Categories
Kimataifa

Afueni kwa Trump baada ya Bunge la Seneti kupungukiwa na kura za kumshitaki

Bunge la Seneti la Marekani limekosa kufikisha thuluthi mbili ya kura ili kumshitaki aliyekuwa rais wa taifa hilo Donald Trump kwa kosa la kuchochea uvamizi wa majengo ya bunge ya Capitol tarehe 6 mwezi Januari.

Maseneta 57 walipiga kura ya kumshitaki Trump, wakiwemo saba wa chama cha Republican, huku 43 wakipinga hoja hiyo.

Kura hiyo ilikosa uungwaji mkono wa maseneta 10 kufikisha angalau kura 67 zilizohitajika kumshitaki Trump.

Baada ya kuondolewa  kesi hiyo, Trump alitoa taarifa akishutumu jaribio hilo, akisema ni jaribio baya zaidi la kutaka kumpata na makosa kiongozi wa taifa katika historia ya taifa hilo.

Hii ilikuwa mara ya pili ya jaribio la kumshitaki Trump.

Iwapo angeshitakiwa, basi hangeweza tena kuwania wadhifa wowote katika Bunge la taifa hilo.

Baada ya kura hiyo, seneta mwandamizi wa bunge la Seneti wa chama cha Republican Mitch MacConnel alisema Trump alichochea uvamizi wa bunge na wafuasi wake na kukitaja kitendo hicho kuwa cha fedheha na utepetevu wa majukumu.

Awali, alipiga kura kupinga kesi hiyo akiitaja kuwa ukiukaji wa katiba kwa kua sasa Trump si kiongozi wa taifa hilo.

Hata hivyo alisema bado Trump anaweza kuwajibishwa na mahakama.

Categories
Kimataifa

Rais mpya wa Marekani Joe Biden aanza kazi rasmi kwa mageuzi ya sheria

Rais wa Marekani Joe Biden ameanza kazi rasmi kwa kutangua baadhi ya sera za aliyekuwa rais wa nchi hiyo anayeondoka Donald Trump, saa chache baada ya kuapishwa.

Amesema hakuna muda wa kupoteza kukabiliana na changamoto zinazokabili taifa hilo.

Biden ametia saini miswada 15 ya sheria, za kwanza zikiwa kuimarisha uwezo wa majimbo ya taifa hilo kupambana na athari za ugonjwa wa COVID-19.

Nyingine zinanuiwa kufutilia mbali baadhi ya sera za utawala wa Trump hasa kuhusu mabadililko ya hali ya hewa na uhamiaji.

Biden tayari ameanza kutekeleza majukumu yake muda mfupi baada ya kuapishwa kuwa rais wa 46 wa Marekani.

Sherehe ya kuapishwa kwa Biden ilikuwa ya aina yake, huku vizuizi kadhaa vikiwekwa kutokana na janga la COVID-19 na watu wachache wakiruhusiwa kuhudhuria sherehe hiyo.

Aidha sherehe ya viapo ilihudhuriwa na watu wachache kinyume cha ilivyokuwa awali.

Trump, ambaye kufikia sasa hajawahi kukubali kushindwa, hakuhudhuria sherehe hiyo na hivyo kubeza desturi ambayo imedumu kwa muda mrefu katika historia ya taifa hilo.

Categories
Kimataifa

Mwanamke anayedaiwa kuiba kompyuta ya Spika Pelosi Marekani atiwa nguvuni

Mfuasi mmoja wa Donald Trump anayeshukiwa kuiba kipakatalishi kutoka kwa afisi ya Spika Nancy Pelosi wakati wa uvamzi wa jengo la bunge nchini Marekani amekamatwa.

Riley June Williams, mwenye umri wa miaka 22, alikamatwa huko Pennsylvania kwa mashtaka ya kuzua vurugu na kuingia kinyume cha sheria katika jengo la bunge.

Mpenziwe wa zamani alisema kupitia hati ya kiapo kwamba Williams alikusudia kuuza data iliyokuwa kwenye kipakatalishi hicho kwa majususi wa Urusi.

Watu watano walifariki baada ya kundi la wafuasi wa Trump kuvamia jengo la Bunge tarehe sita mwezi huu.

Kesi ya Williams ni moja tu kati ya zaidi ya kesi 200 ambazo zimefunguliwa tangu uvamnizi huo uliotekelezwa wakati wabunge walipokutana kuthibitisha uchaguzi wa Joe Biden.

Categories
Kimataifa

Vitengo vya usalama nchini Marekani kukabiliana na maandamano mapya ya wafuasi wa Trump

Maafisa wa usalama nchini Marekani wamejiandaa kukabiliana na msururu wa maandamano ya wafuasi wa Rais Donald Trump.

Inadaiwa kuwa wafuasi hao wamepanga kufanya maandamano katika siku zilizosalia kabla ya kuapishwa kwa Rais Mteule Joe Biden tarehe 20 mwezi huu.

Majimbo kadhaa yakiwemo California, Michigan, Pennsylvania, Kentucky na Florida yameweka maafisa wa usalama kwenye hali ya tahadhari ili kukabiliana na maandamano hayo.

