Categories
Habari

KRA yaboresha mfumo wake wa ukusanyaji ushuru

Halmashauri ya ukusanyaji ushuru nchini, imezindua kampeni ya kuimarisha ulipaji ushuru kwa kuzindua mpango wa ulipaji ushuru kwa hiari-VTDP.

Mpango huo unatoa jukwaa kwa mlipa ushuru kufichua ushuru ambao hajalipa na ambao hapo awali haukuwa umefahamishwa kamishna wa ushuru kwa minajili ya kupunguziwa adhabu na riba ya ushuru huo.

Mpango huu unadhamiriwa kuimarisha ulipaji ushuru kupitia uzingativu wa zoezi hilo.

Akiongea jijini Nairobi baada ya uzinduzi wa mpango huo, kamishna wa halmashauri ya KRA wa ulipaji ushuru wa humu nchini, Rispah Simiyu, aliwahimiza walipaji ushuru kutumia vyema fursa ya kuzinduliwa mpango huo.

Alisema mara ufichuzi kamili wa ushuru ambao haujalipwa utafanywa na ushuru usio na riba kulipwa, walipa ushuru kama hao watafurahia kuondolewa riba na adhabu za ushuru ambao ulikuwa haujalipwa.

Alisema serikali kupitia halmashauri ya KRA imeanzisha mikakati kabambe za kuimarisha ukusanyaji ushuru na kukabilaiana na athari za janga la COVID-19.

Categories
Habari

Watu 277 zaidi waambukizwa Covid-19 hapa nchini

Watu wanane zaidi wamefariki kutokana na makali ya virusi vya Covid-19 hapa nchini katika muda wa saa 24 zilizopita na kufikisha idadi jumla ya maafa kutokana na virusi hivyo humu nchini kuwa1,847.

Hayo yanajiri huku watu wengine 277 wakiambukizwa Covid-19 hapa nchini baada ya kupimwa kwa sampuli 4,599 katika muda wa saa 24 zilizopita.

Idadi jumla ya visa vilivyothibitishwa vya covid-19 hapa nchini tangu mwezi Machi mwaka jana ni 105,057 kutoka kwa idadi jumla ya sampuli 1,282,799 zilizofanyiwa uchunguzi.

Kati ya visa hivyo vipya 277 vilivyonakiliwa, 221 ni raia wa Kenya huku 56 wakiwa raia wa kigeni. Watu 173 ni wa kiume nao 104 wakiwa wa kike huku mchanga zaidi akiwa mtoto wa umri wa miaka mitatu na mkongwe zaidi akiwa na umri wa miaka 89.

Wagonjwa 336 wamelazwa katika vituo mbali mbali vya afya kote nchini huku wengine 1,397 wakiuguzwa nyumbani.

Wagonjwa 61 wamelazwa katika chumba cha wagonjwa mahututi ICU, 25 kati yao wakitumia vipumulio na 27 wakipokea hewa ya ziada ya oxygen nao wagonjwa 9 wangali wanachunguzwa.

Hata hivyo wagonjwa 119 wamepona virusi hivyo vya Corona, 79 kutoka mpango wa utunzi wa wagonjwa nyumbani na 40 waliruhusiwa kuondoka katika vituo mbali mbali vya afya. Idadi jumla ya walipona ugonjwa wa Covid-19 hapan nchini sasa ni 86,497.

Kaunti ya Nairobi ingali inaongoza katika visa vipya huku ikinakili visa 194. Nakuru ilifuata kwa visa 18, Kiambu 17,Mombasa 11, Laikipia 8, Kajiado 7, Machakos 6 na Uasin Gishu visa 5.

Kaunti ya Siaya na Makueni zilinakili visa 2 kila kaunti huku Meru, Nandi, Narok, Nyandarua, Nyeri, Taita Taveta na Kisumu zikinakili kisa kimoja kila kaunti.

