Categories
Habari

Spika Mutura aapishwa kama Kaimu Gavana wa Kaunti ya Nairobi

Spika wa Bunge la Kaunti ya Nairobi Benson Mutura ameapishwa kuwa Kaimu Gavana wa kaunti hiyo.

Mutura amechukua nafasi ya Mike Sonko ambaye aliondolewa mamlakani kwa misingi ya kutumia vibaya mamlaka na kukiuka katiba.

Mbunge huyo wa zamani wa Makadara atahudumu kwa siku sitini kabla ya Tume Huru ya Uchaguzi na Mipaka, IEBC, kuandaa uchaguzi mdogo wa kumchagua gavana mpya.

Shughuli ya kuapishwa kwake imeongozwa na Jaji Jairus Ngaah katika Makao Makuu ya kaunti hiyo.

Katika hotuba yake baada ya kuapishwa, Mutura amesema kuwa atafanya kila juhudi kulainisha maswala mbalimbali katika kaunti ya Nairobi na kudhihirisha uongozi ambao umekuwa ukikosekana tangu uchaguzi mkuu wa mwaka wa 2017.

Mutura amesema kuwa anachukua usukani katika kaunti ambayo haina pesa kutokana na utata kuhusiana na kupitishwa kwa bajeti, huku akiongeza kuwa hakuna pesa za kulipa mishahara na bima ya matibabu.

Ametoa wito kwa maafisa wakuu katika kaunti hiyo kumsaidia anapojaribu kurekebisha maswala mbali mbali katika kaunti hiyo kwa siku sitini ambazo amepewa kuhudumu katika wadhifa wa Kaimu Gavana.

Categories
Habari

Bunge la Seneti lakumbwa na mgawanyiko huku Maseneta wakitarajiwa kujadili hatma ya Sonko

Bunge la Seneti litaandaa kikao maalum Jumatano adhuhuri ili kuamua mfumo utakaotumika kushughulikia hoja ya kubanduliwa mamlakani kwa Gavana wa Kaunti ya Nairobi Mike Mbuvi Sonko.

Hoja ya kubanduliwa kwa Gavana Sonko imesababisha hisia mseto miongoni mwa wanasiasa huku wanaomuunga mkono Sonko wakiitaja hoja hiyo kuwa mchezo wa kisiasa.

Kwa upande wao wale wanaounga mkono hoja hiyo wakiwemo wanachama wa Bunge la Kaunti ya Nairobi walioidhinisha kubanduliwa kwa Sonko wameshikilia kwamba utaratibu ufaao ulifuatwa na wana imani kwamba Maseneta hawatamuokoa.

Migawanyiko ilianza masaa machache baada ya Bunge la Kaunti ya Nairobi kupitisha hoja ya kuondolewa kwa Sonko, pale Seneta Kipchumba Murkomen na mwenzake Mutula Kilonzo Junior walipojibizana kwa kuhitilafiana katika mitandao ya kijamii.

Bunge la Kaunti ya Nairobi lilipitisha hoja ya kumuondoa Sonko kutoka kwa wadhifa wa Gavana siku ya Alhamisi wiki iliyopita baada ya wanachama 88 kupiga kura ya kuunga mkono hoja hiyo.

Hoja hiyo iliwasilishwa na Kiongozi wa Wachache wa bunge hilo Michael Ogada, kwa madai ya matumizi mabaya ya mamlaka, utovu wa nidhamu na ukosefu wa uwezo wa kimwili na kiakili wa kuendesha shughuli za kaunti hiyo.

Aidha, Sonko anashtumiwa kwa kudinda kuidhinisha fedha zilizotengewa Shirika la Huduma za Jiji la Nairobi, NMS.

Kulingana na Seneta wa Kaunti ya Kilifi Stewart Madzayo, hatua ya kumbandua Sonko ni kinyume cha agizo la mahakama na hoja hiyo haikupaswa kujadiliwa.

Licha ya kukiri kwamba madai dhidi ya Sonko huenda yakawa ya ukweli, Seneta Madzayo, amaye ni Jaji mstaafu, amehoji kwamba mchakato huo ni kinyume cha sheria kwani swala hilo tayari liko mahakamani.

Wanachama 59 wa Bunge la Nairobi walio katika upande wa Sonko na ambao walikuwa pamoja na Gavana huyo katika Kaunti ya Kwale siku ya kujadiliwa kwa hoja hiyo wanadai kwamba wafanyikazi wa bunge hilo waliwapigia kura kinyume cha sheria.

Categories
Habari

Viongozi wa vijana Nairobi waapa kuandamana wakipinga kubanduliwa mamlakani kwa Sonko

Baadhi ya vijana wa Kaunti ya Nairobi wameshtumu vikali hatua ya kubanduliwa mamlakani kwa Gavana Mike Mbuvi Sonko.

Sonko aliondolewa afisini na wanachama wa Bunge la Kaunti hiyo siku ya Alhamisi kwa madai ya utumuzi mbaya wa mamlaka, utovu wa nidhamu na kukosa uwezo wa kimwili na kiakili kuendesha maswala ya Kaunti hiyo.

Kupitia kwenye mwavuli wa mashirika ya mashinani ya kutetea haki za binadamu, viongozi wa vijana wameapa kukaidi hatua ya kumbandua Sonko uongozini wakisema ilitekelezwa bila kuzingatia sheria.

Vijana hao wametangaza mpango wa kufanya maandamani hadi katika makao makuu ya kaunti hiyo na pia Bunge la Seneti wiki ijayo ili kuonyesha gadhabu yao kutokana na hatua ya kubanduliwa kwa Sonko.

Gavana huyo wa Nairobi anayekabiliwa na matatizo anatarajiwa kufika mahakamani kesho kupinga utaratibu uliotumiwa kumwondoa afisini, akisema ulikuwa na kasoro chungu nzima.

Aidha, Sonko angependa kuwataja Katibu na Spika wa Bunge la Kaunti hiyo Ben Mutura, kwa kudharau maagizo ya mahakama, waliporuhusu kujadiliwa kwa hoja ya kumwondoa mamlakani ilhali  kulikuwa na maagizo ya kusitisha utaratibu huo.

Siku ya Alhamisi, wanachama 88 wa Bunge la Kaunti ya Nairobi walipiga kura na kupitisha mswaada wa kumuondoa Sonko mamlakani.