Tag: Nairobi

Categories
Habari

Mifereji ya Nairobi kukauka Jumatano, Alhamisi

Usambazaji wa maji katika baadhi ya sehemu za Kaunti ya Nairobi utakatizwa Jumatano na Alhamisi kutokana na shughuli za ukarabati wa mitambo.

Kampuni ya maji ya Nairobi imesema wahandisi wananuia kufunga moja ya vituo vya usambazaji wa maji ili kufanikisha uboreshaji wa mitambo hiyo ya maji katika maeneo ya Uthiru na Dagoretti.

Kwenye taarifa, Mkurugenzi Mkuu wa kampuni ya maji ya Nairobi Nahason Muguna amesema kituo cha maji cha Kabete kinaboreshwa ili kusambaza lita elfu 25 zaidi za maji hadi mitaa ya Karen, Riruta, Satellite, Kawangware na Uthiru.

Maeneo yaliyo karibu na barabara za Naivasha, Ngong, Langata na Waiyaki zitaathirika kutokana na ukarabati huo.

Kituo hicho cha maji kitafungwa kuanzia saa 12 alfajiri Jumatano hadi saa 12 alfajiri Alhamisi.

Kampuni hiyo imewahimiza wakazi watakaoathirika kutumia maji kwa makini huku juhudi zikifanywa za kurejesha usambazaji wa kawaida wa maji.

Categories
Habari Uncategorised

Raila apigia debe ripoti ya BBI Githurai

Kinara wa chama cha ODM Raila Odinga amepeleka kampeni za kupigia debe mpango wa maridhiano wa BBI katika eneo la Githurai, Kaunti ya Nairobi.

Waziri Mkuu huyo wa zamani amewataka vijana na kina mama kuunga mkono ripoti hiyo.

Raila amesema ripoti ya BBI ina manufaa makubwa kwa Wakenya endapo itaidhinishwa kwani itafanikisha kubuniwa kwa ajira na upanuzi wa biashara.

Aidha, amesema sera za BBI zitasaidia kuinua maisha ya vijana na kina mama humu nchini, kinyume cha matamshi yanayotolewa na wapinzani wa mchakato huo.

Siku ya Jumanne, ripoti ya BBI ilipata mwangaza baada ya Tume Huru ya Uchaguzi na Mipaka (IEBC) kuidhinisha saini za kutosha za kuiwezesha ripoti hiyo kujadiliwa bungeni.

Raila pia amesema ziara yake huko Githurai ilichochewa na suala la unyakuzi wa ardhi ambalo liliibuliwa na viongozi wa eneo hilo waliokutana naye na kuahidi kuwasilisha malalamishi hayo kwa Rais Uhuru Kenyatta ili yashughulikiwe.

Categories
Habari

Anne Kananu sasa ndiye Kaimu Gavana wa Nairobi

Siku tatu tu baada ya kuapishwa kuwa Naibu Gavana wa Kaunti ya Nairobi, Anne Kananu Mwenda amepanda ngazi na kuwa Kaimu Gavana wa kaunti hiyo.

Hii ni baada ya Spika wa Bunge la Kaunti ya Nairobi Benson Mutura kumkabidhi mamlaka hayo aliyoshikilia baada ya Mike Sonko kutimuliwa mamlakani.

Kananu aliandikisha historia kuwa naibu gavana wa kwanza mwanamke katika kaunti hiyo baada ya kuapishwa na Jaji John Mativo siku ya Ijumaa wiki iliyopita.

Aliapishwa baada ya kusailiwa na kuidhinishwa na Bunge la Kaunti hiyo, kufuatia kuondolewa kwa kesi iliyozuia kusailiwa kwake tangu ateuliwe na aliyekuwa Gavana Mike Sonko mnamo Januari mwaka wa 2020.

Kwenye hotuba yake ya kukubali wadhifa huo, Kananu ameahidi kujiepusha na siasa na kuzingatia utoaji wa huduma bora kwa wakazi wa kaunti ya Nairobi.

