Categories
Kimataifa

Israeli yasambaza dozi 5,000 za chanjo ya corona kwa wahudumu wa afya wa Palestina

Israeli inasema imepeleka dozi elfu tano za chanjo dhidi ya ugonjwa wa COVID-19 kuwachanja wahudumu wa afya wa Wapalestina, ambao wako katika mstari wa mbele.

Israeli ina mojawapo wa mipango bora zaidi ya chanjo duniani, lakini Wapalestina katika eneo inalokalia la ukingo wa Magharibi ya Mto Jordan na ukanda wa Gaza, hawajapokea chanjo.

Huku wataalamu wa Umoja wa Mataifa wakisema Israeli ina wajibu wa kuwapelekea chanjo Wapalestina, Israeli inasema hiyo si sehemu ya itifaki zilizoafikiwa, na haijapokea ombi kutoka kwa wapalestina.

Huku ikiwa na mkataba maalumu na kampuni ya kutengeneza chanjo ya Pfizer, Israeli imewachanja watu wengi zaidi kuliko nchi nyingine yoyote.

Watu milioni 1.7, ambao ni karibu asilimia 20 ya idadi ya watu, tayari wamepokea chanjo zote mbili, huku zaidi ya watu milioni tatu wakipokea chanjo ya kwanza.

Hata hivyo, kafyu ingali inatekelezwa nchini humo.

Categories
Kimataifa

Trump aonywa dhidi ya kutumbukia mtegoni kuhusu madai ya vita kati ya Marekani na Israeli

Waziri wa mashauri ya kigeni wa Iran Mohammad Javad Zarif amemhimiza Rais wa Marekani Donald Trump asiangukie mtego kuhusu madai ya njama ya Israeli ya kuzusha vita kwa kushambulia vikosi vya Marekani nchini Iraq.

Alitoa onyo hilo wakati wa maadhimisho ya mauaji yaliyotekelezwa na Marekani nchini Iraq ya Jenerali Qassem Soleimani wa Iran kwa shambulizi la ndege isiyoendeshwa na rubani.

Israeli haikutoa maoni mara moja kuhusu madai hayo.

Marekani inawalaumu wanamgambo wanaoungwa mkono na Iran kwa mashambulizi ya mara kwa mara ya mizinga katika vituo vya Marekani nchini Iraq, ikiwa ni pamoja na shambulizi lililotekelezwa karibu na Ubalozi wa Marekani.

Ujasusi wa hivi punde kutoka Iraq unadokeza kuwa maajenti wa Israeli wanapanga njama ya kutekeleza mashambulizi dhidi ya vikosi vya Marekani ili kuchochea vita na Marekani.

Afisi ya Waziri Mkuu wa Israeli Benjamin Netanyahu na wizara ya mashauri ya kigeni ya Israeli hazijatoa maoni kuhusu madai hayo.