Categories
Habari

Mabunge ya Kaunti kuendeleza mijadala ya mswada wa BBI wiki hii

Mabunge kadhaa ya kaunti yanatarajiwa kupigia kura mswada wa marekebisho ya katiba wa mwaka 2020 wiki hii.

Bunge la Kaunti ya Meru litapiga kura hiyo wiki hii baada kufanywa mkutano wa hadhara wa uhamasisho siku ya Jumanne, huku kaunti za Nairobi, Laikipia na Embu zitakamilisha mikutano ya uhamasisho siku ya Jumatano.

Aidha, Wawakilishi wa Wadi huko Nakuru, Murang’a, Nyeri na Tharaka Nithi wanatarajia kuupiga kura mswada huo wa marekebisho ya katiba wiki hii baada kukamilishwa uhamasisho wa umma siku ya Alhamisi.

Kaunti za Siaya, Homa Bay na Kisumu tayari zimepitisha mswada huo wa marekebisho wa katiba wa mwaka 2020, huku ile ya Baringo ikiwa ya kwanza kuukataa mswada huo.

Kaunti ya Migori inatarajiwa kukamilisha shughuli hiyo wiki hii, huku chama cha ODM kikielezea matumaini kwamba kaunti za Kisii na Nyamira pia zitaidhinisha mswada huo.

Kaunti zina muda wa miezi mitatu kuchunguza kwa makini mswada huo kabla kufanya maamuzi.

Ni sharti angalau mabunge ya kaunti 24 kati ya yote 47 yaidhinishe mswada huo kabla ya kuwasilishwa katika Bunge la Kitaifa kujadiliwa na kupigiwa kura.

Ikiwa wabunge wataupitisha basi utawasilishwa kwa raia kwa kura ya maamuzi.

Huku hayo yakijiri, Seneta maalum Judith Pareno amewataka wanawake kuunga mkono mpango wa BBI, akihoji kuwa unawapa uwezo mwingi katika maswala ya maendeleo na uongozi.

Akiongea katika kijiji cha Mashuuru, Kaunti Ndogo ya Kajiado Mashariki alipongoza mkakati wa mashinani wa BBI, Pareno aliwahimiza wanawake kupuuzilia mbali miegemeo ya vyama vyao vya kisiasa na badala yake kuunga mkono mpango wa BBI.

Aliwaelimisha mamia ya wakazi wa sehemu hiyo kuhusu mpango huo akisema kuwa baadhi ya wanasiasa wameingiza uongo kwenye mpango huo.

Pareno aliwataka hasa wanawake wa kiMaasai kujiunga kwenye makundi ili kuwania nyadhifa za kuchaguliwa kwenye uchaguzi mkuu ujao.

Categories
Habari

Raila awabembeleza wawakilishi wadi na kuwaomba wapitishe BBI

Kiongozi wa chama cha ODM Raila Odinga amewahimiza wanachama wa mabunge ya kaunti kupitisha mswada wa marekebisho ya katiba wa mwaka wa 2020.

Mswada huo kupitia mpango wa maridhiano ya taifa BBI umefikia hatua ya kujadiliwa katika mabunge ya kaunti kote nchini.

Hii ni baada ya Tume Huru ya Uchaguzi na Mipaka (IEBC) kuwasilisha rasimu ya mswada huo kwa mabunge ya kaunti ili kuchunguzwa.

Tume ya IEBC iliidhinisha zaidi ya saini milioni moja jinsi inavyohitajika kisheria ili kufanikisha marekebisho ya katiba kupitia kura.

Akihutubu kwenye mkutano na wawakilishi wadi wa chama hicho kutoka kote nchini, Odinga amesema BBI itahakikisha uthabiti wa kijamii, sio tu kwa kizazi cha sasa lakini pia vizazi vijavyo.

amesema kuwa Wakenya wa tabaka mbali mbali kwa sasa wana wasi wasi kuhusu maisha yao na yale ya vizazi vyao lakini kupitia BBI, mapendekezo ya marekebisho ya katiba yatasaidia kuleta amani na umoja zaidi humu nchini.

Mkutano huo wa mashauriano umeandaliwa katika Chuo cha Co-Operative mtaani Karen, Jijini Nairobi.

Kwa mara nyingine, Odinga amesema chama cha ODM hakimo serikalini na kwamba madhumuni ya mwafaka kati yake na Rais Uhuru Kenyatta ni kuwaunganisha Wakenya.

