Tag: Seneti

Categories
Habari

Seneti kufanya uchunguzi kuhusu madai ya ufisadi kwenye usajili wa KDF

Maseneta sasa wanataka kamati maalum kuhusu maswala ya usalama wa taifa, ulinzi na uhusiano wa kimataifa, kuchunguza kwa haraka madai ya utoaji wa hongo katika shughuli inayoendelea ya kuwasajili makurutu kujiunga na Vikosi vya Ulinzi nchini (KDF).

Kwenye taarifa iliyowasilishwa mbele ya Bunge la Senate na Seneta wa Kaunti ya Narok Ledama Ole Kina, maseneta hao wanadai kuwa baadhi ya maafisa wanaosimamia shughuli hiyo ya usajili wameigeuza kuwa biashara.

Maseneta hao wameitaja hali hiyo kuwa tisho kwa usalama wa taifa, na matumizi mabaya ya rasilimali za kitaifa.

Maseneta walidai kuwa maafisa hao wa usajili wanaitisha pesa nyingi za hadi shilingi laki saba, ili kuwasajili wahusika.

Wametoa wito wa kudumishwa kwa uwazi na uadilifu katika shughuli hiyo ya usajili, na hatua kali kuchukuliwa dhidi ya maafisa wafisadi wa usajili.

Wakati wa uzinduzi wa zoezi hilo tarehe 8 mwezi huu katika Makao Makuu ya Idara ya Ulinzi jijini Nairobi, Naibu Mkuu wa Vikosi vya Ulinzi Luteni Jenerali Levi Mghalu alitoa hakikisho kuwa usajili huo utakuwa wa huru na haki.

Mghalu alitoa wito kwa Wakenya kuepukana na matapeli wanaoitisha pesa kwa kudai kuwa na ushawishi katika mchakato huo.

“Wakenya wanakumbushwa kwamba kutoa hongo au vitendo vyengine vya ufisadi ni kinyume cha sheri. Yeyote atakayepatikana akitoa hongo ili apate nafasi kwenye zoezi hili la usajili atajilaumu mwenyewe. Nia yetu ni kuandaa zoezi la usajili lililo huru na haki,” alionya Mghalu.

Kumekuwa na malalamishi kutoka kwa umma kwamba zoezi hilo, linalotarajiwa kutamatika kesho Ijumaa tarehe 19 Februari, halifanyiki kwa njia huru, huku Wakenya wengi wakipoteza maelfu ya pesa kwa watu wanaodai kuwa na uwezo wa kushawishi matokeo ya usajili huo.

Categories
Kimataifa

Afueni kwa Trump baada ya Bunge la Seneti kupungukiwa na kura za kumshitaki

Bunge la Seneti la Marekani limekosa kufikisha thuluthi mbili ya kura ili kumshitaki aliyekuwa rais wa taifa hilo Donald Trump kwa kosa la kuchochea uvamizi wa majengo ya bunge ya Capitol tarehe 6 mwezi Januari.

Maseneta 57 walipiga kura ya kumshitaki Trump, wakiwemo saba wa chama cha Republican, huku 43 wakipinga hoja hiyo.

Kura hiyo ilikosa uungwaji mkono wa maseneta 10 kufikisha angalau kura 67 zilizohitajika kumshitaki Trump.

Baada ya kuondolewa  kesi hiyo, Trump alitoa taarifa akishutumu jaribio hilo, akisema ni jaribio baya zaidi la kutaka kumpata na makosa kiongozi wa taifa katika historia ya taifa hilo.

Hii ilikuwa mara ya pili ya jaribio la kumshitaki Trump.

Iwapo angeshitakiwa, basi hangeweza tena kuwania wadhifa wowote katika Bunge la taifa hilo.

Baada ya kura hiyo, seneta mwandamizi wa bunge la Seneti wa chama cha Republican Mitch MacConnel alisema Trump alichochea uvamizi wa bunge na wafuasi wake na kukitaja kitendo hicho kuwa cha fedheha na utepetevu wa majukumu.

Awali, alipiga kura kupinga kesi hiyo akiitaja kuwa ukiukaji wa katiba kwa kua sasa Trump si kiongozi wa taifa hilo.