Categories
Habari

Githu Muigai apata wadhifa mpya

Aliyekuwa mwanasheria mkuu, Githu Muigai ameteuliwa kuwa mwenyekiti wa kamati ya pamoja ya wadau wa sekta za umma na kibinafsi.

Kwenye arifa yake katika gazeti rasmi la serikai, waziri wa fedha Ukur Yatani, alisema Muigai atakuwa mwenyekiti ilihali Mohamed Abbey Mohamed, Janice Kotut, Eunice Lumalla na Sadick Mustapha ni wanachama wa kamati hiyo.

Kamati hiyo ya pamoja ya wadau wa sekta za umma na kibinafsi,ilibuniwa chini ya kifungu cha 8 cha sheria ya ushirikiano wa sekta za umma na binafsi ya mwaka-2013 kuwa kitengo maalum kwenye wizara ya fedha.

Madhumuni ya kamati hiyo ni kutathmini na kuidhinisha miradi humu nchini.

Muigai aliteuliwa kuwa mkuu wa sheria baada ya kuratibishwa kwa katiba ya mwaka-2010.

Alijiuzulu kutoka wadhifa huo mwaka-2018 baada ya kudumu kwa kipindi cha miaka sita na nusu.

Categories
Habari

Ruto aahidi kumsaidia “Cucu wa Gikandu”

Naibu Rais Dkt. William Ruto amesema atapiga jeki biashara ya kilimo ya mama Margaret Njambi mwenye umri wa miaka  64.

Njambi almaarufu  “Cucu wa Gikandu” alijulikana baada ya video yake kutamba mitandaoni akipinga ripoti ya BBI mapema mwezi huu.

Ufahamu wake wa lugha ya Kingereza uliwafurahisha wakenya alipokuwa akimhimiza mbunge wa Kiharu Ndindi Nyoro amkutanishe na naibu Rais William Ruto.

Ombi lake lilitimia baada ya kukutana ana kwa ana na naibu wa rais mtaani Karen siku ya Jumatano.

“Nilizungumza na Margaret Njambi ambaye ni mkulima baada ya video yake kutamba katika mitandao ya kijamii wakati wa mkutano kuhusu maendeleo katika eneo bunge la Kiharu ambapo alielezea angependa kukutana na naibu Rais,” alisema Ruto.

Baadae Naibu Rais aliomboleza na familia ya marehemu mbunge John Oroo Oyioka nyumbani kwake Kitengela kaunti ya Kajiado.

Naibu Rais pia aliomboleza na familia ya marehemu mbunge wa Juja Francis Munyua Waititu nyumbani kwake Juja kaunti ya Kiambu.

“Tunaomba Mwenyezi Mungu apatie familia hizo nguvu na pia azifariji wakati huu ngumu wa majonzi,” alisema naibu rais.

Categories
Habari

KEBS yanasa Unga wa Riri kwa kukosa alama ya ubora

Shirika la Ukadiriaji wa Ubora wa Bidhaa Nchini (KEBS) limekamata unga wa mahindi wa Riri ambao ulikuwa sokoni licha ya kutokuwa na alama za uthibitisho.

Unga huo ulikamatwa siku ya Jumatano katika maeneo ya  Makuyu, Gatundu, na Ruiru.

Katika taarifa, shirika hilo lilisema kuwa unga huo haukuwa na alama za uthibitisho wa viwango, na kuwataka Wakenya kuwa macho.

Kadhalika lilisema kuwa alama zake za uthibitisho wa viwango, zina nambari maalum chini yake, ambayo inaweza kuthibitishwa kwa kuituma kwa nambari 20023 kwa njia ya simu.

Watengenezaji wa bidhaa hiyo sasa wanahitajika kuonyesha Nambari ya Kibali cha Alama ya Viwango, chini ya alama ya shirika hilo.

Umma pia umeombwa kuripoti bidhaa yoyote isiyotimiza viwango vilivyowekwa kupitia nambari ya bure ya simu isio ya mallipo 1545.