Categories
Habari

Raila hategemei kuidhinishwa na Uhuru ili kugombea urais, wasema baadhi ya viongozi wa ODM

Baadhi ya viongozi wa chama cha ODM wamesema si lazima Rais Uhuru Kenyatta amwidhinishe Raila Odinga kuwa mgombeaji wa urais kwenye uchaguzi mkuu wa mwaka 2022.

Viongozi hao wamesema Raila hategemei kuidhinishwa na Rais Kenyatta bali anatilia maanani kupitishwa kwa mswada wa marekebisho ya katiba kupitia mpango wa BBI.

Wamesema hayo wakati wa mechi ya gofu ya kuadhimisha miaka 27 ya ukumbusho wa Jaramogi Oginga Odinga mjini Kisumu.

Raila hajatangaza wazi iwapo atagombea urais kwenye uchaguzi mkuu ujao, huku chama hicho cha ODM kikiwa katika harakati ya kumtafut amgombea atakayepeperusha tiketi ya chama hicho..

Raila kwa upande wake amejiepusha na siasa za urithi na kusisitiza kuwa nchi hii haina viongozi waaminifu watakaotetea maslahi ya taifa hili.

Kwa mara nyengine Raila amemkosoa Naibu Rais William Ruto kwa kueneza kampeni ya kimatabaka akisema kampeni hiyo itakuwa na athari kubwa kwa uwiano wa taifa hili.

Chama cha ODM kimetangaza nafasi kwa wale wanaotaka kuwania urais kwa tikiti ya chama hicho kutuma maombi yao.

Raila huenda akang’ang’ania tiketi ya chama hicho na naibu wake kwenye uongozi wa ODM, aliye pia Gavana wa Kaunti ya Mombasa Hassan Joho na Gavana wa Kakamega Wycliffe Oparanya.

Categories
Habari

Oparanya ajitosa kupigania tiketi ya ODM ili kuwania urais mwaka wa 2022

Gavana wa Kaunti ya Kakamega Wycliffe Oparanya ameelezea matumaini ya kupata tiketi ya chama hicho ili kuwania urais mwaka wa 2022.

Oparanya, ambaye ndiye Mwenyekiti wa Baraza la Magavana nchini, amesema atatuma ombi la kuteuliwa ili kujiunga na wale watakaopigania tiketi ya chama hicho ya kuwania urais.

Tayari chama cha ODM kimewataka wanachama wake kutuma maombi kwa bodi ya kitaifa ya uchaguzi ikiwa wanataka kuwania urais kwa tiketi ya chama hicho kwenye uchaguzi wa urais wa mwaka 2022.

Chama hicho kimesema kuwa wanaotaka kuwania uteuzi huo sharti walipe ada ya shilingi milioni moja kwa akaunti ya benki ya chama hicho.

Ili mgombea kufaulu kuwania kiti hicho, ni sharti awe Mkenya ambaye ameejisajili kama mpiga kura na pia awe mwanachama wa kudumu wa chama cha ODM na aliyehitimu shahada ya kutoka chuo kikuu chochote kinachotambulika.

Aidha, atahitajika kuwa na vigezo vinavyohitajika kwa wagombea urais jinsi ilivyoratibiwa na Tume Huru ya uchaguzi na mipaka nchini (IEBC).

Categories
Habari

Wanaotaka tiketi ya ODM kuwania urais 2022 watakiwa kutuma maombi lakini ada ni shilingi milioni moja

Chama cha ODM kimeanza rasmi mchakato wa kumteua mgombea wake wa urais katika uchaguzi mkuu wa mwaka wa 2022.

Wanachama wa chama hicho wanaotaka kuwania uteuzi huo wamepewa hadi tarehe 26 mwezi Februari mwaka huu, kuwasilisha maombi yao katika Makao Makuu ya chama hicho.

Kwenye taarifa kwa wanachama, Mwenyekiti wa Bodi ya Kitaifa ya Uchaguzi ya chama hicho Catherine Mumma amesema wanaotaka kuwania uteuzi huo watahitajika kulipa ada isiyorejeshwa ya shillingi milioni moja.

Aidha, watahitajika kutimiza masharti yote ya kuwania urais kulingana na kanuni za Tume Huru ya Uchaguzi na Mipaka (IEBC).

Miongoni mwa masharti hayo ni pamoja na shahada kutoka kwa chuo kikuu kinachotambulika na serikali ya Kenya na awe anatimiza masharti yote ya kuwania ubunge.

