Categories
Kimataifa

Uganda yakana madai kwamba viongozi wakuu serikalini wamechanjwa kisiri dhidi ya COVID-19

Waziri wa Afya nchini Uganda Jane Aceng amekanusha taarifa kwamba viongozi wa juu wa serikali wamepata chanjo dhidi ya COVID-19 hata kabla ya taifa hilo kupokea rasmi chanjo hizo.

Kwenye ujumbe wa Twitter, Aceng amesema rais na wandani wake wa karibu hawajapokea chanjo hizo jinsi ilivyodaiwa.

Uganda inatarajiwa kupokea dozi laki moja za chanjo kutoka kampuni ya India, AstraZeneca na nyingine 300,000 kutoka kampuni ya Sinopharm ya Uchina.

Hata hivyo, haijathibitishwa ikiwa chanjo hizo zimewasili katika taifa hilo ambalo kufikia sasa limethibitisha visa 40,221 vya COVID-19.

Kumekuwa na mgogoro katika usambazaji wa chanjo hizo duniani, huku Rais wa Rwanda Paul Kagame akikerwa na unafiki na hujuma kwenye usambazaji wa chanjo hizo hasa kwa mataifa yenye kipato cha chini.

Rais Kagame alisema hayo kwenye ujumbe wake baada ya Mkurugenzi Mkuu wa Shirika la Afya Duniani (WHO) Tedros Adhanom Ghebreyesus kusema kuwa makubaliano kati ya nchi tajiri na watengenezaji wa chanjo hizo yametatiza ununuzi na usambazaji wa chanjo hizo kupitia mpango wa Covax.

Mpango wa Covax unanuia kuhakikisha usawa katika usambazaji wa chanjo dhidi ya COVID-19 miongoni mwa mataifa yote duniani.

Mnamo mwezi Disemba, vuguvugu la People’s Vaccine Alliance lilionya kwamba asilimia 70 ya mataifa ya kipato cha chini yataweza kutoa chanjo kwa asilimia kumi pekee ya raia wake.

Lilitoa wito kwa kampuni zinazotengeneza chanjo hizo kutoa habari kuhusu teknolojia inayotumika ili kurahisisha utengenezaji na kuwawezesha watu wengi zaidi kupata chanjo hizo.

Categories
Kimataifa

Mohamed Bazoum atangazwa kuwa Rais mpya wa Niger

Tume ya uchaguzi Nchini Niger imemtangaza mgombea wa chama kinachotawala nchini humo, Mohamed Bazoum, mshindi wa marudio ya uchaguzi wa urais.

Mwenyekiti wa Tume Huru ya Kitaifa ya Uchaguzi (CENI), Issaka Souna, alitangaza kuwa Bazoum amepata asilimia 55.75 ya kura zilizopigwa mnamo Februari 21.

Bazoum alimshinda rais wa zamani Mahamane Ousmane ambaye alipata asilimia 44.25 ya kura hizo.

Kwenye duru ya kwanza ya uchaguzi huo mnamo tarehe 27 Disemba mwaka uliopita, Bazoum aliongoza matokeo kwa kupata asilimia 39 ya kura hizo huku Ousmane akimfuata kwa takriban asilimia 17 ya kura.

Mapema Jumanne, waendeshaji kampeni wa Ousmane walidai udanganyifu ulitokea pamoja na wizi na pia visa vya kujazwa kwa masanduku ya kura na vitisho dhidi ya wapiga kura bila kutoa ushahidi.

Rais anayeondoka Mahamadou Issoufou anang’atuka madarakani kwa hiari baada ya kuhudumu mihula miwili ya miaka mitano kila mmoja.

Itakuwa ni mara ya kwanza kwa taifa hilo kushuhudia kupokezana madaraka kati ya viongozi wawili waliochaguliwa tangu nchi hiyo ipate uhuru kutoka kwa Ufaransa mnamo 1960.

Taifa hilo limeshuhudia mashambulizi kutoka kwa makundi ya kigaidi yaliyojihami kutoka nchi jirani za Mali na Nigeria.

Siku ya marudio ya kura hizo, maafisa saba wa tume ya CENI waliaga dunia baada ya gari lao kukanyaga bomu lililotegwa ardhini Magharibi mwa eneo la Tillaberi.