Maafisa katika jimbo la Washington DC pia wameajiandaa kwa ghasia hizo baada ya tukio la tarehe sita mwezi huu ambapo wafuasi wa Rais Trump walivamia majengo ya bunge.

Usalama umeimarishwa baada ya shirika la upelelezi la FBI kuonya vitengo vya usalama kuhusu kutokea kwa wimbi jipya la maandamano katika majimbo yote 50 nchini Marekani hadi siku ya ambayo Biden ataapishwa.

Wataalamu wanadai kuwa maandamano hayo yatakuwa makali zaid katika majimbo ya Wisconsin, Michigan, Pennsylvania na Arizona.

Vuguvugu moja linalojiiita “Boogaloo” limetangazwa kuwa litaandaa maandamano katika majimbo yote 50.

Categories
Kimataifa

Marekani yagomea uchaguzi mkuu wa Uganda

Marekani haitashiriki katika uangalizi wa uchaguzi mkuu wa Alhamisi nchini Uganda.

Hii ni kutokana na hatua ya tume ya uchaguzi nchini humo kukataa asilimia 75 ya maombi ya Marekani ya kuwapa idhini waangalizi ili kushiriki katika uchaguzi huo.

Kwa mujibu wa Balozi wa Marekani nchini Uganda Natalie Brown, tume hiyo haikutoa maelezo kuhusiana na uamuzi huo, licha ya kuwasilishwa kwa maombi kadhaa.

Amesema kuwa ni waangalizi wachache tu ndio walioteuliwa kutoka kwa kundi la watu 88.

Ameongeza kuwa uchaguzi huo mkuu wa Uganda utakosa uwazi na imani ambayo hutokana na kuwepo kwa waangalizi kutoka mataifa ya nje.

Raia wa Uganda watawachagua wabunge wapya na rais katika uchaguzi huo wa Alhamisi.

Rais Yoweri Museveni, ambaye amekuwa mamlakani kwa miaka 35, atakuwa akiwania muhula wa sita mamlakani.

Hata hivyo Museveni anatarajiwa kukabiliwa na upinzani mkali kutoka kwa mgombea wa upande wa upinzani Bobi Wine.

Categories
Kimataifa

Trump akabiliwa na tishio la kung’atuliwa mamlakani tena

Bunge la Marekani huenda likapiga kura Jumanne kuhusu azma ya kumng’oa Rais Donald Trump mamlakani, kwa mujibu wa afisa mwandamizi wa chama cha Democratic.

Wabunge wa chama hicho wamepania kuchukua hatua hiyo kwa misingi kwamba matamshi ya Trump yalichochea ghasia na uvamizi uliofanywa katika jengo la Capitol Hill ambao pia ulisababisha vifo vya watu watano.

Kiranja wa Bunge hilo James Cyburn anasema kuwa hatua zitachukuliwa wiki hii kutokana na kisa hicho.

Hata hivyo huenda wabunge hao wasiwasilishe kifungu kuhusu mchakato huo katika Bunge la Seneti hadi baada ya siku 100 za utawala wa Joe Biden.

Muda huo utampa fursa Biden kuliunda baraza lake jipya la mawaziri na kuzindua sera mpya, zikiwemo za kukabiliana na janga la COVID-19.

Trump hajatoa matamshi yoyote rasmi tangu alipong’atuliwa kutoka mitandao ya kijamii, hasa ule wa Twitter, siku ya Ijumaa.

Hata hivyo taarifa kutoka Ikulu ya White House zilisema kuwa Rais Trump atafanya ziara huko Texas siku ya Jumanne na kuzuru eneo la mpaka wa nchi hiyo na Mexico, ambako aliamuru kujengwa ukuta wakati wa utawala wake ili kuzuia uhamiaji haramu.

Categories
Kimataifa

Trump aonywa dhidi ya kutumbukia mtegoni kuhusu madai ya vita kati ya Marekani na Israeli

Waziri wa mashauri ya kigeni wa Iran Mohammad Javad Zarif amemhimiza Rais wa Marekani Donald Trump asiangukie mtego kuhusu madai ya njama ya Israeli ya kuzusha vita kwa kushambulia vikosi vya Marekani nchini Iraq.

Alitoa onyo hilo wakati wa maadhimisho ya mauaji yaliyotekelezwa na Marekani nchini Iraq ya Jenerali Qassem Soleimani wa Iran kwa shambulizi la ndege isiyoendeshwa na rubani.

Israeli haikutoa maoni mara moja kuhusu madai hayo.

Marekani inawalaumu wanamgambo wanaoungwa mkono na Iran kwa mashambulizi ya mara kwa mara ya mizinga katika vituo vya Marekani nchini Iraq, ikiwa ni pamoja na shambulizi lililotekelezwa karibu na Ubalozi wa Marekani.

Ujasusi wa hivi punde kutoka Iraq unadokeza kuwa maajenti wa Israeli wanapanga njama ya kutekeleza mashambulizi dhidi ya vikosi vya Marekani ili kuchochea vita na Marekani.

