Categories
Kimataifa

Marekani yatafuta mwafaka na China kuhusu utunzaji wa hewa

Mjumbe maalum wa Marekani John Kerry anaelekea huko Jijini Shanghai ili kuishawishi China kabla ya mkutano wa kimataifa kuhusu hali ya hewa utakaoandaliwa na Rais Joe Biden juma lijalo.

Baada ya mzozo wa kidiplomasia kwenye Umoja wa Mataifa, pande zote mbili zilikubaliana kushirikiana katika juhudi za kupunguza uchafuzi wa anga.

Marekani inaitaka China kusitisha matumizi ya kawi inayotokana na mkaa wa mawe kwenye viwanda vyake vya kuzalisha umeme, na pia  kukoma kufadhili viwanda vya aina hiyo katika nchi za kigeni.

China inataka Marekani kutoa fedha zaidi kwa nchi zinazoendelea ili zijipatie teknolojia inayolinda mazingira na kuafikia viwango vya kimataifa vinavyokubalika vya utunzaji wa hewa.

Aidha, inaitaka Marekani nayo pia ipunguze shughuli za viwanda ili kupunguza uchafuzi wa hewa.

Wataalamu wa kisayansi wameonya kwamba bila makubaliano baina ya mataifa yanayoongoza katika uchafuzi wa hewa, hapana fursa ya  kuepusha janga kutokana na uchafuzi wa hewa duniani.

Categories
Kimataifa

India yaidhinisha chanjo ya Sputnik V kukabiliana na Covid-19

Chanjo ya tatu dhidi ya ugonjwa wa covid-19 imeidhinishwa nchini India, wakati ambapo kumeripotiwa wimbi la pili na ambalo ni hatari zaidi la maambukizi ya Corona.

Dawa ya chanjo ya Sputnik V kutoka Russia imeidhinishwa kuwa salama, na itatumika kwa njia sawa na zile za dawa ya chanjo ya Oxford-AstraZeneca, ambayo inatengezwa nchini India kwa jina la Covishield.

Sputnik V imedhibitishwa kuwa na asilimia 92 ya kinga dhidi ya Covid-19, kulingana na matokeo ya utafiti wa awamu za mwisho mwisho yaliyochapishwa kwenye jarida la The Lancet.

Hadi sasa India imetoa zaidi ya dozi million 100 za aina mbili za dawa zilizoidhinishwa –yaani (Covishield) na(Covaxin).

Kuidhinishwa kwa dawa ya chanjo ya Sputnik V, kumejiri siku moja baada ya India kuipiku Brazil kama nchi ya pili kwa kiwango kikubwa cha cha maambukizi ya corona duniani kote.

Baada ya kunakili zaidi ya visa milioini-13.5 vya maambukizi ya corona, India sasa inashikilia nafasi ya pili nyuma ya Marekani ambayo imenakili zaidi ya visa milioni-31 vya Covid-19.

Huku Brazil ambayo imenakili visa million 13.4 ikishikilia nafasi ya tatu kote duniani.

Categories
Kimataifa

Ireland yawaondolea karantini raia kutoka Albania, Israel na St.Lucia

Jamhuri ya Ireland imewaondolea marufuku ya kuwekwa karantini wageni wanaoingia nchini humo kutoka nchi tatu za kigeni.

Waziri wa Afya wa Ireland Stephen Donnelly ameondoa majina ya nchi za Albania, Israel na St.Lucia kwenye orodha ambayo iliwalazimu wageni kutoka nchi hizo kuwekwa karantini wanapoingia nchini humo.

Hata hivyo wageni sharti wajitenge nyumbani kwa muda wa siku 14, isipokuwa wawe na cheti cha kuonyesha hawana ugonjwa wa korona kilichotolewa siku moja kabla ya kuwasili nchini humo.

Donnely alisema nchi hizo tatu zimeimarisha pakubwa mbinu za kujikinga kutokana na ugonjwa huo.

Aliongeza kuwa mnamo siku zijazo ataongeza majina ya nchi nyingine, ili kuhakikisha Ireland inalindwa kutokana na janga la COVID-19.

Miongoni mwa nchi 16 zinazotarajiwa kuongezwa kwenye orodha hiyo ni Marekani, Ufaransa, Canada, Ubelgiji na Italia.