Amesema kuwa ataongoza kwa mfano na kushirikiana vyema na Bunge la Kaunti ya Nairobi, serikali ya taifa na uongozi wa shirika la huduma za jiji la Nairobi.

Kananu ametoa wito kwa wakazi wa Nairobi kutoa maoni kuhusu huduma wanazopewa na serikali ya kaunti hiyo.

Haya yanajiri huku baadhi ya viongozi na Wakenya wakitilia shaka uhalali wa mchakato huo, huku Chama cha Mawakili nchini (LSK) kikiapa kuelekea mahakamani kupinga uteuzi wa Kananu kuwa Naibu Gavana wa Nairobi.

Categories
Habari

LSK yapinga vikali kuapishwa kwa Kananu kuwa Naibu Gavana wa Nairobi

Chama cha Wanasheria humu nchini (LSK) kimesema kitawasilisha kesi mahakamani kupinga hatua ya kuapishwa kwa Anne Kananu Mwenda kuwa Naibu Gavana wa Kaunti ya Nairobi.

Rais wa chama hicho Nelson Havi ametaja hatua ya kuapishwa kwa Kananu kuwa mapinduzi dhidi ya katiba ya taifa hili.

Haraka iliyokuwepo katika kusailiwa kwa Kananu, kuidhinishwa kwake na Bunge la Kaunti ya Nairobi na hatimaye kuapishwa siku ya Ijumaa, imeibua maoni tofauti miongoni mwa Wakenya, vyama vya kisiasa, wanaharakati na pia mawakili, huko wengi wakitilia shaka uhalali wa utaratibu huo.

Kuapishwa kwake kuwa Naibu Gavana wa kwanza mwanamke katika Kaunti ya Nairobi huenda kukasababisha kuwasilishwa kwa kesi mbali mbali mahakamani kuanzia Jumatatu.

Chama cha Thirdway Alliance Kenya, ambacho tayari kimewasilisha kesi mahakamani dhidi ya Kananu, kimeshtumu utaratibu huo na kuutaja kuwa haramu na ishara wazi ya kutotiliwa maanani kwa  utawala wa sheria.

Categories
Michezo

Kenya kuwania maandalizi ya mashindano ya dunia ya mwaka 2025

Kenya inatarajiwa kutuma maombi ya kuandaa mashindano ya riadha ya dunia ya mwaka 2025 kufuatia shirikisho la riadha duniani kutangaza kufungua shughuli ya kuwasilisha maombi kwa mataifa yanayonuia kuwa mwenyeji wa mashindano mbalimbali.

Kwa mjibu wa Afisa wa baraza kuu katika chama cha Riadha Kenya Bernaba Korir Kenya itatuma maombi kuandaa mashindano hayo na ina uwezo wa miundo msingi.

“Kenya kwa sasa tuna uwezo wa kuandaa mashindano ya dunia ya watu wazima baada ya kuandaa mashindano ya dunia kwa chipukizi walio chini ya umri wa miaka 18 mwaka 2017 kwa njia ya kufana na pia mashindano ya siku moja  ya Kip Keino Classic Continental tour”akasema Korir

Shirikisho la riadha Ulimwenguni limetenga mashindano ya dunia ya mwaka 2025 kuandaliwa barani  Afrika,huku Kenya na Nigeria wakionyesha azma ya kuwa mwenyeji wa mashindano hayo makuu.

Endapo Kenya itaboresha miundo mbinu ina fursa nzuri kupokezwa maandalizi hayo badala ya nigeria baada ya kuandaa mashindano ya kufana ya mbio za nyika mwaka  mwaka 2007 mjini Mombasa,mashindano ya dunia kwa chipukizi walio chini ya umri wa miaka 18 mwaka 2017 jijini Nairobi,mashindano ya Kip Keino Classic Continental tour mwaka jana na pia Kenya itaandaa mashindano ya dunia ya mwaka huu kwa vijana walio chini ya umri wa miaka 20 sawia na yale ya Kip Keino Classic Continental tour.