Wakati huo huo shirika hilo limetoa mwongozo mpya wa usalama wa chakula na usafi kwa wafanyikazi wote katika sekta ya utayarishaji wa chakula na usambazaji, kama sehemu ya vita dhidi ya maradhi ya Covid -19.

Categories
Habari

Wizara ya afya yaitisha shilingi bilioni 1.4 kuboresha uhifadhi wa chanjo ya covid-19

Wizara ya Afya imeomba Shilingi bilioni 1.4 kutoka Wizara ya Fedha kupanua vituo vya kuhifadhi chanjo kote nchini na kununua vifurushi ambavyo vinaweza kuhifadhi chanjo hizo katika kiwango cha nyuzi kinachokubalika.

Mkuu wa jopo la kusambaza chanjo za kukabiliana na maradhi ya Covid-19 Willis Akhwale, alisema vituo vinavyopatikana vinaweza kuhifadhi chanjo hizo kwa kiwango cha nyuzi kinachokubalika na pia kuhifadhi hadi chanjo milioni 20.

Akihutubia mkutano ulioandaliwa kwa njia ya mtandao na Chama cha Madaktari nchini, Dkt Akhwale alisema vifaa vyenye uwezo wa kudumisha kiwango cha joto kinachokubalika vinapatikana katika Taasisi ya Utafiti wa Matibabu Nchini (KEMRI) na vituo vingine vichache.

Aliongeza kuwa wizara inachukua tahadhari za kutochafua chanjo hizo.

Akhwale alisema ingawa Kenya imeagiza chanjo aina ya AstraZeneca-Oxford, bado inaweza kununua chanjo ya Pfizer, mara tu itakapopatikana na nafasi ya kuihifadhi kuwepo.

Akhwale alisema mpango huo utagharimu shilingi bilioni 34, ili kuchanja asilimia 30 ya idadi ya watu nchini kuanzia mwezi Machi mwaka huu hadi Juni 2023

Categories
Habari

Baba ahukumiwa maisha gerezani kwa kumnajisi bintiye

Mahakama moja ya  Molo kaunti ya Nakuru, imemhukumu mwanaume mmoja kifungo cha maisha kwa kumnajisi binti yake mwenye umri wa miaka minane.

Hakimu mkazi Emmanuel Soita alitoa uamuzi huo baada Eric Osoro mwenye umri wa miaka 28 kukiri mashtaka ya makosa hayo aliyotekeleza katika tarehe tofauti baina ya mwezi Januari na Februari mwaka huu.

Tukio hilo la kinyama lilitekelezwa katika kijiji cha Kisii Ndogo katika eneo la Kuresoi kaskazini.

Dada mkubwa wa mwasiriwa alimfahamisha mama yake kabla ya msichana huyo kudhibitisha masaibu.

Inadaiwa mwasiriwa alidinda awali kufichua yaliyomkumba lakini baadae alikiri kutendewa uovu huo na babake mzazi.

Mama yake alimpeleka kupimwa katika hospitali ya kaunti ndogo ya Molo kabla ya kuripoti swala hilo kwa kituo cha polisi cha Mau Summit na kuwezesha Osoro kukamatwa tarehe 22 mwezi huu wa Februari.

Akitoa hukumu hiyo, hakimu mkaazi Emmanuel Soita alisema Osoro alihitaji kifungo cha muda mrefu baada ya kukiri kutekeleza uovu huo huku akifahamu ni makosa.

Hakimu huyo alifoka kwamba tabia kama hizo hazitavumiliwa katika jamii na kuwa yeyote atakayekamatwa atachukuliwa hatua kali za kisheria.

Categories
Habari

NTSA yasimamisha shughuli za magari ya uchukuzi ya chama cha KISTAG

Halmashauri ya taifa ya uchukuzi na usalama barabarani-NTSA imeahirisha shughuli za zaidi ya magari 200 ya uchukuzi wa umma ya chama cha ushirika cha KISTAG kufuatia ajali mbaya ya barabarani iliyosababisha vifo vya abiria sita ambao walikuwa wakisafiri katika moja wa magari yao.

