Mwanaharakati aachiliwa huru baada ya kuzuiliwa kwa miaka miwili Misri

Mwanablogu na mchoraji vibonzo mmoja nchini Misri, ameachiliwa huru baada ya kuzuiliwa kwa zaidi ya miaka miwili.

Shadi Abu Zeid, mwenye umri wa miaka 27, alikamatwa mwezi Mei mwaka wa 2018 kuhusiana na madai ya kueneza habari za uongo na kuwa mfuasi wa kundi la kigaidi.

Shughuli zake ziliangazia maswala ya kidini, jinsia na familia nchini misri.

Katika miaka ya hivi karibuni, mamia ya wanaharakati na wanablogu wamepatikana na hatia ya kueneza habari za uongo, na kulisaidia kundi la Muslim Brotherhood lililopigwa marufuku.

Makundi ya kutetea haki za kibinadamu yamemshtumu Rais Abdul Fattah Al-Sisi kwa kuruhusu msako mkali dhidi ya waasi, baada ya kuongoza jeshi kupindua serikali ya kiongozi wa kwanza aliyechaguliwa kwa njia ya kidemokrasia nchini humo mwaka wa 2013.

Abu Zeid alianza kuchapisha kipindi chake cha vibonzo cha ‘The Rich Content’ kwenye mitandao ya YouTube na Facebook mwaka wa 2015.

Kipindi hicho kilijumuisha matamshi ya dhihaka na mahojiano yasiyo rasmi yaliyoangazia maswala mbalimbali ya kijamii kama vile mitazamo isiyofaa ya kidini na dhuluma za kimapenzi.

Leave a Reply

Your email address will not be published. Required fields are marked *