Afisi ya Waziri Mkuu wa Israeli Benjamin Netanyahu na wizara ya mashauri ya kigeni ya Israeli hazijatoa maoni kuhusu madai hayo.

Categories
Kimataifa

Baadhi ya Maseneta Marekani wadinda kuidhinisha ushindi wa Biden

Kundi la maseneta nchini Marekani limesema kuwa litakataa kutia saini stakabadhi za kuthibitisha ushindi wa Rais Mteule Joe Biden, ikiwa hakutabuniwa tume ya kuchunguza madai ya udanganyifu kwenye uchaguzi huo.

Maseneta 11 na maseneta wateule wakiongozwa na Ted Cruz wanataka ukabidhi wa mamlaka kwa Biden uahirishwe kwa siku 10 ili kuwezesha uchunguzi kufanywa kuhusu madai hayo.

Hata hivyo, huenda hatua hiyo isifanikiwe kwa kuwa maseneta wengi wanatarajiwa kumuidhinisha kwa kura Biden tarehe 6 mwezi huu.

Rais Donald Trump amekataa kwamba alishindwa kwenye uchaguzi wa urais uliopita na kudai kuwa kulifanyika udanganyifu, japo hajathibitisha madai hayo.

Juhudi zake za kufwatilia madai hayo zimekataliwa pakubwa na mahakama.

Hata hivyo, alishinda sehemu ndogo ya madai hayo kutokana na kura zilizopigwa kupitia posta katika Jimbo la Pennysylvnia, ambako Biden alishinda kura nyingi kumliko kwenye uchaguzi huo wa urais wa mwaka jana.

Jopo la maseneta katika majimbo muhimu lilithibitisha ushindi wa Biden kwa alama 306 ikilinganishwa na 232 za Rais Trump.

Categories
Kimataifa

Mitch McConnell akosoa wito wa Trump kuhusu msaada kwa waathiriwa wa COVID-19 Marekani

Kiongozi wa chama cha Republican kwenye Bunge la Seneti nchini Marekani Mitch McConnell, amepuuzilia mbali wito wa kuongezwa kwa misaada kwa waathiriwa na janga la Corona.

Wito huo unashinikizwa na Rais Donald Trump, wajumbe wa chama cha Democratic na pia baadhi ya wanachama wa Republican.

McConnell amesema pendekezo la kuongeza misaada hiyo kutoka dola 600 hadi 2,000 kwa kila mwathiriwa itakuwa njia nyengine ya ufujaji wa fedha.

Bunge la Congress lililo na wafuasi wengi wa chama cha Democratic lilikuwa limepiga kura kuongeza misaada ya kuwanusuru raia wa Marekani kutokana na athari za janga la COVID-19.

Mwingilio wa Rais huyo anayeondoka umewagawanya wafuasi wa chama chake cha Republican.

Bunge la Congress lilikuwa limeidhinisha ruzuku ya dola 600 kwa kila muathiriwa wa janga la hilo na pia mswaada kuhusu ufadhili wa serikali ambao Rais Trump aliurejesha bungeni kabla ya siku ya Kristmasi, akisema waathiriwa hao wanapaswa kulipwa fedha nyingi zaidi.

Siku ya Jumatatu, wajumbe wa chama cha Democratic kwenye Bunge la Congress, ambao kwa kawaida huwa mahasimu wa kisiasa wa Rais Trump, waliidhinisha pendekezo lake la malipo ya dola 2,000 kwa kila mhasiriwa.

Wajumbe kadhaa wa chama cha Republican, ambao hawangetaka kuonekana wakimpinga Rais huyo, waliungana na wenzao wa chama cha Democratic katika kuidhinisha malipo hayo.

Ijapo kwa shingo upande, Trump alitia saini mswaada wa awali na kuufanya sheria siku ya Jumapili, lakini hajaacha kuitisha fedha nyingi zaidi.

Categories
Kimataifa

Ndege za Boeing 737 MAX zarejelea safari nchini Marekani

Ndege za abiria aina ya Boeing 737 MAX zimerejeshwa kwenye huduma nchini Marekani.

Ndege hizo sasa zinafanya safari kati ya majiji ya Miami na New York.

Wasimamizi wa safari za ndege walisitisha huduma za ndege hiyo mwezi Machi mwaka wa 2019 kufuatia ajali mbili mbaya zilizotokea katika kipindi cha miezi mitano.

Halmashauri ya safari za ndege ya Marekani (FAA) iliondoa marufuku hayo mwezi uliopita baada ya makubaliano kuhusu viwango vipya vya usalama wa ndege hizo.

Mruko wa kwanza wa ndege hiyo siku ya Jumanne ulithibitisha usalama wa ndege hiyo aina ya 737 MAX.

Shirika la Ndege la American Airlines lina ndege 31 za abiria muundo huo, ikiwa ni pamoja na saba zilizowasilishwa baada ya FAA kuondoa marufuku hayo mwezi Novemba.

Shirika hilo la ndege na kampuni ya Boeing kwa pamoja zimepanga kuwahakikishia wasafiri kuhusu usalama wa ndege hiyo, japo jambo hilohalitakuwa rahisi kwa mujibu wa kura za maoni.