Tag: Rais Uhuru Kenyatta

Categories
Habari

Kamati ya mswada wa BBI yahimiza Bunge kuiga mfano wa wawakilishi wadi ili kuupitisha

Kamati ya kitaifa ya mpango wa BBI imewapongeza wanachama wa mabunge ya kaunti kote nchini kwa kupitisha mswada wa marekebisho ya katiba wa mwaka 2020.

Kwenye taarifa, kamati hiyo imesema wawakilishi wadi wametekeleza wajibu wao wa kihistoria kwa kukubaliana na mchakato wa marekebisho hayo ya katiba yatakayowezesha taifa hili kusonga mbele.

“Pia tunawashukuru kwa kuisikiliza sauti ya wananchi wakati wa maamuzi yao kuhusu mswada wa marekebisho ya katiba wa mwaka 2020,” imesema taarifahiyo.

Kamati hiyo pia imewasifu Wakenya kwa kujitolea kwa wingi na kushiriki katika vikao vya ukusanyaji maoni ya umma kuhusu mswada huo, huku wakipuuzilia mbali habari za uongo zinazoenezwa na wanaopinga mchakato huo.

Wanakamati hao wanasema kupitishwa kwa mswada huo kote nchini ni ishara kwamba wananchi wa Kenya wamezungumza kwa sauti moja.

“Ushindi huu mkubwa unaashiria umaarufu wa BBI na ni ishara ya uungwaji mkono wa mswada wa BBI wakati wa kura ya maamuzi,” wakasema.

Na huku mswada huo ukielekea katika hatua ya mbele, kamati hiyo imewaomba wabunge kuzipa kisogo propaganda zinazoenezwa na kuwaiga wawakilishi wadi kwa kupitisha mswada huo katika Bunge la Kitaifa.

Hayo yanajiri huku mabunge zaidi ya kaunti yakiendelea kujadili mswada huo ambao tayari umetimiza masharti ya kikatiba ya kuungwa mkono na angalau mabunge 24 ya kaunti ili kuingia kwenye awamu nyengine.

Kufikia sasa mabunge 41 yamepitisha mswada huo, huku Bunge la Kaunti ya Migori likisalia la pekee lililokataa mswada huo.

Macho sasa yanaelekezwa kwa kaunti tano zilizosalia, ambazo hazijapigia kura mswada huo zikiwemo Nandi, Elgeyo Marakwet, Uasin Gishu, Mandera na Kilifi.

Sheria inasema mabunge ya kaunti yanafaa kuidhinisha rasimu ya mswada huo katika kipindi cha miezi mitatu baada ya kuwasilishwa.

Mswada huo sasa utawasilishwa kwa Spika Justin Muturi wa Bunge la Kitaifa na Ken Lusaka wa Seneti ili kupitishwa kabla ya kuwasilishwa kwa Rais Uhuru Kenyatta ambaye atatia saini na kuuwasilisha kwa Tume Huru ya Uchaguzi na Mipaka (IEBC) kwa ajili ya kuandaa kura ya maamuzi.

Categories
Habari

Rais Kenyatta azindua hazina ya kufadhili uchumi wa vijana wa MbeleNaBiz

Rais Uhuru Kenyatta amezindua mpango wa kibiashara wa MbeleNaBiz wa kuwatuza wajasiria mali chipukizi na uzinduzi wa mpango makhsusi wa hazina ya vijana wa mwaka 2020-2024.

Akisimamia uzinduzi huo katika Uwanja wa Michezo wa Moi Kasarani Jijini Nairobi, Rais Kenyatta amesema serikali itatenga shilingi bilioni 1.3 za kufadhili uchumi wa vijana wa taifa hili.

Kulingana na Rais, kati ya pesa hizo, shilingi milioni 900 zitatolewa kwa wajasiriamali 250 kama ruzuku.