Mwaniaji huyo pia anastahili kudhihirisha kiwango cha juu cha maadili, aliyejihusisha kikamilifu katika maswala na ajenda za chama hicho.

Kinara wa chama hicho Raila Odinga hajatangaza rasmi kwa umma iwapo atawania tena urais, huku ikisalia takribani miezi 17 hadi kuandaliwa kwa uchaguzi mkuu.

Categories
Habari

ODM kuanzisha mchakato wa kumchagua mgombea wake wa Urais

Chama cha ODM kimetangazakwamba kimeanzisha mchakato wa kumchagua mwaniaji wake wa urais kwenye uchaguzi mkuu wa mwaka ujao.

Kupitia kwa taarifa kwa wanahabari Jumatano,katibu mkuu wa chama hicho Edwin Sifuna alisema kuwa,bodi ya uchaguzi ya chama hicho imeagizwa kuchapisha kwenye magazeti na vyombo vingine vya habari nchini  mwaliko  kwa wanaotaka kupeperusha bendera ya chama hicho kuwasilisha maombi yao.

Bodi hiyo pia imeagizwa kuzindua utaratibu wa kuandaa uchaguzi wa mashinani wa chama hicho.

Wakati huo huo Sifuna amesema katika juhudi za kulinda na kutetea maslahi ya chama hicho kote nchini,kamati kuu ya chama itasisitiza kuafikiwa kwa makubaliano rasmi na washirika wake.

Sifuna alisema kuwa chama hicho kinatoa ratiba ya mchakato huo katika muda wa siku saba zijazo.

Categories
Habari

Raila asema BBI ndio suluhisho kwa changamoto za kihistoria

Kiongozi wa upinzani Raila Odinga amesisitiza kuwa mchakato wa BBI ndio sulushisho kwa changamoto zinazolikabili taifa hili tangu uhuru.

Kulingana na Raila, mchakato wa BBI ambao utaashiria kura ya maamuizi kuhusu marekebisho ya katiba utahakikisha ushirikishwaji wa Wakenya wote na uwajibikaji serikalini.

Kinara huyo wa chama cha ODM amesema marekebisho yaliyopendekezwa chini ya mchakato wa BBI yatahakikisha usawa wa kijinsia na ujumuishwaji wa vijana katika maamuzi.

Raila amesema hayo alipohutubia zaidi ya vijana 800 katika jumba la ufungamano kabla ya kuanza kwa shughuli ya uhamasisho kuhusu ripoti ya BBI ambayo itang’oa nanga hivi karibuni.

“Tunayopendekeza ni suluhisho kwa matatizo yaliyopo na tunataka Wakenya waelewe vizuri ili wananchi waweze kupitisha bila kupingwa. Yote tunayofanya leo ni kwa manufaa ya watoto wa vijana wa taifa hili,” amesema Raila.

Kwa mara nyingine, Raila ameunga mkono matamshi ya Rais Uhuru Kenyatta wakati wa mazishi ya mamake kiongozi wa chama cha ANC Musalia Mudavadi kuwa urais uwe ukizunguka kwa jamii zote.

Raila amesema matamshi hayo yalitolewa wakati mwafaka, ikitiliwa maani mchakato wa BBI na malengo yake.

Categories
Habari

Joho awataka viongozi wasioridhika na chama cha ODM wahame

Naibu wa kiongozi wa chama cha ODM Hassan Ali Joho amewadiriki viongozi wa Pwani ambao hawaridhiki na uongozi wa chama hicho kukihama na kutafuta kura kupitia vyama vingine.

Joho ameshutumu baadhi ya viongozi wa kisiasa kutoka sehemu hiyo ambao wanapigania kubuniwa kwa chama kipya, ambacho wanadai kitapigania maslahi ya Wapwani.

Gavana huyo wa Mombasa amewataja viongozi hao kuwa wadanganyifu na wenye nia ya kujitafutia riziki kupitia utapeli.

Amesema kubuniwa kwa chama kipya kutawagawanya zaidi Wapwani na kuhujumu umoja katika sehemu hiyo ambao umedumishwa na chama cha ODM.

Joho amesema kuwa tangu Rais Uhuru Kenyata na aliyekuwa Waziri Mkuu Raila Odinga walipoungana kwa ajili ya kuleta umoja, miradi kadhaa ambayo itaboresha maisha ya wakazi wa sehemu ya Pwani imeanzishwa na serikali kuu.

