Tag: Pwani

Categories
Habari

Joho, Kingi waanzisha mchakato wa kuunganisha Pwani kabla uchaguzi mkuu wa 2022

Gavana wa Kaunti ya Mombasa Ali Hassan Joho na mwenzake wa Kilifi Amason Jefwa Kingi wameanzisha mchakato wa kuleta pamoja viongozi na wakazi wa eneo la Pwani ili kuafikia azma ya umoja wa kisiasa wa eneo hilo huku uchaguzi mkuu ukikaribia.

Kwenye mazungumzo yaliyofanyika Jumatano katika eneo la Wundanyi, magavana hao walijumuika na wenzao wa eneo hilo, akiwemo Gavana wa Taita Taveta Granton Samboja na Gavana wa Tana River Dhadho Godhana kwa lengo la kutafuta mwelekeo wa pamoja wa kisiasa.

Viongozi hao walimteua Gavana Samboja kuwa Mwenyekiti wa Jumuiya ya Kaunti za Pwani kwa muda wa miaka miwili katika harakati za kutafuta mwelekeo wa kisiasa wa eneo hilo ifikapo mwaka wa 2022.

“Ajenda kuu ni kuleta kaunti zote [za Pwani] pamoja kwa mambo ya maendeleo. Tumekubaliana kwa kauli moja kama magavana wa eneo la Pwani kwamba wakati huu hatutakuwa kwa menu tutakuwa kwa meza,” akasema Samboja baada ya kuteuliwa kwake.

Joho, ambaye ni Naibu Kinara wa Chama cha ODM, tayari ametangaza kuingia katika kinyang’anyiro cha kuwania urais katika uchaguzi mkuu ujao, huku akisema kwa miaka mingi, viongozi na wakazi wa Pwani wameunga mkono wagombea kutoka maeneo mengine ya nchi na ni wakati wao sasa kuunga mkono mgombea kutoka Pwani.

Kumekuwa na shinikizo kutoka kwa baadhi ya viongozi wa eneo hilo kuhusu haja ya kuundwa kwa chama cha kisiasa cha Pwani, eneo ambalo limejulikana kwa muda mrefu kuwa mojawapo ya ngome za chama cha ODM, chake Raila Odinga.

Hata hivyo, Gavana wa Kaunti ya Kilifi Amason Kingi ameonekana kupinga haja ya kuundwa kwa chama kipya, akihoji kwamba tayari kuna vyama kadhaa vyenye asili ya Pwani, hivyo basi itakuwa bora kama vyama hivyo vitakuja pamoja ili viunde mrengo wa kisiasa.

Akiongea kwenye hafla ya uzinduzi wa mradi wa shilingi milioni 60 wa ujenzi wa barabara katika eneo la Mariakani Kaunti ya Kilifi, Kingi alisema vyama vya KADU Asili, Shirikisho, Republican Congress na Umoja Summit vina mizizi ya eneo hilo na ipo haja ya kuvileta pamoja.

“Ikiwa tayari tumegawanyika mara nne, nikiongeza cha tano nitakuwa natela umoja ama nitakuwa nagawanya zaidi? Tumeanza safari ya kuleta hivi vyama pamoja na hivi karibuni tutapata mwavuli,” akasema.

Hata hivyo azma hiyo huenda ikakumbwa na changamoto kutokana na migawanyiko ya kisiasa iliyoshuhudiwa hivi karibuni, huku baadhi ya viongozi akiwemo Mbunge wa Nyali Mohammed Ali, wa Malindi Aisha Jumwa, wa Kilifi Kaskazini Owen Baya, miongoni mwa wengine wakionekana kumuunga mkono Naibu Rais William Ruto.

Categories
Habari

KEMSA yaanza kusambaza vyandarua milioni 10 katika kaunti za Pwani

Shirika la Usambazaji wa Bidhaa za Matibabu Nchini (KEMSA)limeingia katika awamu ya tatu ya usambazaji wa vyandarua milioni 10 vilivyopakwa dawa za kuua mbu ili kuimarisha udhibiti wa maradhi ya malaria.

Kaimu Afisa Mkuu Mtendaji wa shirika hilo, Edward Njoroge, anasema awamu ya tatu ilianza mwishoni mwa mwezi uliopita na inatarajiwa kukamilika katikati ya mwezi huu.

Wanaolengwa katika awamu hiyo ni watu wasiojiweza katika kaunti za Lamu, Kwale, Mombasa, Kilifi na Tana River.

