Categories
Michezo

KCB FC na Wazito FC zaibuka kidedea

Baada ya kuambulia kichapo katika mechi za raundi ya kwanza ya ligi kuu wiki jana,timu ya Wazito Fc imesajili ushindi wa kwanza leo kwa  kuwalemea Vihiga United mabao 3-1 katika mchuano wa ligi kuu uliosakatwa  Ijumaa alasiri katika uwanja wa kaunti ya Narok,.

Wazito walichukua uongozi wa pambano hilo kunako dakika ya 12 ya mchezo kupitia kwa  mshambulizi Boniface Omondi kabla ya beki Dennis Ng’ang’a kuongeza la pili robo saa baade huku wakiongoza 2-0 kufikia mapumziko.

Mshambulizi wa zamani  Leopards Wyvone Isuza aliongeza bao la tatu katika dakika ya 54 lakini  Norman Werunga  akapachika goli la kufutia machozi kwa wageni  katika  dakika ya 64.

Iilikuwa mechi ya pili mtawalia  kwa Vihiga united kupoteza tangu warejee kwenye ligi kuu ,baada ya kuangushwa pia kwa bao moja kwa sifuri na Kakamega Homeboyz wiki jana.

Wahifadhi hela KCB waliibwaga Nairobi City Stars  goli 1-0 katika mchuano mwingine wa Ijumaa uwanjani Kasarani.

Bao la pekee na la ushindi kwa Kcb ilikipachikwa kimiani na Difenda Henry Onyango kunako dakika ya 43.

Mechi mbili zaidi za mzunguko wa pili wa ligi kuu kupigwa Jumamosi Nzoia Sugar wakiwaalika Kariobangi Sharks uwanjani Sudi kuanzia saa tisa huku Tusker Fc na Bandari fc wakimenyana uwanjani Kasarani kaunzia saa tisa pia.

Categories
Michezo

City Stars warejea ligini kwa madaha na kuifyonza Nzoia Sugar

Mabingwa wa ligi ya daraja ya pili nchini Kenya msimu jana , Nairobi City Stars walianza vyema maisha mapya ya ligi kuu FKF Jumapili adhuhuri baada ya kuwalabua Nzoia Sugar Fc magoli mawili bila jawabu katika uchanjaa wa kaunti ya Narok.

Nahodha Anthony Muki Kimani alifungua ukurasa kwa vijana hao wa mtaani Kawangware kwa bao la dakika ya 16 alipofyatua tobwe kutoka nje ya kijisanduku na dakika mbili baadae Oliver Maloba akakongomelea msumari wa mwisho kwenye jeneza na wakuza miwa Nzoia na kudumisha ushindi huo hadi kipenga cha mwisho.

City Stars walijihakikishia uhsindi baada ya penati ya  Nzoia sugar kupanguliwa na kipa wa City Stars  Steve Njuge katika kipindi cha pili.

Awali pambano hilo lilikuwa lipigwe uwanjani Nyayo kuanzia saa tisa alasiri , lakini likahamishiwa Narok huku mida ya kuchezwa pia ikirudishwa nyuma kutoka saa tisa hadi saa saba kutoka na mvua kubwa ambayo hunyesha kaunti Narok katika majira ya sasa.

Mvua kubwa ilikuwa ikinyesha katika kipindi cha kwanza ,kabla ya kupusa kunako kipindi cha pili .

Kwenye matokeo mengine   wahifadhi hela KCB waliisasambua Posta Rangers mabao 3-0 katika uwaja wa Utalii Derrick Otanga, Henry Onyango na  Enock Agwanda wakicheka na nyavu mara moja kila mmoja na kuendeleza matokeo bora ya   KCB ligini kutoka msimu jana.

Msimu mpya wa ligi kuu mwaka 2020/2021 ulianza rasmi Jumamosi huku ukitarajiwa kukamilika Mei mwakani.