“Kama naibu wa kiongozi wa chama cha ODM ambaye nimeona sehemu ya Pwani ikifaidika kwa miradi ya maendeleo tangu Rais Uhuru Kenyatta na aliyekuwa Waziri Mkuu Raila Odinga waungane, naweza kusema bila tashwishi kwamba adui mkubwa wa maendeleo ya Pwani ni [Naibu Rais William] Ruto na wale wanaokula kutoka sahani lake, ambao sasa wanadai kutaka kuunda chama,” amesema Joho.

Gavana huyo amesema eneo la Pwani linatarajiwa kupata ufadhili zaidi wa kifedha kupitia ugatuzi na kubuniwa kwa hazina za maendeleo ya Wadi, ikiwa mpango wa BBI utaidhinishwa kupitia kura ya maamuzi.

Categories
Habari

Wanaotaka kuwania wadhifa wa gavana wa Nairobi na ODM kutuma maombi

Chama cha   “Orange democratic movement”- (ODM) kimetoa wito kwa wakenya wanaotaka kuwania wadhifa wa gavana wa Nairobi kuwasilisha maombi yao kufikia adhuhuri  siku ya Jumatatu tarehe 28, Disemba mwaka huu wa 2020.

Taarifa ya mwenyekiti wa bodi ya kitaifa ya uchaguzi katika chama cha ODM Catherine Mukeya Mumma, inasema chama hicho kimepokea mawasiliano kutoka kwa tume huru ya uchaguzi na mipaka -IEBC  kuhusu shughuli za vyama vya kisiasa  kuambatana na uchaguzi mdogo wa kiti cha gavana wa Kaunti ya Nairobi.

Bodi hiyo ya uchaguzi katika chama cha ODM inasema fomu za maombi zinapatikana  katika makao makuu ya chama hicho yaliyoko kwenye jumba la “Orange house”, mtaani Lavington ama kwa kuchakura tovuti ya chama hicho  www.odm.co.ke.

Kiti hicho kiliachwa wazi baada ya bunge la seneti kuidhinisha hatua ya kumbandua gavana wa Nairobi Mike Mbuvi Sonko.

Sonko alikuwa ametuhumwia kwa ukiukaji mkubwa wa katiba, utumizi mbaya wa mamlaka, utovu wa nidhamu na pia uhalifu chini ya katiba ya taifa hili.

Uchaguzi mdogo wa kiti cha Ugavana cha Nairobi umepangiwa kufanywa tarehe 18 Februari mwaka 2021.

Categories
Habari

Raila akosoa kauli kwamba ODM imepoteza umaarufu Pwani

Kiongozi wa chama cha ODM Raila Odinga amepuzilia mbali madai kuwa umaarufu wa chama chake unadidimia katika eneo la Pwani.

Akizungumza kwenye kituo kimoja cha runinga humu nchini, Raila amesema chama cha ODM kilishinda uchaguzi huko Kilifi na kudai kuwa madai kwamba chama hicho hakina nguvu katika sehemu hiyo hayana msingi.

Raila amesema kuwa wafuasi wengi wa ODM walimpigia kura kwa wingi Feisal kwa kuwa alikuwa msaidizi wa marehemu aliyekuwa mbunge wa eneo hilo Suleiman Dori.

Feisal Bader, ambaye alishiriki kwenye uchaguzi huo kama mgombea huru aliwashangaza wengi alipojizolea kura 15,251, huku mgombea wa chama cha ODM Omar Boga akipata kura 10,444 kati ya kura 27,313 zilizopigwa kwenye uchaguzi mdogo wa eneo bunge la Msambweni.

Boga alishindwa kwa kura 4,807 kwenye uchaguzi huo ambao matokeo yake yalitangazwa na Tume Huru ya Uchaguzi na Mipaka, IEBC, siku ya Jumanne usiku.

Ushindi wa Feisal na ule wa wagombea wa Wadi za Gaturi, Lake View na Dabaso umeelezewa na wachanganuzi wa maswala ya kisiassa kuwa kigezo kikubwa kuhusu maridhiano baina ya Rais Uhuru Kenyatta na Raila Odinga.

Wakati wa kampeini za uchaguzi huo huko Msambweni, Raila alisema kuwa utakuwa kipimo cha umaarufu wa mpango wa maridhiano ya kitaifa, BBI, ambao ni nguzo ya kampeini za viongozi hao wawili za kutaka  kuifanyia marekebisho katiba.