Alisema chini ya Awamu ya kwanza, shirika hilo lilisambaza vyandarua zaidi ya milioni moja katika kaunti za Kirinyaga, Baringo, Marsabit, Turkana na Vihiga.

Katika awamu ya pili, alisema shirika hilo lilisambaza vyandarua milioni tatu huko Kisumu, Siaya, Homa Bay na Migori.

Awamu ya nne iliyopangwa kuanza mwezi Mei italenga kaunti za Bomet, Nyamira, Kisii, Nandi, Kericho, Uasin Gichu, Taita Taveta, Pokot Magharibi na Trans Nzoia.

Afisa huyo alishukuru Hazina ya Kimataifa, Idara ya Udhibiti wa Malaria na Hazina ya Kitaifa kwa kuchukua jukumu muhimu katika kusaidia kudhibiti maradhi ya malaria humu nchini.

Njoroge alisema ushirikiano na wadau wote muhimu ni sehemu ya mikakati ya serikali ya kuboresha utoaji wa huduma za afya.

Categories
Habari

Joho, Kingi, walaumiwa kwa kuhujumu usajili wa chama kipya cha Pwani

Mbunge wa Kilifi Kaskazini Owen Baya amewashutumu Gavana wa Kaunti ya Mombasa Hassan Ali Joho na mwenzake wa Kilifi Amason Kingi kwa kuhujumu juhudi za kubuni chama cha Wapwani.

Baya amesema mbinu za kuchelewesha kubuniwa kwa chama hicho zinazotumiwa na magavana hao wawili zinanuiwa kuwavunja moyo viongozi wengine wa eneo hilo walio na hamu ya kubuni chama cha eneo la Pwani.

Mbunge huyo anadai kuwa juhudi zake za kusajili chama cha eneo la Pwani zinatatizwa na magavana hao, lakini anasisitiza kwamba watu wa eneo la Pwani watakuwa na chama kipya cha kisiasa ifikapo mwezi Aprili mwaka huu.

“Nawahakikishia watu wa Pwani kwamba ifikapo mwezi Aprili, tutakuwa na chama na tutasukuma gurudumu la chama cha Pwani,” akasema Baya.

Akiongea kwenye mazishi ya Matthew Karisa Katana, ambaye mjombake mbunge wa Kaloleni Paul Katana, katika kijiji cha Makomboani, Baya alidai kuwa magavana hao waliwalipa watu fulani ili wahujumu usajili wa chama hicho.

Mbunge huyo hakutaja jina la chama hicho kipya au viongozi wake lakini akasema kuwa orodha ya viongozi wa chama hicho itachapishwa wakati utakapowadia.

“Hiki chama kina jina na viongozi. Bado tunachuja na mwishowe tutachapisha orodha ya viongozi ambao wako katika kile chama,” akaongeza.

Aidha, Baya amefichua kwamba kwa sasa hawawezi kuweka hadharani wanachama wa chama hicho kipya kwa vile viongozi wengi bado ni wanachama wa vyama vyengine, na kulingana na sheria ya msajili wa vyama vya kisiasa, mtu hawezi kuwa mwanachama wa vyama viwili kwa wakati mmoja.

Kauli ya Baya iliungwa mkono na Mbunge wa Kaloleni Paul Katana, ambaye alisema kwamba ili wakazi wa Pwani waweze kupigania haki zao kikamilifu, ni sharti waunde chama chao.

Categories
Habari

Viongozi wa Pwani waahidi kuzindua chama cha Wapwani

Baadhi ya viongozi wa kisiasa wa Pwani wameahidi kuzindua chama cha kisiasa ambacho kinanuiwa kuwaunganisha wakazi wa eneo hilo.

Kwa mujibu wa fununu kutoka kwa baadhi ya viongozi hao, chama hicho huenda kikazinduliwa katika muda wa miezi mitano ijayo.

Akiongea katika Eneo Bunge la Kaloleni, Gavana wa Kaunti ya Kilifi Amason Kingi alisema eneo hilo sasa halitaunga mkono tena chama kingine chochote cha kisiasa kisichokuwa na asili ya Pwani.

Alisema eneo la Pwani litajiondoa kutoka kwa vyama vikubwa vya kisiasa, kinyume cha yale ambayo yamekuwa yakijiri nyakati zilizopita.