Categories
Kimataifa

Kesi ya ufisadi dhidi ya Jacob Zuma kuanza mwezi Mei

Mahakama moja ya Afrika kusini imesema kuwa kesi ya ufisadi dhidi ya aliyekuwa Rais wa nchi hiyo Jacob Zuma na kampuni moja ya ulinzi ya Ufaransa Thales kuhusiana na mkataba wa kununua silaha wa zaidi ya dola bilioni mbili inaanza mwezi Mei.

Zuma anakabiliwa na mashtaka 16 yakiwemo ufujaji na ulanguzi wa pesa ambayo ameyakanusha yote.

Zuma anadaiwa kupokea kinyume cha sheria malipo ya kila mwaka kutoka kampuni ya Thales baada ya kuafikiana kuhusiana na maswala ya silaha mwaka wa 1999.

Zuma alitwaa wadhifa wa naibu wa Rais nchini Afrika kusini mwaka wa 1999 na kutwaa urais mwongo mmoja baadaye.

Mshauri wake wa kifedha Schabir Shaikh alipatikana na hatia ya kujaribu kuitisha hongo kutoka kwa kampuni hiyo ya Ufaransa na kufungwa jela mwaka wa 2005. 

Kesi dhidi ya Zuma ilitupiliwa mbali pindi tu baada yake kuwania urais mwaka wa 2009. 

Hata hivyo siku ya Jumanne, mahakama kuu ya Pietermaritzburg imesema kuwa kesi hiyo itaanza kusikizwa tena tarehe 17 mwezi Mei mwaka huu.

Categories
Kimataifa

Chanjo dhidi ya Ebola yawasili nchini Guinea

Ndege maalum iliyobeba shehena ya chanjo za ugonjwa wa Ebola imewasili nchini Guinea, hatua ambayo itawezesha kuzinduliwa kampeni ya chanjo baadaye.

Shirika la afya duniani,WHO linasema dozi hizo elfu-11, ambazo zimewasili katika mji mkuu wa Conakry zitapelekwa karibu na mji ulioko kusini-mashariki wa Nzérékoré saa kadhaa kabla ya kuanza kutolewa chanjo hiyo.

Dhoruba ya vumbi katika jangwa la Sahara ililazimu ndege hiyo kubadili mkondo siku ya Jumapili na kuelekea nchini Senegal.

Watu watano walifariki hivi majuzi nchini Guinea baada ya kuugua ugonjwa wa Ebola hivyo vikiwa visa vya kwanza katika muda wa miaka mitano.

Kati ya mwaka 2013 na 2016 zaidi ya watu elfu -11 walifariki huko Afrika magharibi kufuatia chamko la ugonjwa huo ambalo lililoanzia nchini Guinea.

Lengo la kampeni hiyo ni kuwachanja wale waliotangamana na wagonjwa wanaougua Ebola na wahudumu wa afya walioko mstari wa mbele katika kukabiliana na ugonjwa huo.

Categories
Kimataifa

Bomu la ardhini laangamiza maafisa saba wa Tume ya Uchaguzi nchini Niger

Maafisa saba wa Tume ya Uchaguzi ya Niger (CENI) wameuawa wakati wa duru ya pili ya uchaguzi wa urais wakati gari lao lilipokanyaga bomu la kutegwa ardhini katika sehemu ya Tillaberi.

Taifa hilo hukumbwa mara kwa mara na mashambulizi kutoka kwa makundi ya watu waliojihami kwa silaha.

Mojawapo ya makundi hayo lilikuwa linamlinda mgombea wa urais wa chama tawala Mohamed Mazoum ambaye anapambana na aliyekuwa rais wa nchi hiyo Mahamane Ousman.

Sehemu ya Tillaberi inapakana na nchi tatu ambazo ni Niger, Burkina Fasso na Mali, ambako vikundi vya wanamgambo wenye uhusiano na kundi la kigaidi la Al-Qaeda na lile la ISIL hufanya mashambulizi ya mara kwa mara katika eneo la jangwa la Sahel.