Hata hivyo alisema bado Trump anaweza kuwajibishwa na mahakama.

Categories
Habari

Hatma ya Sonko kuamuliwa kwenye kikao cha pamoja cha Seneti

Bunge la Seneti litaandaa kikao cha pamoja ili kujadili hatma ya Gavana wa Kaunti ya Nairobi Mike Mbuvi Sonko.

Uamuzi huo umeafikiwa kwenye kikao maalum cha bunge hilo Jumatano kilichoitishwa ili kujadili kuhusu njia itakayotumika kusikiliza mashtaka dhidi ya Sonko.

Maseneta wamekosa fursa ya kupiga kura baada ya Kiongozi wa Wengi ambaye pia ni Seneta wa Kaunti ya Pokot Magharibi, Samuel Poghisio, kukosa kuwasilisha hoja ya kuundwa kwa kamati ya wanachama 11 ambayo ingechunguza madai yaliyopelekea kubanduliwa kwa Gavana huyo.

Spika Kenneth Lusaka anatarajiwa kuchapisha tarehe 17 na 18 mwezi huu kuwa siku za Seneti kujadili madai dhidi ya Sonko, na iwapo mojawapo kati ya madai hayo litaidhinishwa, basi Sonko atakuwa ameng’atuka mamlakani.

Hii ndiyo mara ya kwanza kwa wanachama wa bunge hilo kukubaliana kuandaa kikao kupitia mtandao ambapo wangepiga kura kwa njia ya kielektroniki, laiti hoja hiyo ingewasilishwa.

Spika Lusaka alikuwa tayari ametoa muongozo wa jinsi Maseneta watakavyopiga kura kupitia kwa mtandao.

Hata hivyo, wengi wa Maseneta waliozungumza wamepinga mfumo wa kupiga kura kielektroniki wakihoji kwamba teknolojia hiyo huenda ikaleta utata kwenye kura hizo iwapo mfumo huo ungekumbwa na matatizo.

Maseneta Ledama Ole Kina, Kipchumba Murkomen, Moses Wetangula na Mithika Linturi wametaka kuwe na majaribio ya kura hizo ili kutathmini uwezo na ufanisi wa mfumo huo.

Sonko aling’atuliwa kutoka wadhifa wake Alhamisi wiki iliyopita baada ya wanachama 88 wa Bunge la Kaunti ya Nairobi kuidhinisha mswaada huo uliowasilishwa na Kiongozi wa Wachache wa bunge hilo Michael Ogada.

Sonko anakabiliwa na madai ya matumizi mabaya ya mamlaka, utovu wa nidhamu, ukosefu wa uwezo wa kimwili na kiakili wa kuendesha shughuli za kaunti hiyo, miongoni mwa madai mengineyo.

Categories
Habari

Bunge la Seneti lakumbwa na mgawanyiko huku Maseneta wakitarajiwa kujadili hatma ya Sonko

Bunge la Seneti litaandaa kikao maalum Jumatano adhuhuri ili kuamua mfumo utakaotumika kushughulikia hoja ya kubanduliwa mamlakani kwa Gavana wa Kaunti ya Nairobi Mike Mbuvi Sonko.

Hoja ya kubanduliwa kwa Gavana Sonko imesababisha hisia mseto miongoni mwa wanasiasa huku wanaomuunga mkono Sonko wakiitaja hoja hiyo kuwa mchezo wa kisiasa.

Kwa upande wao wale wanaounga mkono hoja hiyo wakiwemo wanachama wa Bunge la Kaunti ya Nairobi walioidhinisha kubanduliwa kwa Sonko wameshikilia kwamba utaratibu ufaao ulifuatwa na wana imani kwamba Maseneta hawatamuokoa.

Migawanyiko ilianza masaa machache baada ya Bunge la Kaunti ya Nairobi kupitisha hoja ya kuondolewa kwa Sonko, pale Seneta Kipchumba Murkomen na mwenzake Mutula Kilonzo Junior walipojibizana kwa kuhitilafiana katika mitandao ya kijamii.

Bunge la Kaunti ya Nairobi lilipitisha hoja ya kumuondoa Sonko kutoka kwa wadhifa wa Gavana siku ya Alhamisi wiki iliyopita baada ya wanachama 88 kupiga kura ya kuunga mkono hoja hiyo.

