Frank Lampard apigwa teke Chelsea huku Thomas Tuchel akimrithi

Chelsea imemrusha meneja Frank Lampard huku  Thomas Tuchel  akitarajiwa kutwaa nafasi  yake ugani Stamford Bridge .

Kulingana na mmiliki wa klabu hiyo ya London Roman Abramovic  wamelazimika kumpiga kalamu  Lampard kutokana na matokeo mabovu msimu huu.

“Ni uamuzi mgumu kwa klabu  licha ya kuwa na uhusiano mwema na  Frank Lampard na ninamheshimu sana,lakini tumeona ni bora kufanya mabadiliko ya mkufunzi ,na ninamshukuru kwa kazi yake na kumtakia kila la heri “akasema Abromovic

Chelsea imeripotiwa kukaribia kukamilisha mazungumzo na  Tuchel, ambaye kwa sasa hana kazi tangu atimuliwe kutoka Paris St Germain na anatarajiwa kusaini mkataba wakati wowote.

Lampard ambaye ni mchezaji wa zamani wa Chelsea na timu ya taifa ya Uingereza  amepoteza mechi 5 za ligi kuu Uingereza kati ya 7 licha ya kutumia kitita cha pauni milioni 220  kusajili wachezaji katika uhamisho wa Julai mwaka jana.

Lampard anaiacha Chelsea katika nafasi ya 9 ligini ,alama 11 nyuma ya viongozi Manchester United tangu ateuliwe Julai mwaka 2019.