Tag: Raila

Categories
Habari

Raila atetea pendekezo la BBI la kuunda afisi ya mpokezi wa malalamishi katika Idara ya Mahakama

Kiongozi wa chama cha ODM Raila Odinga ametetea pendekezo la kuanzisha afisi ya kupokea malalamishi ya umma katika idara ya mahakama kwenye ripoti ya mpango wa maridhiano, BBI.

Raila amesema kuwa afisi hiyo itahakikisha kwamba idara ya mahakama inawawajibikia Wakenya.

Amesema kuwa afisi hiyo huru itasuluhisha malalamishi ya Wakenya kuhusiana na hukumu zinazotolewa kwa njia isiyo na usawa na pia mienendo isiyofaa ya majaji, mahakimu na maafisa wengine wa idara ya mahakama.

Raila, ambaye aliandamana na Waziri wa Usalama wa Kitaifa Fred Matiang’i na mwenzake wa Ugatuzi Eugene Wamalwa, amekanusha madai kwamba ripoti ya BBI inanuia kuanzisha urais wenye mamlaka makuu.

Ametoa wito kwa viongozi kukomesha propaganda kuhusiana na ripoti ya BBI.

“Kuna madai kwamba mapendekezo haya yananuia kuanzisha rais mwenye mamlaka makuu. Kuanzishwa kwa afisi ya kupokea malalamishi ya umma katika idara ya mahakama ni kwa manufaa ya wananchi,” akasema Raila.

Viongozi kadhaa wa maeneo ya Nyanza na Magharibi waliokuwepo miongoni mwao Mwenyekiti wa Baraza la Magavana, Wycliffe Oparanya na Gavana wa Trans Nzoia, Patrick Khaemba wametoa wito kwa wakenya kuunga mkono ripoti hiyo kwa wingi.

 

Categories
Habari

Rais Kenyatta ampongeza Rais Mteule wa Marekani Joe Biden

Rais Uhuru Kenyatta ,amempelekea risala za pongezi Rais Mteule wa Marekani Joseph Robinette Biden kufuatia kuchaguliwa kwake katika uchaguzi wa hivi punde nchini Marekani.

Katika risala yake Rais Kenyatta alitaja ushindi huo katika uchaguzi ulioshuhudia kinyang’anyiro kigumu, kuwa dhihirisho la imani ya watu wa Marekani katika uongozi wa  makamu huyo wa rais wa zamani.

”Wamarekani wameongea kwa sauti kubwa kupitia kwa kura zao na kumchagua kiongozi mwenye  tajriba,mwenye sifa nyingi na pia kiongozi wa muda mrefu kuwa kiongozi wa Ikulu.

Kwa niaba ya wananchi na serikali ya Kenya,Nampongeza Rais mteule Joe Biden na makamu Rais  Mteule  Kamala Harris kwa ushindi wao mkubwa na kuwatakia kila la heri  wanapojiandaa kuongoza Marekani kwa ufanisi wa siku za usoni” akasema Rais

Rais Kenyatta amemtaja Rais Mteule kuwa rafiki wa Kenya ambaye ziara yake ya mwisho  humu nchini  akiwa makamu wa rais wa Barack Obama iliimarisha ushirikiano baina ya  Kenya na Marekani.

Kiongozi wa Taifa pia amempongeza makamu wa Rais Mteule  Kamala Harris kwa kuandikisha historia kuwa mwanamke wa kwanza ,kuwa makamu wa Rais katika  historia ya siasa za Marekani.

Wakati uo huo Rais Kenyatta amemshukuru Rais anayeondoka Donald Trump na  uongozi wake kwa kuwa na uhisiano mwema na wa  karibu na  Kenya na kumtakia mema anapoiaga Ikulu ya Marekani White House.

Rais Mteule Joe Biden akiwa na Raila Odinga katika ziara yake nchini Kenya akiwa makamu wa Rais Obama

Viongozi wengine wa Kenya waliompongeza Rais Mteule Joseph Biden ni Kiongozi wa ODM Raila Odinga na kiongozi wa Wiper Kalonzo Musyoka.