Hoja hiyo iliwasilishwa na Kiongozi wa Wachache wa bunge hilo Michael Ogada, kwa madai ya matumizi mabaya ya mamlaka, utovu wa nidhamu na ukosefu wa uwezo wa kimwili na kiakili wa kuendesha shughuli za kaunti hiyo.

Aidha, Sonko anashtumiwa kwa kudinda kuidhinisha fedha zilizotengewa Shirika la Huduma za Jiji la Nairobi, NMS.

Kulingana na Seneta wa Kaunti ya Kilifi Stewart Madzayo, hatua ya kumbandua Sonko ni kinyume cha agizo la mahakama na hoja hiyo haikupaswa kujadiliwa.

Licha ya kukiri kwamba madai dhidi ya Sonko huenda yakawa ya ukweli, Seneta Madzayo, amaye ni Jaji mstaafu, amehoji kwamba mchakato huo ni kinyume cha sheria kwani swala hilo tayari liko mahakamani.

Wanachama 59 wa Bunge la Nairobi walio katika upande wa Sonko na ambao walikuwa pamoja na Gavana huyo katika Kaunti ya Kwale siku ya kujadiliwa kwa hoja hiyo wanadai kwamba wafanyikazi wa bunge hilo waliwapigia kura kinyume cha sheria.

Categories
Habari

Bunge la Seneti kuandaa kikao maalum Jumatano ili kujadili hatma ya Sonko

Spika wa Bunge la Seneti Ken Lusaka ameitisha kikao maalum cha bunge hilo siku ya Jumatano ili kuamua namna ambavyo hoja ya kumwondoa mamlakani Gavana wa Nairobi Mike Sonko itakavyoshughulikiwa.

“Kama Bunge la Seneti, tulikuwa tumeenda likizoni lakini tuko na kikao maalum Jumatano kwa sababu wanachama wa Bunge la Kaunti ya Nairobi walimbandua gavana wao,” akasema Lusaka katika ibada ya Kanisa Katoliki la Christ the King, Jijini Nairobi.

Lusaka amesema kuwa Maseneta, ambao kwa sasa wako likizoni, watasikiza malalamishi yaliyowasilishwa dhidi ya gavana huyo.

Baadaye wataamua iwapo kesi ya Gavana Sonko itashughulikiwa na kamati maalum ya Bunge la Seneti au bunge lote.

Iwapo Bunge la Seneti litaamua kushughulikia swala hilo kupitia kamati maalum, maseneta watateua kamati ambayo inajumuisha wanachama 11 kuchunguza swala hilo.

Kamati hiyo maalum itachukuwa siku kumi kufanya uchunguzi na baadaye kuwasilisha ripoti yake kwa bunge hilo.

Bunge hilo pia linaweza kuchunguza swala hilo kupitia kwa vikao maalum.

Sonko alifurushwa afisini Alhamisi juma lililopita katika hoja iliyoungwa mkono na wanachama 88 wa Bunge la Kaunti hiyo kati ya wanachama 122 wa bunge hilo.

Hata, hivyo, Sonko amepinga matokeo hayo akidai kuwepo kwa udanganyifu.

Anadaiwa kudhihirisha mienendo isiyofaa, kukiuka katiba na kutumia vibaya mamlaka.

Aliyekuwa gavana wa kaunti ya  Kiambu  Ferdinand Waititu ndie gavana wa pekee ambaye kuondolewa kwake mamlakani kumewahi kufaulu.

Categories
Habari

Viongozi wa vijana Nairobi waapa kuandamana wakipinga kubanduliwa mamlakani kwa Sonko

Baadhi ya vijana wa Kaunti ya Nairobi wameshtumu vikali hatua ya kubanduliwa mamlakani kwa Gavana Mike Mbuvi Sonko.

Sonko aliondolewa afisini na wanachama wa Bunge la Kaunti hiyo siku ya Alhamisi kwa madai ya utumuzi mbaya wa mamlaka, utovu wa nidhamu na kukosa uwezo wa kimwili na kiakili kuendesha maswala ya Kaunti hiyo.