“Jumla ya shilingi milioni 900 zitapewa

Rais pia ametumia fursa hiyo kuhimiza vijana kuunga mkono mpango wa maridhiano wa BBI ambao tayari umeungwa mkono na mabunge 40 ya kaunti.

Amesema kupitishwa kwa mpango huo kutawawezesha vijana kupata pesa na kuhakikisha rasili mali zaidi zinawasilishwa katika maeneo ya magatuzi ili kufadhili maendeleo.

Categories
Habari

Uhuru: Kenya itabaki kuwa sauti ya Afrika kwenye Baraza la Usalama la Umoja wa Mataifa

Rais Uhuru Kenyatta amesisitiza kujitolea kwa taifa hili kuendeleza ajenda ya Afrika katika Baraza la Usalama la Umoja wa Mataifa kuhusiana na mabadiliko ya hali ya hewa na usalama.

Rais pia amelitaka Baraza la Usalama la Umoja wa Mataifa kusaidia hatua za kukabiliana na athari za mabadiliko ya hali ya hewa barani Afrika, akisema zinaleta athari mbaya za kiuchumi katika bara hili.

Aidha, Rais Kenyatta ameonya kuwa mwito wa Baraza la Usalama la Umoja wa Mataifa wa kudumisha amani na usalama ulimwenguni unaweza kutatizwa katika miaka ijayo ikiwa tishio la mabadiliko ya hali ya hewa halitashughulikiwa vya kutosha.

Rais amesema Bara la Afrika linaweza kukumbwa na athari mbaya zaidi za mabadiliko ya hali ya hewa na akalihimiza Baraza la Usalama la Umoja wa Mataifa kulipa kipaumbele bara hili kwenye mikakati yake ya kushughulikia athari za mabadiliko ua hali ya hewa na usalama.

Rais alizungumza katika Ikulu ya Nairobi, wakati wa mjadala wa Baraza la Usalama la Umoja wa Mataifa ulioandaliwa na Uingereza na ambao ulihusu uhusiano kati ya hali ya hewa na usalama.

Categories
Habari

Rais Kenyatta aomboleza kifo cha Mbunge wa Juja Francis Munyua Waititu

Rais Uhuru Kenyatta amejiunga na viongozi wengine katika kutuma risala za rambirambi kwa familia jamaa na wakazi wa eneo bunge la Juja kufuatia kifo cha mbunge wao Francis Munyua Waititu.

Kwenye risala yake, Rais Kenyatta amemtaja Waititu ambaye alifahamika kama  ‘Wakapee’, kama kiongozi mkakamavu, mwaminifu na mwenye kujitokea.

Mbunge huyo alifariki jana jioni katika Hospitali ya MP Shah, Nairobi baada ya kuugua maradhi ya saratani.

Wakapee alichaguliwa kuwa mbunge wa Juja mwaka wa 2013 na baadaye kuhifadhi kiti chake mwaka wa 2017.

Amekuwa akiugua saratani ya ubongo kwa muda mrefu na aliwahi kusafiri hadi India kwa ajili ya matibabu.

Mbunge huyo alikuwa ameahidi mradi wa ujenzi wa kituo cha kukabiliana na saratani katika Kaunti ya Kiambu.

Mbunge wa Kiambaa, Paul Koinange kwenye risala yake amemtaja mbunge huyo kama kiongozi aliyewapenda watu ambaye alitangamana vyema na wabunge na pia wananchi.

Koinange ambaye ni mwenyekiti wa kamati ya usalama wa taifa bungeni, amedokeza kuwa Waititu alichangia vyema mijadala na kutangamana vyema na wabunge wenzake.

Categories
Habari

Viongozi na wakazi wa Lamu walilia kazi za LAPSSET

Viongozi wa eneo la Pwani sasa wanataka serikali kuwapa kipaumbele wakazi wa Kaunti ya Lamu kwenye mchakato wa kuajiri wafanyikazi katika mradi wa LAPSSET.