Akiongea wakati wa mazishi ya aliyekuwa Mbunge wa Kaloleni, Gunga Mwinga, Kingi aliwapongeza wabunge wa pwani kwa kutohudhuria hafla ya uzinduzi wa chama cha United Democratic Alliance, akisema huo ndio mwanzo wa mabadiliko makubwa yajayo.

Mbunge wa Malindi, Aisha Jumwa, alizua msisimuko aliposema kwamba waombolezaji wanafahamu azma yake na atarejea kuwaomba kura.

Matamshi yake yalikumbwa na upinzani mkali kutoka kwa Seneta maalum Christine Zawadi ambaye alisema wanawake wapasa kuwa mfano mwema katika jamii na akasema Kilifi inahitaji viongozi bora zaidi wa wanawake ambao wanazingatia maadili.

Categories
Habari

Joho awataka viongozi wasioridhika na chama cha ODM wahame

Naibu wa kiongozi wa chama cha ODM Hassan Ali Joho amewadiriki viongozi wa Pwani ambao hawaridhiki na uongozi wa chama hicho kukihama na kutafuta kura kupitia vyama vingine.

Joho ameshutumu baadhi ya viongozi wa kisiasa kutoka sehemu hiyo ambao wanapigania kubuniwa kwa chama kipya, ambacho wanadai kitapigania maslahi ya Wapwani.

Gavana huyo wa Mombasa amewataja viongozi hao kuwa wadanganyifu na wenye nia ya kujitafutia riziki kupitia utapeli.

Amesema kubuniwa kwa chama kipya kutawagawanya zaidi Wapwani na kuhujumu umoja katika sehemu hiyo ambao umedumishwa na chama cha ODM.

Joho amesema kuwa tangu Rais Uhuru Kenyata na aliyekuwa Waziri Mkuu Raila Odinga walipoungana kwa ajili ya kuleta umoja, miradi kadhaa ambayo itaboresha maisha ya wakazi wa sehemu ya Pwani imeanzishwa na serikali kuu.

“Kama naibu wa kiongozi wa chama cha ODM ambaye nimeona sehemu ya Pwani ikifaidika kwa miradi ya maendeleo tangu Rais Uhuru Kenyatta na aliyekuwa Waziri Mkuu Raila Odinga waungane, naweza kusema bila tashwishi kwamba adui mkubwa wa maendeleo ya Pwani ni [Naibu Rais William] Ruto na wale wanaokula kutoka sahani lake, ambao sasa wanadai kutaka kuunda chama,” amesema Joho.

Gavana huyo amesema eneo la Pwani linatarajiwa kupata ufadhili zaidi wa kifedha kupitia ugatuzi na kubuniwa kwa hazina za maendeleo ya Wadi, ikiwa mpango wa BBI utaidhinishwa kupitia kura ya maamuzi.

Categories
Habari

Usalama waimarishwa Pwani huku wageni wakitarajiwa wakati huu wa sherehe

Serikali imeimarisha usalama katika eneo la Pwani huku maelfu ya wageni wakitarajiwa kuzuru eneo hilo wakati huu wa msimu wa sherehe.

Kamishna wa eneo la Pwani John Elungata alisema mikakati yote ya kiusalama iko tayari kuhakikisha wenyeji na hata wageni wanafurahia msimu wa sherehe kwa amani.

“Tuna maafisa wa kutosha wa usalama na pia tumeboresha doria katika fuo zote na katika maeneo maarufu,” alisema Elungata.

Kulingana na Elungata maafisa wote wa usalama pamoja na wazee wa vijiji wamewekwa katika hali ya tahadhari kuhakikisha mazingira salama kwa wageni wa humu nchini na wale wa mataifa ya kigeni.

Wakati huo huo Elungata alitoa wito kwa wamiliki wa sehemu za burudani kuhakikisha sheria za kudhibiti msambao wa virusi vya Covid-19 vinazingatiwa kikamilifu.

“Watakaopatikana wakikiuka sheria za kudhibiti Covid-19 watatiwa nguvuni na kufikishwa mahakamani,” alionya mtawala huyo.

Kwa upande wake kamanda wa polisi katika eneo la Pwani Gabriel Musau aliyeandamana na Elungata, alidokeza kuwa maafisa  500 wa magereza  wanasaidiana na maafisa wengine wa usalama katika msimu huu wa sherehe.

“Tunawakaribisha wakenya na raia wa kigeni Pwani huku tukiwahakikishia usalama wao wakati huu wa msimu wa sherehe,” alisema Musau.