Kupitia kwenye mwavuli wa mashirika ya mashinani ya kutetea haki za binadamu, viongozi wa vijana wameapa kukaidi hatua ya kumbandua Sonko uongozini wakisema ilitekelezwa bila kuzingatia sheria.

Vijana hao wametangaza mpango wa kufanya maandamani hadi katika makao makuu ya kaunti hiyo na pia Bunge la Seneti wiki ijayo ili kuonyesha gadhabu yao kutokana na hatua ya kubanduliwa kwa Sonko.

Gavana huyo wa Nairobi anayekabiliwa na matatizo anatarajiwa kufika mahakamani kesho kupinga utaratibu uliotumiwa kumwondoa afisini, akisema ulikuwa na kasoro chungu nzima.

Aidha, Sonko angependa kuwataja Katibu na Spika wa Bunge la Kaunti hiyo Ben Mutura, kwa kudharau maagizo ya mahakama, waliporuhusu kujadiliwa kwa hoja ya kumwondoa mamlakani ilhali  kulikuwa na maagizo ya kusitisha utaratibu huo.

Siku ya Alhamisi, wanachama 88 wa Bunge la Kaunti ya Nairobi walipiga kura na kupitisha mswaada wa kumuondoa Sonko mamlakani.

Categories
Habari

Bunge la Seneti kujadili hotuba ya Rais

Bunge la Seneti leo linatarajiwa kujadili hotuba ya kuhusu hali ya taifa la Kenya iliyotolewa na Rais Uhuru Kenyatta Alhamisi wiki iliyopita.

Kulingana na katiba, Bunge linapaswa kujadili yaliyomo kwenye hotuba hiyo kati ya siku tatu na nne baada ya Rais kuhutubu.

Maseneta wataangazia maswala mbali mbali ikiwemo ripoti ya saba ya kila mwaka kuhusu hatua zilizochukuliwa na mafanikio yaliyopatikana katika harakati za kuafikia maadili ya kitaifa na misingi ya uongozi.

Ripoti ya kila mwaka kwa Bunge kuhusu usalama wa kitaifa na ripoti ya pamoja ya Afisi ya Mkurugenzi wa Mashtaka ya Umma ya miaka ya kifedha ya 2017/2018, 2018/2019 na 2019/2020 pia zitajadiliwa.

Kwenye hotuba yake, Rais Kenyatta aliangazia maswala kadhaa ya kitaifa ikiwemo ripoti ya mpango wa maridhiano ya kitaifa, BBI, juhudi za kupambana na janga la Corona na ufunguzi wa shule.

Rais aliwahakikishia Wakenya kwamba hali ya taifa hili iko imara licha ya changamoto za kiuchumi zilizosababishwa na janga la ugonjwa wa COVID-19.

Categories
Habari

Hotuba ya Rais kuhusu hali ya taifa kutolewa leo

Rais Uhuru Kenyatta leo anatarajiwa kutoa hotuba ya mwaka huu kuhusu hali ya taifa kwenye kikao cha pamoja cha Bunge la Kitaifa na Seneti.

Miongoni mwa maswala mengine, kiongozi wa taifa anatarajiwa kuzungumzia mafanikio ya serikali katika ajenda za maendeleo, miaka miwili baada ya kuchaguliwa kwa awamu ya pili.

Matayarisho yamekuwa yakifanywa bungeni kwa ajili ya maandalizi ya kikao hicho kuambatana na kanuni za kuzuia maambukizi ya virusi vya Corona.

Kwenye hotuba hiyo inayosubiriwa kwa hamu, Rais Kenyatta huenda akazungumzia pia hatua zilizopigwa kwenye vita dhidi ya janga la COVID-19, lililodumu kwa takribani miezi saba sasa.

Juhudi za kuleta umoja nchini kupitia mpango wa upatanisho wa kitaifa, BBI, pia huenda zikashamiri katika hotuba hiyo.

Spika wa Bunge la Kitaifa Justin Muturi na wa Seneti Ken Lusaka waliwaarifu rasmi wabunge kuhusu kikao hicho cha pamoja kupitia chapisho Ijumaa iliyopita.