Categories
Kimataifa

Suluhu azuru Uganda kwa mwaliko wa Museveni

Rais wa Tanzania Samia Suluhu Hassan amezuru nchi ya Uganda kwa hafla ya makubaliano ya usafirishaji mafuta kutoka nchini Uganda hadi kwenye bandari ya Tanga nchini Tanzania.

Mkataba huo unatarajiwa kufanikisha ujenzi wa bomba la mafuta la urefu wa kilomita 1,440 kutoka eneo la Albertine nchini Uganda hadi kwenye bandari hiyo.

Bomba hilo litakalogharimu dola za Marekani bilioni 3.55 litakuwa ndilo refu zaidi linalotumia umeme ulimwenguni.

Kufikia sasa Uganda imegundua mapipa bilioni 6.5 ya mafuta.

Utiaji saini mkataba huo uliahirishwa mwezi jana kufuatia kifo cha aliyekuwa Rais wa Tanzania John Pombe Magufuli.

Categories
Kimataifa

Uchaguzi wa urais nchini Benin wang’oa nanga huku Rais Talon akitaka tano tena

Raia nchini Benin wanapiga kura kwenye uchaguzi wa urais baada ya msururu wa maandamano dhidi ya Rais wa sasa Patrice Talon, ambaye ameshtumiwa kwa kuwakandamiza wapinzani.

Rais Talon, mwenye umri wa miaka 62, alichaguliwa kwa mara ya kwanza mwaka wa 2016 na amepigiwa upatu kuibuka mshindi kwa hatamu ya pili.

Talon, ambaye ni tajiri kutokana na biashara ya pamba na ambaye ameahidi ustawi wa kiuchumi katika uongozi wake, ameshutumiwa na wapinzani wake kwa kuhujumu udhabiti wa demokrasia katika taifa hilo la Afrika Magharibi.

Watu kadhaa waliuawa siku ya Alhamisi katika mji wa Bante wakati maafisa wa usalama walipofyatua risasi kuwatawanya waandamanaji waliokuwa wakipinga kile walichokitaja kama hujuma dhidi ya demikrasia.

Aidha, anashtumiwa kwa kuenda kinyume cha ahadi yake aliyoweka wakati wa kampeni za mwaka wa 2016, aliposema kwamba ataongoza kwa kipindi kimoja tu.

Talon anakabiliana na wagombeaji wawili kwenye uchaguzi huo ambao ni Alassane Soumanou, aliyehudumu kama waziri wakati wa utawala wa rais wa zamani wa nchi hiyo na  mwanasiasa mashuhuri Corentin Kohoue.

Categories
Kimataifa

Waziri Mkuu wa Uingereza kutohudhuria ibada ya wafu ya Mwanamfalme Philip

Waziri Mkuu wa Uingereza Boris Johnson hatahudhuria ibada ya wafu ya mumewe Malikia wa Uingereza, Mwanamfalme Philip Jumamosi ijayo.

Hatua hiyo inadhamiria kuruhusu wanafamilia wengi iwezekanavyo kuihudhuria shughuli hiyo kutokana na vizuizi vya kukabiliana na virusi vya korona.

Kulingana na afisi ya Waziri huyo Mkuu, ni watu 30 wakiwemo watoto wa mwendazake, wajukuu na wanafamilia wa karibu ambao wanatarajiwa kuhudhuria shughuli hiyo itakayofanyika kwenye Kanisa la St. George, Windsor.

Raia wameombwa kutoihudhuria hafla hiyo ili kutoa nafasi nyingi kwa wanafamilia wa karibu.

Mrithi wa Ufalme wa Uingereza, Charles ambaye ni mwanawe marehemu alimtaja babake kama mtu mwema  akisema atamkosa babake aliyempenda sana.

Akiongea nyumbani kwake katika eneo la Gloucestershire, Charles alisema marehemu baba yake alikuwa mtu wa kipekee sana.

Philip aliaga dunia katika Jumba la Windsor mnamo Ijumaa, akiwa na umri wa miaka 99.

Categories
Kimataifa

Ismail Omar Guelleh achaguliwa bila kupingwa kuiongoza Djibouti

Kiongozi mkongwe wa Djibouti Ismail Omar Guelleh alichaguliwa tena kuwa rais kwa muhula wa tano kwa zaidi ya asilimia 98 ya kura zilizopigwa.