Maelfu ya askari walipelekwa kote nchini Niger kulinda usalama wakati wa kura hiyo ili kuhakikisha kipindi salama cha mpito, ambacho kitakuwa cha kwanza tangu nchi hiyo ijinyakulie uhuru kutoka kwa Ufaransa mwaka wa 1960.

Rais anayeondoka Mahamadou Issoufu ameng’atuka kwa hiari baada ya kukamilisha vipindi viwili vya utawala vya miaka mitano kila kimoja.

Uamuzi huo ulipongezwa na wengi hasa katika sehemu hiyo ambako viongozi hung’ang’ania kusalia mamlakani.

Categories
Kimataifa

Wanafunzi wote nchini Uingereza kuchanjwa dhidi ya covid-19

Waziri mkuu wa Uingereza Boris Johnson ameahidi kwamba wanafunzi wote huko Uingereza watapewa chanjo yao ya kwanza dhidi ya korona kufikia mwisho wa mwezi Julai.

Zaidi ya watu milioni 17 wamepokea chanjo hiyo tangu shughuli hiyo kuanzishwa nchini humo mwezi Disemba mwaka jana.

Boris amesema anataka mpango huo kuharakishwa.

Amesema chanjo ya mwezi Julai itawasaidia watu wasiojimudu na kusaidia katika kulegeza masharti ya kuzuia kuenea kwa ugonjwa huo nchini humo.

Afisa mkuu wa huduma za afya nchini humo Sir Simon Stevens amesema kuna dalili kwamba chanjo iliyotolewa hapo awali imesaidia kupunguza maambukizi na watu kulazwa hospitalini.

Hayo yanajiri huku mji wa Nice nchini Ufaransa ukiwataka watalii kutozuru mji huo kutokana na kuongezeka kwa visa vya maambukizi ya ugonjwa wa COVID-19 .

Meya wa Nice ambao ni mji ulioko kusini mwa Ufaransa anataka kuwekwa kwa masharti ya usafiri ili kupunguza idadi ya watalii wanaozuru mji huo akionya huenda visa vya maambujkizi ya korona vikaongezeka.

Kabla ya kuagiza masharti kali za kuzuia msambao wa ugonjwa huo kwa mara ya pili mwezi Novemba,serikali ilifunga baadhi ya mahoteli huko Marseille.

Hata hivyo serikali haikuweka vikwazo hivyo katika maeneo yote kutokana na malalamishi kutoka kwa wanasiasa na wafanyibiashara.

Categories
Kimataifa

Binadamu waambukizwa homa ya ndege aina ya H5N8 Russia

Russia imeripoti kisa cha kwanza cha homa ya ndege wa kufugwa aina ya H5N8 inayoambukiza binadamu.

Maafisa wa serikali wamesema wahudumu saba kwenye kiwanda kimoja cha ndege wa kufugwa kusini mwa nchi hiyo wameambukizwa homa hiyo iliyozuka mwezi wa Disemba.

Afisa mkuu wa halmashauri ya afya nchini humo Anna Popova alisema hatua za haraka zimechukuliwa kuzuia kuenea kwa homa hiyo.

Alisema kisa hicho kimeripotiwa kwa shirika la afya duniani-WHO.

“Habari kusuhu maambukizi ya homa hiyo ya ndege kwa binadamu, tayari imewasilishwa kwa shirika la Afya la umoja wa mataifa,” alisema Popova.

Aina nyingine ya homa za ndege iliyo na uwezo wa kuambukiza binadamu imesababisha vifo,lakini hii ni mara ya kwanza ya homa hiyo ya H5N8 kuambukiza binadamu.

Categories
Kimataifa

Marekani yarejea katika mkataba wa Paris kuhusu hali ya hewa

Marekani imerejea rasmi katika mkataba wa Paris, kuhusu hali ya hewa,na hivyo kupiga juhudi za kimataifa katika kupambana na athari za mabadiliko ya hali ya hewa.

Hayo yanajiri wakati ambapo serikali mpya ya Marekani chini ya Rais Joe Biden imetangaza mpango kabambe wa kupunguzwa kiwango kikubwa uchafuzi wa hewa.