Mradi huo wa ujenzi wa barabara kuu kutoka Bandari ya Lamu hadi Sudan Kusini ambao utazinduliwa mwezi ujao.

Wakazi wameibua wasi wasi kuhusu shughuli hiyo ya uajiri ambayo wamesema haijawafaidi, licha ya kwamba mradi huo unafanyika katika kaunti yao.

Awamu tatu za kwanza za mradi wa  LAPSSET zimekamilika na Rais Uhuru Kenyatta anatarajiwa kuzindua rasmi awamu hizo mwezi Machi.

Wakiongozwa na Gavana wa Mombasa Ali Hassan Joho, aliyekuwa Gavana wa Lamu Issa Timammy na Mbunge wa Kaunti ya Lamu Ruweida Mohamed, viongozi hao walisema wakazi wa kaunti hiyo hawafai kufungiwa nje ilhali mradi huo unatekelezwa katika sehemu hiyo.

“Shughuli ya uajiri wa wafanyikazi wa LAPSSET ama Bandari ya Lamu lazima ifanywe Lamu na wapewe kipaumbele wakazi wa Lamu,” akasema Joho.

Wakiongea mjini Lamu, viongozi hao pia walitoa wito kwa serikali kuhakikisha wavuvi ambao wameathirika pakubwa kutokana na mradi huo ulioanzishwa na serikali ya kitaifa wanafidiwa.

Timammy amewataka wabunge wa eneo hilo kuwasilisha mswada bungeni kuhusu fidia ya wavuvi walioathirika ila hawajafidiwa.

Seneta wa Kaunti ya Kilifi Stewart Madzayo ameahidi kulipeleka swala hilo katika Bunge la Seneti ili kutafuta majibu kwa nini fidia hiyo haijatolewa licha ya agizo la mahakama, kauli iliyoungwa mkono na mwenzake wa Mombsasa Mohammed Faki.

 

Categories
Habari

Rais Kenyatta afanya mabadiliko ya usimamizi wa idara mbali mbali serikalini

Rais Uhuru Kenyatta ametangaza mabadiliko kadhaa ya uongozi katika wizara na idara mbali mbali serikalini, kando na kuteua makatibu wanane wapya.

Kwenye taarifa iliyosainiwa na Mkuu wa Utumishi wa Umma Joseph Kinyua, mabadiliko hayo yameanza kutekelezwa mara moja.

Kulingana na taarifa hiyo iliyotumwa kwa vyombo vya habari Jumatano, makatibu wanane wakuu wamebadilishiwa majukumu. Makatibu sita waandamizi pia wamehamishwa hadi idara zengine huku wengine wanane wakiteuliwa.

Aidha, Kiongozi wa Taifa ameunganisha idara ya Uchimbaji Madini na ile ya mafuta na kuzifanya kuwa moja.

Kinyua amesema hatua hiyo ya Rais inanuia kuimarisha utendakazi serikalini, kuwezesha utekelezaji wa mageuzi muhimu yatakayohakikisha kwamba wizara na idara mbali mbali zinafanikiwa zaidi katika majukumu yao.

Categories
Habari

Rais Kenyatta aomboleza kifo cha Mbunge wa Bonchari John Oyioka

Rais Uhuru Kenyatta amepeleka risala za rambi rambi kutokana na kifo cha Mbunge wa Bonchari John Oroo Oyioka.

Oyioka alifariki Jumatatu alipokuwa akitibiwa katika Hospitali ya Aga Khan, Kisumu, baada ya kuugua kwa muda mrefu.

Kwenye risala yake, Rais amemtaja Oyioka kuwa mwalimu na afisa wa elimu mtajika na mbunge mkakamavu.

Oyioka, aliyekuwa mwalimu mustaafu, amehudumu mara mbili kama mbunge baada ya kuchaguliwa kwa chama cha Peoples Democratic Party (PDP).

