo kwa jina Joyce, alipata Division 1 ya alama 16 na Shilole anasema kupitia Instagram kwamba aliambiwa kwamba hivyo binti yake amepita.

Anaanza kwa kumshukuru Mungu na kuelezea furaha yake kisha anelezea jinsi hakupata nafasi ya kusoma na akaapa kuelekeza juhudi kwa binti zake ili wawe yule mwanamke ambaye alitazamia kuwa awali lakini hakuweza.

Anasema pia kwamba kuzaliwa na malezi ya mwanake Joyce yalikuwa magumu ila sasa mambo yamebadilika.

Shishi ambaye anamiliki mkahawa kwa jina “Shishi Foods” anakumbuka pia wanafunzi, waalimu na wafanyikazi katika shule ya mtakatifu Christina huko tanga alikokuwa akisoma binti yake.

Aliowakumbuka pia ni wateja wa Shishi food na mashabiki wake wa muziki.

Baadaye pia alisherehekea matokeo ya binti yake wa pili ya kidato cha pili. Rahma naye alipata Division 1 ya alama 12. Shilole anaonelea kwamba angepata nafasi ya kusoma angekuwa anapita kama binti zake hivi sasa.