Musau alisema maafisa wa polisi watashirikiana na halmashauri ya uchukuzi na usalama barabarani,NTSA kuhakikisha sheria za trafiki zinafuatiliwa kikamilifu.

Categories
Habari

Watalii wanaozuru Kilifi wahakikishiwa usalama wao

Viongozi na wamiliki wa biashara za hoteli katika Kaunti ya Kilifi wamewahakikishia watalii wanaozuru eneo hilo la Pwani kuhusu afya na usalama wao.

Wamesema hoteli na migahawa yote katika eneo hilo ambayo itaendelea na biashara msimu wa sherehe zimekaguliwa kuambatana na mwongozo wa Wizara ya Afya wa kuzuia kuenea kwa ugonjwa wa COVID-19.

Mwenyekiti wa tawi la Pwani Kaskazini la chama cha wahudumu wa hotelini, Maureen Awuor, na Gavana wa Kaunti ya Kilifi Amason Kingi, wamesema taasisi zote zitakazoendelea na biashara msimu huu wa sherehe zimezingatia kikamilifu kanuni za Wizara ya Afya, na kwamba wageni hawapaswi kuwa na wasi wasi.

Hata hivyo wamesema hoteli nyingi bado hazijafungua milango yao, kwa vile zimekuwa zikitegemea watalii kutoka nje, na ambao safari zao zilikatizwa na hali ya kufungwa katika nchi zao kutokana na janga la COVID-19.

“Ninawahakikishia wateja wanaokuja katika eneo letu kwamba hoteli zote zinazofanya kazi zimehakikisha kwamba zinafuata kanuni zilizowekwa na tunawahakikishia usalama wao wakati watakapokuwa nasi,” amesema Awuor.

Gavana Kingi amethibitisha kuwa makundi ya afya yamekagua hoteli zote zilizofungua milango yao, na kwamba mikakati ya kutosha imewekwa kuhakikisha afya na usalama wa wageni.

“Kusiwe na wasi wasi kwamba kwa sababu imeripotiwa kwamba eneo hili liko na visa vya maambukizi ya COVID-19 ndipo watu waache kuja,” akasema Kingi.

Gavana huyo amesema hayo baada ya kikao na wadau wa sekta ya hoteli wakati kundi la wahudumu wa afya walipoenda kukagua jinsi hoteli za watalii zilivyojipanga kuwalinda watalii.

Categories
Habari

Hazina ya shilingi milioni 100 yazinduliwa kuimarisha kilimo cha nazi Pwani

Zaidi ya wakulima elfu-150 wa nazi katika eneo la pwani watanufaika kutokana na hazina ya mzunguko ya shilingi milioni-100 ya ufadhili wa kilimo cha zao hilo iliyozinduliwa Ijumaa na waziri wa kilimo Peter Munya.

Alisema kuwa hazina hiyo inatarajiwa kuboresha mmea huo na hivyo kuimarisha ushindani wake sokoni.

Munya alisema kuwa ipo haja ya kuhakikisha wakulima wanapata pembejeo za kutosha ili kuimarisha uzalishaji kutoka nazi 35 kwa kila mnazi kwa sasa hadi 150.

Wakulima katika eneo hilo wamekuwa wakilalamikia hali ya kushindwa kupata mikopo kutokana na ukosefu wa udhamini huku waziri akisema hazina hiyo itaimarishwa ili kwuanufaisha zaidi.

Gavana wa kaunti ya Kwale Salim Mvurya aliyehudhuria hafla hiyo alisema ataisaidia sekta hiyo ndogo kwa kuchimba visima na kujenga mabwawa ili kufanikisha unyunyiziaji mashamba maji.

Sekta ndogo ya nazi  huchangia asilimia 1.5 ya pato jumla litokanalo na kilimo na asilimia 0.4 pekee ya pato jumla la kitaifa.

Sekta hiyo huleta mapato ya shilingi bilioni-13 kila mwaka.

Categories
Habari

Chama cha KADU Asili chanuia kuwa sauti ya Wapwani

Chama cha Kadu Asili kimesema kina mipango ya kujiimarisha na kuwa sauti ya kisiasa ya eneo la Pwani.

Maafisa wa chama hicho wamesema ukosefu wa sauti ya kisiasa umesababisha kudorora kwa uchumi wa eneo la Pwani na kutaka uwekezaji mpya ili kuimarisha uchumi unaotegemea kilimo ambao wakati mmoja ulishamiri katika sehemu hiyo.