Wanasayansi na wanadiplomasia wamepongeza hatua hiyo ya Marekani,huku mjumbe wa maalumu wa Marekani kuhusu hali ya hewa John Kerry akitarajiwa kushiriki kupitia mtandaoni hafla ya kuhusu kurejea kwa Marekani katika mkataba huo.

Hafla hiyo itawajumuisha mabalozi katika nchi za Uingereza na Italy,katibu mkuu wa umoja wa mataifa Antonio Guterres na balozi wa umoja wa mataifa kuhusu hali ya hewa Michael Bloomberg.

Marekani ilijiondoa katika mkataba huo mwezi Juni mwaka 2017 ikitaja kuwa mkataba huo kuwa ingehujumu uchumi wa taifa hilo.

Categories
Kimataifa

Hali ya taharuki yatanda Jijini Mogadishu

Makabiliano makali yameripotiwa kwenye mji mkuu wa Somalia wa Mogadishu,huku kundi moja la viongozi wa upinzani likikaidi marufuku ya mikutano ya umma na kufanya maandamano.

Vyama vya upinzani vimemtaka Rais Mohamed Abdullahi Farmajo kung’atuka baada ya muda wake wa kuhudumu kukamilika wiki jana.

Duru zinasema kuwa  mgombeaji wa urais wa upinzani Abdirahman Abdishaku,alikuwa miongoni mwa waliojaribu kuandamana.

Hali hiyo ya wasi wasi ilisababisha safari za kimataifa kusitishwa katika uwanja wa ndege wa kimataifa wa Aden Adde uliopo Jijini Mogadishu.

Maafisa wa usalama walifyetua risasi angani kuwatawanya wandamanaji.

Aliyekuwa waziri mkuu wa nchi hiyo Hassan Ali Kheyre amedai kupitia mtandao wa Facebook kuwa amenusurika jaribio la kumuua.

Rais wa Zamani wa Somalia Hassan Sheikh alilaumu utawala wa Farmajo kwa kuwashambulia raia wasiokuwa na hatia akisema kile raia wanafanya ni maandamano ya amani.

Maandamano hayo yamesababishwa na hatua ya taifa hilo kutoandaa uchaguzi mkuu huku muhula wa Rais Mohamed Abdullahi Farmajo wa miaka minne ulikamilika Februari 8.

Makundi ya upinzani yamekuwa yakitoa wito ajiuzulu, ingawa serikali imesema kuwa rais atasalia madarakani hadi utawala mpya utakapochaguliwa.

Hata hivyo hakuna tarehe iliyowekwa ya kufanya kwa uchaguzi.

Categories
Kimataifa

Nchi za ulaya zatakiwa kutoa asilimia tano ya chanjo ya Covid-19 kwa nchi zinazostawi

Rais wa Ufaransa Emmanuel Macron ametoa wito kwa bara ulaya na Marekani kutuma kwa haraka angalau asilimia tano ya chanjo dhidi ya virusi vya corona kwa mataifa yanayostawi.

Macron aliliambia jarida la Financial Times kuwa, kukosa kusambaza chanjo hiyo kwa mataifa hayo kutazidisha ukosefu wa usawa miongoni mwa mataifa mbalimbali ulimwenguni.

Kufikia sasa chanjo nyingi zimetolewa na mataifa yaliyo na uwezo mkubwa kiuchumi duniani.

Macron amependekeza mipango yake ya kushughulikia swala hilo la ukosefu wa usawa kabla ya mkutano wa viongozi wa mataifa ya kundi la G7 unaotarajiwa kuandaliwa siku ya ijumaa kupitia kwa mtandao.

Ikulu ya White House imesema kuwa Rais wa Marekani Joe Biden atatangaza ahadi ya dola bilioni 4 za kudhamini mpango wa Covax katika mkutano huo.

Waziri mkuu wa Uingereza Boris Johnson ambaye anatarajiwa kuongoza mkutano huo anatarajiwa kutoa dozi kadhaa za chanjo hiyo kwa mpango wa kimataifa wa kugawa chanjo wa Covax.

Hadi sasa watu wapatao milioni 110 wameambukizwa virusi vya Corona kote ulimwenguni huku wengine zaidi ya milioni 2.4 wakifariki kwa mujibu wa takwimu kutoka chuo kikuu cha Johns Hopkins.