Mashindano mengine ambayo yako wazi kwa mataifa wanachama kutuma maombi ya maandalizi ni  makala ya kwanza  ya  mbio za barabarani  mwaka 2023  yatashuhudia wanariadha wakishandana katika mbio za umbali wa kilomita 5 barabarani na  yale ya kupokezana kijiti duniani mwaka 2023 sawia na mashindano ya dunia ya riadha  ya mwaka 2025  .

Endapo Kenya itafaulu katika kuwania maandalizi ya mashindano hayo ya duna ya mwaka 2025 ,taifa hili litakuwa la kwanza Afrika kupokezwa maandalizi ya mashindano makuu zaidi ya riadha.

 

 

 

 

 

 

Categories
Habari

NMS yazindua mpango wa kutoa misaada ya barakoa shuleni

Halmashauri ya Usimamizi wa Huduma katika Jiji la Nairobi, NMS, imezindua shughuli ya utoaji barakoa shuleni ikilenga shule zote za kaunti ndogo 17.

Halmashauri hiyo inasema kila mwanafunzi atapokea barakoa mbili kupitia mchango uliotolewa na kampuni ya Kings Collection.

Kwenye taarifa, halmashauri hiyo imesema wafanyikazi wa Kaunti ya Nairobi tayari wametoa barakoa 700 kwa wanafunzi wa shule ya msingi ya Kwa Reuben, barakoa 2,000 kwa wanafunzi wa shule ya Our Lady of Nazareth na zengine 2,000 kwa wanafunzi wa shule ya St. Elizabeth Makadara.

Aidha, shughuli ya uhamasisho kuhusu ugonjwa wa COVID-19 inaendelea ikiongozwa na maafisa wa afya wa Kaunti ya Nairobi.

Categories
Habari

Afueni kwa Sonko baada ya Mahakama kusimamisha uchaguzi mdogo wa ugavana Nairobi

Mahakama Kuu Jijini Nairobi imesimamisha maandalizi ya uchaguzi mdogo wa ugavana katika Kaunti ya Nairobi.

Mahakama hiyo imeamuru kusitishwa kwa maandalizi ya uchaguzi huo hadi pale kesi iliyowasilishwa na aliyekuwa Gavana wa kaunti hiyo Mike Mbuvi Sonko itakaposikizwa na kuamliwa.

Tume Huru ya Uchaguzi na Mipaka nchini, IEBC, ilikuwa imeratibu uchaguzi huo kufanyika tarehe 18 mweza Februari mwaka huu.

Kiti hicho cha ugavana kiliachwa wazi baada ya wanachama wa Bunge la Kaunti ya Nairobi kupitisha hoja ya kumuondoa mamlakani Sonko kwa madai ya ufisadi, ukosefu wa uwezo wa kuendesha shughuli za kaunti hiyo miongoni mwa madai mengineyo.

Bunge la Seneti baadaye liliidhinisha kubanduliwa kwa Sonko.

Watu kadhaa tayari wametangaza azma ya kuwania kiti hicho, akiwemo Wakili tata Miguna Miguna anayegombea kwa tiketi ya chama cha Thirdway Alliance Kenya, Dennis Waweru wa chama cha Jubilee, aliyekuwa Mbunge wa Starehe Margaret Wanjiru, na wengineo.

Categories
Habari

Kadinali Njue ajiuzulu wadhifa wa Askofu Mkuu wa Nairobi

Kadinali John Njue amejiuzulu kutoka wadhifa wa Askofu Mkuu wa Kanisa Katoliki, Jimbo Kuu la Nairobi.

Kadinali Njue amejiuzulu baada ya kutimiza umri wa kustaafu kwa maaskofu wa Kanisa Katoliki.

kwa mujibu wa kanuni za kanisa hilo, askofu anapaswa kustaafu anapofikisha umri wa miaka 75.