Joe Biden akiwa na Rais Mstaafu Mwai Kibaki ,Raila Odinga na Kalonzo Musyoka alipozuru Kenya
Categories
Habari

Ripoti ya BBI kuzinduliwa rasmi leo

Ripoti ya mpango wa maridhiano ya kitaifa BBI iliyosubiriwa kwa muda mrefu inatarajiwa kuzinduliwa rasmi leo.

Hafla ya uzinduzi wa ripoti hiyo kwa umma itaongozwa na Rais Uhuru Kenyatta katika Ukumbi wa Bomas, Jijini Nairobi.

Haya yanajiri baada ya Rais Kenyatta na kinara wa ODM Raila Odinga kukabidhiwa ripoti hiyo huko Kisii, Jumatano.

Siku hiyo, Rais aliwahimiza Wakenya kuisoma ripoti hiyo na kuyaelewa vyema yaliyo ndani yake badala ya kupotoshwa na wanasiasa.

Alisema lengo kuu la BBI ni kuleta utangamano wa kitaifa, usawa wa wananchi na maendeleo ya nchi, akihoji kwamba mchakato wa mpango huo uko wazi kwa Wakenya wote.

Kenyatta aliwaonya viongozi dhidi ya kuingiza siasa katika swala la ripoti hiyo na kuleta mashindano na badala yake washirikiane ili kuboresha yaliyomo kwa ajili ya maendeleo ya nchi.

Naye kinara wa ODM Raila Odinga alisema kuwa BBI italeta suluhu ya changamoto nyingi zinazolikumba taifa hili kama ufisadi, italeta maridhiano, umoja wa kitaifa, nafasi za kujiendeleza kwa wote na usalama nchini.

Wadau wa sekta mbali mbali pia wametaka kujumuishwa kwa kila mmoja kwenye mdahalo huo wa BBI unaotarajiwa kuwa ajenda kuu katika majuma machache yajayo baada ya rais kuzindua rasmi ripoti hiyo.

Tayari ripoti hiyo imezua hisia mseto miongoni mwa viongozi na Wakenya kwa jumla, huku wengine wakiiunga mkono na wengine wakiipinga kwa kusema kuwa haitasuluhisha matatizo ya wananchi bali itawafaidi wakuu wa serikalini.

Categories
Habari

Raila aahidi ukombozi wa wanawake kupitia BBI

Kiongozi wa chama cha ODM Raila Odinga amesema mpango wa uwiano BBI una lengo la kuwakomboa wanawake kutokana na ubaguzi, umaskini na kuwalinda kutokana na viongozi walafi.

Akizungumza kwenye mkutano na viongozi wanawake huko Kitengela, Kaunti ya Kajiado, Raila amedokeza kuwa ripoti kamili ya BBI iko tayari kupitiwa na kujadiliwa na umma na ni kiungo muhimu cha kuleta utangamano wa Wakenya.

Amesema nchi hii imeshuhudia umwagikaji wa damu uliotokana na vita vya kisiasa, akihoji kuwa BBI imezingatia suluhu la maswala hayo yanayosababishwa na watu wenye ubinafsi.

Raila pia amesema wanawake humu nchini wanapitia machungu kwa sababu ya ukosefu wa sera za kuwasaidia, hali ambayo imewasababishia kuonekana kama kundi duni.

Amesema mageuzi ya katiba kupitia kwa BBI yatawapa wanawake uwanja huru na haki wa kupigania nafasi za uongozi kupitia kwa uchaguzi.

Aidha, Raila amesema BBI inalenga kukabiliana na ongezeko kubwa la visa vya ufisadi unaoendelezwa na viongozi wa serikali.

Chama hicho cha ODM kimewakaribisha baadhi ya wanawake walioasi vyama vyengine.

Hafla hiyo imehudhuriwa na viongozi 47 wa wanawake wa ODM kutoka kaunti zote nchini.

Seneta mteule Judith Pareno, aliyekuwa Gavana wa Kaunti ya Kajiado David Nkedianye na viongozi wengineo pia wamehudhuria hafla hiyo.