Hata hivyo uchaguzi huo ulisusiwa na upinzani.

Raia wapatao 215,000 walisajiliwa kupiga kura kwenye kinyanganyiro kati ya Guelleh mwenye umri wa miaka 73 na mfanyibiashara asiyejulikana ambaye hakuonekena kuwa tisho kwa kiongozi huyo ambaye amekuwa mamlakani tangu mwaka wa 1999.

Shughuli ya kuhesabu kura ilianza muda mfupi baada ya kufungwa vituo vya kupigia kura saa moja usiku katika taifa hilo la upembe wa Afrika ambalo liko katika eneo muhimu la kibiashara kati ya bara Afrika na rasi ya mataifa ya kiarabu.

Waangalizi wa uchaguzi walisema uchaguzi huo uliandaliwa kwa njia shwari.

Awali baada ya kupiga kura katika mji mkuu ambako wakazi wengi wa raia milioni moja wa Djibouti wanaishi, Guelleh alipongeza jinsi uchaguzi huo ulivyoandaliwa kwa njia shwari.

Categories
Kimataifa

Safari ya China katika kukabiliana na umaskini

Je, siri ya China kupunguza umaskini ni nini?

Usawa wa kijinsia katika elimu ni muhimu kufanya umaskini ‘kutorithiwa’.

Na Hassan Zhou

Ofisi ya habari ya Baraza la Serikali la China hivi karibuni ilitangaza waraka uitwao “Kupunguza Umaskini: Uzoefu na Mchango wa China”. Waraka huo umeeleza jinsi Chama cha Kikomunisti cha China CPC kilivyoongoza watu wa China kupambana na umaskini katika miaka 100 iliyopita.

Mwishoni mwa mwaka jana, China ilikuwa imetimiza lengo kuu la kutokomeza umaskini uliokithiri kama ilivyopanga, na kwamba katika kiwango cha sasa ambacho ni juu ya kile cha Benki ya Dunia, watu karibu milioni 100 wanaoishi vijijini wamejikwamua kutoka minyororo ya umaskini.

Lakini je, siri ya China ni nini?

Ebu tuangazie jinsi familia kadhaa za kichina zilivyofanikiwa kuondoka kutoka umaskini, ili upate jibu la swali ili.

Mwalimu Julius Nyerere alisema, “Ukitaka kumsaidia masikini, somesha watoto wake”. Lakini katika juhudi za kuondoa umaskini kwa njia ya elimu, hali ya kutozingatia usawa wa kijinsia ni mojawapo ya vizuizi vinavyohujumu ndoto hii.

Mwaka 2018, mwalimu wa sayansi Peter Tabichi wa shule moja katika kijiji kilichopo eneo la Bonde la Ufa, Kenya alishinda tuzo la mwalimu bora duniani.

Yamkini wanafunzi wote katika shule hiyo walitoka familia maskini, na tukio la wasichana kuacha masomo kwa sababu mbalimbali lilikuwa ni jambo la kawaida.

Mwalimu Tabichi alizitembelea familia za wasichana hao mara kwa mara na kuwasihi na kuwahamasisha wazazi haswa wale ambao hawakuwataka watoto wao kuendeleza masoma na kuwaozesha, wawaruhusu waendelee na masomo yao.

Ukosefu wa usawa katika kupata elimu kutokana na ubaguzi wa kijinsia pia upo katika baadhi ya sehemu maskini nchini China. Bibi Zhang Guimei aliyefundisha wanafunzi katika sehemu maskini kwa miaka 40 siku zote ana matumaini ya “kuwawezesha watoto wa sehemu maskini waingie katika vyuo vikuu bora”.

Baada ya kutafuta michango kwa muda mrefu, mwaka 2008 alifanikiwa kuzindua shule ya kwanza ya wasichana ya serikali ambayo wanafunzi hawalipi gharama yoyote. Wanafunzi wanaoandikishwa katika shule hiyo wote ni wasichana walioshindwa kuendelea na masomo yao baada ya kumaliza masomo ya shule ya msingi kutokana na umaskini.

Na katika miaka 12 iliyopita, shule hiyo imewawezesha wanafunzi zaidi ya 1,800 kujiunga na vyuo vikuu.

Mwaka 2020, mwalimu Zhang alipata tuzo ya kitaifa ili kupongeza juhudi zake katika kuondoa umaskini.