Matatu ya chama cha ushirika cha KISTAG iligongana na lori kwenye barabara kuu ya kutoka Kisumu hadi Bondo siku ya Jumamosi.

Wakati wa ajali hiyo ilibainika kuwa dereva huyo hakuwa ameidhinishwa kuendesha gari hilo. Barua iliyotiwa saini na mkurugenzi wa shirika hilo la NTSA George Njau, ilisema kuwa magari ya chama hicho yatakaguliwa kikamilifu.

Njau alisema kuwa madereva wa magari hayo watakaguliwa upya katika muda wa siku 14 huku akiongeza kuwa wataruhusiwa tu kurejea barabarani baada ya kuzingatia mikakati yote ya kudumisha usalama barabarani.

Categories
Habari

Gavana Mutua awataka wanaopinga BBI kukoma kuwapotosha Wakenya

Kiongozi wa chama cha Maendeleo Chap Chap Dkt. Alfred Mutua ametoa wito kwa wale wanaopinga mswada wa BBI kukoma kuwapotosha Wakenya.

Akiongea wakati wa ziara ya kukagua miradi ya maendeleo katika eneo la Mwala, Mutua ambaye pia ni gavana wa Kaunti ya Machakos, amesema kuwa katiba haibadilishwi kama inavyodaiwa na baadhi ya viongozi bali inafanyiwa marekebisho ili kuiboresha.

Dkt. Mutua ameongeza kuwa katiba mpya itaongeza pesa zinazotengewa kaunti na kuimarisha maslahi ya Wakenya.

“Mnadanganywa kwamba eti tunabadilisha katiba,  hatubadilishi katiba. Hii ni kuongezea vipengele tu kwa katiba iliyopo,” amesema Mutua.

Ametoa wito kwa kaunti zilizosalia kupitisha mswada huo ili uwasilishwe bungeni na baadaye kwa wananchi ambao watatoa uamuzi wa mwisho kupitia kwa kura ya maamuzi.

Categories
Habari

Wakili Kanjama aitaka mahakama itupilie mbali mchakato wa BBI

Wakili Charles Kanjama amewasilisha kesi mahakamani ya kupinga mchakato wa kuidhinisha mswada wa marekebisho ya katiba wa mwaka wa 2020.

Kwenye ombi lake, wakili huyo anasema ana sababu za kuamini kuwa utaratibu uliotumiwa kukusanya na kuthibitisha saini za mpango wa maridhiano wa BBI haukutimiza masharti ya kikatiba.

Anaitaka mahakama ifutilie mbali uamuzi wa Tume Huru ya Uchaguzi na Mipaka (IEBC) kwamba ilithibitisha saini zilizokusanywa na kupata kwamba mswada huo uliungwa mkono na zaidi ya wapiga kura milioni moja.

Aidha, Kanyama anataka hatua ya Tume ya (IEBC) ya kutuma mswada wa marekebisho ya katiba wa mwaka wa 2020 wa katika mabunge ya kaunti ibatilishwe.

Wakili huyo anadai kwamba aliiandikia barua IEBC akitaka taarifa iwapo tume hiyo ilithibitisha saini za BBI kwa kulinganisha na saini zilizopo tayari na iwapo orodha ya wapiga kura iko na saini za wapiga kura.

Kanjama amesema IEBC ilimjibu kwamba haikuwa na uwezo huo na kwamba haikuwa na mamlaka ya kisheria ya kufanya uthibitisho wa saini za wapiga kura.

Kulingana na wakili huyo, hatua ya mabunge ya kaunti kuendelea kujadili na kupitisha mswada huo inaibua wasiwasi kuhusu mchakato mzima na kwamba inafaa kusitishwa mara moja kwa sababu mchakato huo unafanyika kinyume cha katiba.