Maafisa hao wamesema eneo hilo limebaki nyuma kimaendeleo kwa sababu viongozi wengi wanaochaguliwa kuwakilisha wakazi wa Pwani wanajiingiza kwenye vyama visivyokuwa na maono wala mipango inayohusu maswala yanayowakumba Wapwani.

Katibu wa tawi la Kilifi la chama hicho Jacob Kazungu, ambaye alisoma taarifa ya chama kwa niaba ya wanachama wake, alitaka kuimarishwa na kupanuliwa kwa kilimo cha nazi, korosho na pamba.

Kazungu amesema chama hicho kingali kinapembua mpango wa maridhiano ya kitaifa, BBI, kubaini ikiwa  maoni ya watu wa Pwani yalijumuishwa kwenye ripoti hiyo.

“Kama wanachama, tuko na mpango wa kuipitia ripoti hiyo pamoja na mawakili wa maswala wa katiba kabla hatujatoa msimamo wetu, kama tutaiunga mkono au tutaikataa. Tutakuwa makini kujua kama maswala ya ardhi yameangaziwa au kutajwa kwenye mapendekezo hayo,” akasema Katana.

Wamewataka viongozi kukoma kuingiza siasa kwenye mpango huo na badala yake kuruhusu maoni tofauti ili kuuboresha.

Naibu Mwenyekiti wa chama hicho Ann Sidi ametaka afisi husika kutafsiri ripoti nzima na kuwagawia Wakenya ili kuwawezesha kuwa na ufahamu bora kuihusu.

“Hizo nakala za BBI hatujazipata. Tunaomba zisambazwe kila upande katika nchi yetu ya Kenya. Lazima ziwe kwenye lugha mbili za taifa – ya Kiingereza na Kiswahili, ili kila mtu aweze kuisoma na kuielewa,” amesema Sidi.

Mwanachama wa chama hicho Gilbert Katana ametaka kubuniwa kwa chama cha Wapwani kitakachoyawakilisha maslahi ya sehemu hiyo.

Categories
Habari

Viongozi wa Pwani wakosoa uteuzi wa Mkurugenzi Mkuu wa KMA

Baadhi ya viongozi wa eneo la Pwani wamekosoa uteuzi uliofanywa hivi majuzi katika Halmashauri ya Usimamizi wa Shughuli za Baharini, KMA, na kuishutumu serikali kwa kuwaacha nje kimakusudi wakazi asilia wa eneo hilo.

Wakiongozwa na Seneta wa Kaunti ya Kilifi Stewart Madzayo na mwenzake wa Mombasa Mohammed Faki, viongozi hao sasa wanataka serikali kubatilisha uteuzi huo wa Mutegi Njue kuwa Mkurugenzi Mkuu wa KMA, wakisema haukufanywa kikatiba.

“Sisi Wabunge kutoka eneo la Pwani hatukufurahishwa na uteuzi huo kwa sababu ulifanywa kikabila na hazizingatii usawa wa kimaeneo kama inavyotakikana kisheria,” amesema Seneta Madzayo.

Pia wametilia shaka ujuzi wa waliokabidhiwa nyadhifa hizo wakisema kuwa yeyote kupata kazi hizo sharti awe na ufahamu na ujuzi wa kutosha kuhusu shughuli za baharini.

Aidha, viongozi hao wamesema kusimamishwa kwa mchakato wa uteuzi wa Mkurugenzi Mkuu wa Mamlaka ya Bandari nchini pia ni ishara ya upendeleo dhidi ya wakazi wa Pwani.

Wamemlaumu Waziri wa Uchukuzi James Macharia kwa kuhusika katika uteuzi huo wa kinyume cha sheria, wakihoji kwamba waziri huyo anapaswa kujukumika kwa hali hiyo.

Viongozi hao wametishia kuelekea mahakamani ili kuzuia uteuzi huo.

“Jambo la kusikitisha zaidi ni kwamba hali hii hutokea tu kwenye mashirika ya serikali yaliyopo Pwani wala sio katika maeneo mengine. Kama hili halitarekebishwa, tutaelekea mahakamani kuhakikisha kwamba uteuzi huo unabatilishwa kwa sababu katiba ya Kenya inataka usawa wa kimaeneo,” akaongeza Seneta Faki.