Taarifa kutoka kwa afisi ya uchapishaji habari ya Holy See imesema kwamba Baba Mtakatifu Francis wa Kanisa Katoliki amekubali hatua ya kujiuzulu kwa Kadinali Njue na amemteua Askofu Msaidizi David Kamau kuwa Msimamizi wa Jimbo Kuu la Nairobi.

Njue aliyezaliwa mwaka wa 1944 katika eneo la Kiriari, Kaunti ya Embu, alihudumu kama Askofu Mkuu wa nne wa Kanisa Katoliki katika Jimbo Kuu la Nairobi kuanzia mwaka wa 2007 hadi 2021.

Categories
Habari

Afisa wa Polisi auawa kwa kupigwa risasi baada ya kumuuwa afisa mwenza

Afisa wa polisi mwenye utovu wa maadili ameuawa kwa kupigwa risasi baada ya kumuuwa afisa mwenzake kwenye makabiliano katika eneo la Kamukunji, Jijini Nairobi.

Afisa mwingine wa polisi alipigwa risasi na kujeruhiwa vibaya mkononi wakati wa mtafaruku huo wa usiku wa kuamkia Jumapili.

Muathiriwa wa kwanza alikuwa Konstebo Maureen Achieng, ambaye aliuawa kwa kupigwa risasi ndani ya gari la polisi wakati yeye na wenzake walipokuwa wakijiandaa kwenda kwa doria za usiku.

Polisi na watu walioshuhudia kisa hicho wanasema Konstebo Lawrence Ewoi alianza kugombana na Achieng kwa sababu zisizojulikana nje ya kituo hicho cha polisi.

Ugomvi huo uliendelea kwa muda mfupi kabla ya Ewoi aliyekuwa amejihami kwa bunduki kumfyatulia mwenzake risasi nne akiwa ameketi kwenye gari la polisi.

Risasi hizo pia zilimjeruhi Konstebo George Gitonga kwenye mkono wa kushoto na akapelekwa hospitalini.

Polisi wanasema Achieng alithibitishwa kuaga dunia alipofikishwa katika Hospitali ya Kitaifa ya Kenyatta, naye Gitonga akalazwa katika hospitali hiyo.

Ewoi alitoroka lakini polisi wakaanzisha msako mkubwa wa kumtafuta.

Saa moja baadaye walimfumania na kumuua kwa kumpiga risasi karibu na Soko la Burma.

Mkuu wa Polisi katika eneo la Nairobi, Rashid Yakub, amesema kilichosababisha shambulizi la kwanza hakijabainika.

Categories
Habari

Afisa wa Polisi akamatwa Gigiri baada ya kumuua rafikiye kwa kumtandika risasi kumi

Afisa mmoja wa polisi amekamatwa baada ya kumuua rafikiye kwa kumpiga risasi walipogombana katika eneo la Gigiri, Jijini Nairobi.

Afisa huyo wa cheo cha Konstebo anayehudumu katika Kituo kidogo cha Polisi cha Nyari, eneo la Gigiri, anazuiliwa kufuatia mauaji hayo ya usiku wa kuamkia leo dhidi ya rafikiye.

Edgar Mokamba alitumia bunduki yake aina ya AK 47 kumpiga risasi kumi rafikiye ambaye alikuwa kwenye gari lake lililokuwa limeegeshwa katika kituo hicho cha polisi baada ya ugomvi kati ya wawili hao.

Wakati maafisa wengine wa polisi walipofika mahali pa tukio hilo, walipata mwili wa mwathiriwa kwenye kiti cha dereva.

Walioshuhudia kisa hicho wanasema afisa huyo ambaye alikuwa akitafuna miraa na marehemu alipokonywa bunduki hiyo mara moja.

Afisa Mkuu wa Polisi Kaunti ya Nairobi Rashid Yakub amesema makachero wanachunguza kisa hicho ili kubaini lengo la mauaji hayo.

Mwathiriwa alikuwa mgeni wa mara kwa mara katika kituo hicho cha polisi lakini haikubainika iwapo alikuwa mpasha habari kwa polisi au rafiki tu.