Kwenye taarifa, Spika Muturi na Lusaka walifichua kwamba Rais angehudhuria kikao hicho cha pamoja siku ya leo kwa hafla hiyo ya kila mwaka.

Miaka iliyopita, Rais alitoa hotuba hiyo kati ya mwezi Machi na Mei kila mwaka isipokuwa mwaka huu ambapo amechelewa kufanya hivyo kutokana na hofu ya maambukizi ya virusi vya Corona.

Categories
Habari

Rais Kenyatta kutoa hotuba ya 2020 kuhusu hali ya taifa Juma lijalo

Rais Uhuru Kenyatta anatarajiwa kutoa hotuba ya mwaka huu kuhusu hali ya taifa hili kwenye kikao cha pamoja cha Bunge la Seneti na lile la Kitaifa tarehe 12 mwezi huu.

Kwenye arifa yake kwa Bunge la Kitaifa jana, Spika Justin Muturi alisema mkutano huo utafanywa kwa kuzingatia maagizo na kanuni za Wizara ya Afya.

“Nataka kujulisha Bunge kwamba nimepokea ujumbe kutoka kwa Rais, uliochapishwa tarehe 23 Oktoba, 2020, kwamba ananuia kutoa hotuba ya 2020 kuhusu hali ya taifa Bungeni siku ya Alhamisi tarehe 12 Novemba, 2020,” akasema Spika Muturi.

Hotuba hiyo ya kila mwaka inatolewa kwa mujibu wa katiba na inaangazia maendeleo ya taifa na hatua ambazo zimechukuliwa kuafikia maadili ya kitaifa.

Ripoti ya mpango wa maridhiano ya kitaifa, BBI na ajenda nne kuu za maendeleo za Rais ni miongoni mwa mambo ambayo yanatarajiwa kuangaziwa kwenye hotuba hiyo kwa taifa.

Wakati uo huo, Rais Uhuru Kenyatta anatarajiwa  kufanya kikao maalum na magavana leo ili kuafikiana kuhusu hatua zitakazochukuliwa kukabiliana na wimbi la pili la chamko la ugonjwa wa COVID-19.

Haya yanajiri kutokana na hofu kwamba huenda sheria mpya zikatangazwa na hata shughuli kufungwa ili kudhibiti msambao wa virusi vya Corona humu nchini.

Jana Mwenyekiti wa Baraza la Magavana Wycliffe Oparanya alisema kaunti sasa zimesakamwa na visa vya maambukizi ya ugonjwa huo, huku zikiripoti visa vingi vipya vya maambukizi kuliko ilivyokuwa hapo nyuma.

Categories
Habari

Bunge kurejelea vikao baada ya likizo ya wiki mbili

Bunge la Kitaifa na lile la Seneti yanatarajiwa kuanza tena vikao vyake Jumanne alasiri, baada ya mapumziko ya wiki mbili.

Wabunge walienda mapumzikoni baada ya kushughulikiwa kwa mswada uliozua utata wa mgao wa mapato ambao ulidumu kwa muda mrefu katika Bunge la Seneti.

Wanaporejea, wabunge wanapaswa kuanza kushughulikia ripoti ya mpango wa maridhiano ya Kitaifa, BBI, kabla ya kura ya maamuzi inayotarajiwa.

Hayo yanajiri wakati Wabunge wa Bunge la Kitaifa na Seneti wakikusanyika huko Naivasha, Kaunti ya Nakuru kujadili ripoti hiyo ya BBI.

Rais Uhuru Kenyatta na Kiongozi wa Upinzani Raila Odinga pia wanatarajiwa katika mkutano huo ambao unatafuta kukuza msimamo wa pamoja kuhusiana na ripoti hiyo.

Mkutano huo pia unatarajiwa kuratibu mpango wa utekelezaji wa mapendekezo kwenye ripoti hiyo.

Licha ya kuwa kwenye mapumziko, wanachama wa Kamati ya Bunge kuhusu Habari, Mawasiliano na Uvumbuzi walimsaili Immaculate Kassait ambaye aliteuliwa kuhudumu kama Kamishna wa kwanza wa Takwimu.

Rais Kenyatta alimteua Kasait chini ya Sheria ya Ulinzi wa Takwimu ya mwaka 2019.