Rais Kenyatta ameitakia jamaa ya marehemu faraja, huku akimwelezea mwendazake kuwa aliyejitolea kuwatumikia watu wake hasa kwa kuhimiza umuhimu wa elimu.

“Upendo wa elimu kwa Oyioka ulidhihirika pale alipojenga taasisi ya kibinafsi ya mafunzo ya ualimu baada ya kustaafu kutoka kwa utumishi wa umma,” amesema Rais.

“Alikuwa kiongozi asiye na ubinafsi, aliyetambua thamani ya kuwezesha vijana kupitia elimu.”

Kiongozi wa taifa aliiombea jamaa, marafiki na wakazi wa Bonchari faraja kwa kumpoteza kiongozi wao.

Categories
Habari

Rais Kenyatta, viongozi wengine wahudhuria ibada ya mazishi ya Nyachae Gusii

Rais Uhuru Kenyatta amejiunga na familia na viongozi wengine kwa ibada ya wafu ya aliyekuwa Waziri Simeon Nyachae inayoendelea katika uga wa michezo wa Gusii, Kaunti ya Kisii.

Awali, ibada hiyo ilikuwa imepangwa kufanyika katika uga wa michezo wa Musa Nyandusi huko Nyanturago lakini ikahamishwa hadi uwanja mkubwa wa michezo wa Gusii ili kuwawezesha waombolezaji wengi kuhudhuria huku sheria za kuzuia kusambaa kwa ugonjwa wa COVID-19 zikizingatiwa.

Mwili wa Nyachae uliwasili Jumapili kwa ndege ya polisi wa kawaida katika uwanja wa Shule ya Kisii kabla kupelekwa nyumbani kwake.

Baadhi ya viongozi waliojumuika pamoja na Rais kwa ajili ya ibada hiyo ni pamoja na Naibu Rais William Ruto, aliyekuwa Waziri Mkuu Raila Odinga, Waziri wa Usalama wa Kitaifa Dkt. Fred Matiang’i, miongoni mwa viongozi wengineo.

Baada ya ibada hiyo, marehemu Nyachae atazikwa nyumbani kwake katika kijiji cha Nyosia, Kaunti ya Kisii.

Nyachae alifariki tarehe mosi mwezi huu katika Hospitali ya Nairobi alipokuwa akipokea matibabu.

Nyachae alihudumu kama Mbunge wa eneo la Nyaribari Chache kwa miaka 15.

Aidha, alihudumu kama Waziri wa Fedha na Kilimo wakati wa utawala wa Hayati Daniel Arap Moi, miongoni mwa nyadhifa nyenginezo.

Mbali na fanaka za kisiasa, Nyachae pia alikuwa mwanabiashara tajika.

Categories
Habari

Rais Kenyatta amuomboleza Seneta wa Garissa Yusuf Haji

Rais Uhuru Kenyatta ametuma arifa ya faraja kwa familia, marafiki na wakazi wa Kaunti ya Garissa kufuatia kifo cha Seneta wao Mohamed Yusuf Haji.

Seneta Haji, aliyehudumu kwa muda mrefu serikalini kama Mkuu wa Mkoa na pia Waziri, ameaga dunia alipokuwa akipokea matibabu katika Hospitali ya Aga Khan, Nairobi akiwa na umri wa miaka 80.

Kwenye ujumbe wake wa faraja, Rais Kenyatta amemuomboleza mwanasiasa huyo mkongwe kama kiongozi mzalendo na wa kutegemea.

Rais amesema ni masikitiko kupoteza kiongozi kama huyo, ambaye hadi kifo chake alikuwa mwenyekiti mwenza wa jopokazi la mpango wa maridhiano y akitaifa, BBI.

“Mzee Haji alikuwa kiongozi aliyeheshimika na ambaye hekima yake, ujuzi kuhusu jamii ya Kenya na tajriba kuu kama kiongozi wa serikali, vilimuwezesha kuitumikia nchi katika nyadhifa tofauti tofauti kwa miaka mingi,” amesema Rais.