Nchini Tanzania, zaidi ya theluthi mbili za wanawake hawawezi kumaliza masomo ya shule ya sekondari, huku wanawake nchini Kenya wakichukua theluthi moja tu ya watu wanaosoma elimu ya juu.

Mbali na umaskini, sababu nyingine muhimu ya kufanya wasichana kuacha shule ni unyanyapaa dhidi ya wanawake, lakini kuacha masomo kwa wanawake nako pia kutafanya umaskini kurithiwa na kizazi kijacho na kusababisha mzunguko mbaya.

Ni kwa kuzingatia elimu tu, wanawake wanaweza kubadilisha hatma yao na hata ya familia nzima, na mwisho kupata mlango wa kupitia na kuafikia  maisha bora, kwani imenenwa kuwa “elimu ni ufunguo wa maisha”.

Miaka 28 iliyopita, picha ya yenye maandishi “nataka kusoma shuleni” iliwafanya raia wa China tumkumbuke msichana anayeitwa Su Mingjuan pamoja na macho yake makubwa ya kutamani elimu.

Kutokana na msaada wa serikali na jamii nzima, msichana huyo alimaliza shule ya msingi, shule ya sekondari, shule ya sekondari ya juu na mwisho kuingia katika chuo kikuu.

Sasa anaishi maisha mazuri, na pia amezindua hazina ya kuwasaidia wanafunzi wa vyuo vikuu wanaotoka familia maskini.

Kutoka mtu anayepokea msaada hadi mtu anayetoa msaada, kutoka msichana maskini hadi mtu anayeishi maisha yenye heshima, maisha ya Su Mingjuan imenikumbusha msemo mmoja wa Kiswahili unaosema “ukimfundisha mwanamke mmoja ni sawa na kuelimisha jamii nzima.”

Ikiwa una swali ama maoni kuhusu makala hii, unaweza kuwasiliana nami kupitia anwani zifuatazo:

Barua pepe: 64909787@qq.com

Facebook: @yoyoasema

Categories
Kimataifa

Mumewe Malkia Elizabeth wa Uingereza, Mwanamfalme Philip, afariki

Mwanamfalme Philip, ambaye ni mumewe Malkia Elizabeth wa Uingereza ameaga dunia.

Kwa mujibu wa taarifa kutoka kwa Kasri ya kifalme ya Buckingham, Philip amefariki leo akiwa na umri wa miaka 99.

Taarifa hiyo imeeleza kuwa Mwanamfalme Philip ameaga dunia kwa amani akiwa katika jumba la Windsor.

Philip alimuoa aliyekuwa Bintimfalme Elizabeth mnamo mwaka wa 1947, miaka mitano kabla kuwa malkia.

Wawili hao walijaliwa kuzaa watoto wanne, na hadi kufariki kwa Philip, walikuwa na wajukuu wanane na vitukuu 10.

Categories
Kimataifa

Uganda na Misri zakubaliana kubadilishana habari za kijasusi

Uganda na Misri zimetia saini mkataba wa kubadilishana habari za ujasusi huku kukiwa na ongezeko la wasi wasi katika eneo hilo kuhusu ujenzi wa bwawa kubwa na Ethiopia kwenye mto mmoja unaomimina maji yake kwenye mto Nile.

Kwenye taarifa kwa vyombo vya habari, jeshi la Uganda lilisema mkataba huo uliafikiwa kwenye mazungumzo kati ya maafisa waandamizi wa ujasusi katika majeshi ya nchi zote mbili.

Kwa muda mrefu, bwawa hilo limekuwa kiini cha mizozo kati ya Misri na Ethiopia, huku Rais wa zamani wa Marekani Donald Trump akionya mwaka uliopita kwamba Misri huenda ikalipua bwawa hilo.

Ethiopia inachukulia mradi huo wa uzalishaji nguvu za umeme kuwa muhimu kwa ustawi wake kiuchumi na pia chanzo muhimu cha kawi.

Lakini Misri na Sudan, zinahofia kwamba mradi huo wa dola bilioni 4 utadhoofisha vibaya uwezo wao wa kupata maji.

Uganda ndiyo chanzo cha mto White Nile, ilhali chanzo cha mto Blue Nile kiko nchini Ethiopia.