Rais Kenyatta amesema kifo cha Haji ni pigo kubwa kwa taifa hili na hasa mchakato wa mageuzi ya katiba kupitia BBI, ambapo uongozi wake utatamaniwa sana.

Rais ameiombea faraja familia, jamaa na marafiki wakati huu wa maombolezo.

Haji amekuwa akiugua kwa muda na mwaka jana alipelekwa nchini Uturuki kwa matibabu, na baadaye kurejea humu nchini hivi majuzi.

Kwa mujibu wa hatibu wa familia, maombi ya mazishi yatafanywa leo saa kumi alasiri katika Msikiti wa South C, kisha marehemu Yusuf Haji atazikwa kwenye makaburi ya kiislamu ya Lang’ata.

Categories
Habari

Viongozi wammiminia sifa tele Marehemu Nyachae kwenye misa ya wafu Nairobi

Rais Uhuru Kenyatta ameliongoza taifa katika kutoa heshima za mwisho kwa marehemu Simeon Nyachae kwenye misa ya wafu Jijini Nairobi.

Misa hiyo iliyoandaliwa kwa heshima ya marehemu Nyachae katika kanisa la St. Maxwell SD na imehudhuriwa na jamaa, marafiki, wanasiasa, viongozi wengine wa serikali na waliofanya kazi pamoja naye.

Kila aliyepata fursa ya kuzungumza amemlimbikizia sifa kem kem Waziri huyo wa zamani kama aliyechangia pakubwa katika siasa na maendeleo ya nchi hii.

Rais Uhuru Kenyatta, kupitia hotuba iliyosomwa kwa niaba yake na Waziri wa Afya Mutahi Kagwe, amemtaja marehemu Nyachae kama mwana mzalendo aliyechangia pakubwa katika ufanisi wa taifa hili.

Rais amesema marehemu Nyachae alitumikia taifa hili kwa uadilifu na kusema urathi wake utakumbukwa na vizazi vingi vijavyo.

“Huduma yake kwa Kenya ilikuwa yenye sifa ya uadilifu na kujitolea kwa wajibu wake na ukweli uliompa sifa katika utawala mara tatu mfululizo,” amesema Rais Kenyatta.

Kiongozi wa chama cha ODM Raila Odinga, kwa upande wake, amemsifu Nyachae kwa kumtaja kama kiongozi mwema aliyewasaidia Wakenya wengi kupata elimu nje ya nchi.

“Ukienda Marekani, utapata mitaa iliyojengwa na Wakenya walionufaika na ukarimu wa Simeon. Alipeleka wengi India, China na mataifa mengine duniani,” akasema Raila.

Amekumbuka jinsi Makamo wa Rais wa kwanza wa nchi hii Jaramogi Oginga Odinga alivyompandisha cheo Nyachae kuwa Mkuu wa Wilaya alipokuwa akisimamia shughuli ya kurejesha utumishi wa umma mikononi mwa Waafrika.

Mwanawe Nyachae, Moses, pia ameusifu mchango wa babake maishani mwake na pia ndugu zake.

“Tangu wakati tulipoanza shule, ujumbe wako ulikuwa wazi kwamba tusipochukua elimu kwa uzito, madhara yake yatakuwa mabaya,” amesema Moses kwenye ujumbe wa heshima kwa babaye.

Viongozi wengine waliotoa heshima zao kwa Nyachae ni pamoja na kiongozi wa Wiper Kalonzo Musyoka, mwenzake wa ANC Musalia Mudavadi, Waziri wa Usalama wa Kitaifa Fred Matiang’i, miongoni mwa viongozi wengine.

Mwili wa Nyachae utasitiriwa Jumatatu nyumbani kwake katika eneo la Nyaribari Chache, Kaunti ya Kisii.