Category: Burudani

Categories
Burudani

Shishi Gang

Mwanamuziki wa nchi ya Tanzania Shilole ambaye pia ni mjasiriamali anaonekana kuendelea vizuri katika kazi yake. Juzi, punde baada ya tangazo la mwanamuziki mwenza Diamond Platnumz, Shishi naye alisema kwamba ana tangazo maalum ambalo angelitoa kwenye kikao na wanahabari jana Alhamisi, tarehe 26 mwezi Novemba mwaka huu wa 2020 saa kumi na moja jioni.

Muda ulipowadia, Shishi ambaye jina lake halisi ni “Zena Yussuf Mohamed”, alipasua mbarika. Alizindua rasmi kampuni yake kwa jina “Shishi Gang”. Kulingana naye, kampuni yake itahusika na mambo mengi sio tu usimamizi wa wanamuziki.

Jina la kampuni yake linakaribia kufanana na la kampuni ya Harmonize, “Konde Gang” ambayo alianzisha baada ya kugura “Wasafi Classic Baby, WCB” yake Diamond Platnumz.

Alisema kwamba ataandikisha wasanii wa aina mbali mbali hata wachoraji na waigizaji na kampuni hiyo pia huenda ikahusika na uuzaji magari, mashamba na vitu vingine.

Shishi ambaye anamiliki mkahawa kwa jina “Shishi Food” aliwavunja mbavu waliohudhuria kikao chake na wanahabari kutokana na kiingereza chake.

Katika kikao hicho pia, alimtambulisha msanii wa kwanza kwa jina la Instagram, @ronze_officiall au Ronze tu.

Ronze amerekodi na kuzindua vibao kadhaa kulingana na akaunti yake ya Youtube na cha hivi punde zaidi kinaitwa “Chereko”.

Shilole aliomba mashabiki wampokee kijana huyo walivyompokea yeye katika ulingo wa muziki. Shishi ni mmoja kati ya wanamuziki ambao hawako chini ya kampuni ya WCB lakini wamealikwa na Diamond kwenye ziara ya Wasafi Media.

Maajuzi Shishi alitembelewa na mwanamuziki wa Congo Koffi Olomide katika mkahawa wake, na mwisho wa siku, Le Grand Mopao alisifia chakula chake.

Categories
Burudani

Maneno fulani ya kiingereza yapigwa marufuku na Malkia wa Uingereza

Malkia wa Uingereza Bi. Elizabeth wa pili amepiga marufuku maneno fulani ya kiingereza katika makazi ya kifalme nchini uingereza.

Kwa hivyo watu wa familia yake na wageni hawapaswi kutumia maneno hayo kamwe wanapokuwa katika makazi hayo ya familia ya kifalme huko uingereza.

Kulingana na Malkia, maneno hayo hutumika kwa wingi huko nje kwa hiyo hayastahili katika ngazi ya kifalme. Neno la kwanza ni lile ambalo watoto hutumia kuashiria baba yaani “Daddy”, badala yake anashauri watu wa ukoo wake hasa wajukuu watumie neno, “Father”.

Maneno mengine ya kiingereza ambayo yamepigwa marufuku ni, “Couch” ambalo hutumika kuashiria kiti na badala yake anataka watumie neno, “Sofa”.

“Living room” yaani sebule,na kulingana na Malkia chumba hicho ni bora kiitwe, “sitting room”.

“Courtyard” yaani eneo lilioachwa wazi ambalo linaweza kuwa la kupumzika na mara nyingi huwa limezingirwa na nyumba au ua ambalo sasa ni “Terrace” katika makazi ya kifalme.

“Posh” neno ambalo hutumika kuashiria kitu cha thamani au mwonekano wa uzuri wa hali ya juu na sasa Malkia anataka mwonekano huo uitwe, “Elegance”.

“Perfume” neno la kiingereza la marashi, limepigwa marufuku na badala yake maneno, “Fragrance” na “Scent” yatumike.

“Smell” neno na harufu mara nyingi ni isiyoridhisha au kitendo cha kunusa na “Toilet” neno la kiingereza la choo.

Katika makazi ya familia ya kifalme kuna kanuni fulani ambazo lazima zifuatwe na wenyeji na wageni na ni jambo ambalo limekuwa kwa muda mrefu.

Kwa mfano katika maankuli, mwana ufalme yeyote haruhusiwi kula chakula cha baharini anapokuwa safarini. Vyakula hivyo mara nyingi huliwa vikiwa vibichi kwa hivyo ni tahadhari tu kujikinga na magonjwa yanayotokana na vyakula.

Kitunguu saumu pia kimepigwa marufuku katika makazi ya kifalme kuzuia harufu wakati Malkia anazungumza na wageni wake.

Vyakula vya wanga yaani “starchy foods” kama viazi pia vimepigwa marufuku katika ikulu hiyo ya Uingereza kwa sababu vinasababisha matatizo ya tumbo.

Katika mavazi, kuna mtindo maalum ambao unafaa kufuatwa na wote ambao ni wa familia ya kifalme. Kimsingi, hakuna yeyote ambaye anastahili kuwa nadhifu zaidi ya Malkia.

Mwaka 1984, mtoto wa kifalme wa kike kwa jina Diana, alizua kioja pale ambapo alibadili mtindo wake wa nywele wakati ambapo Malkia alikuwa anakwenda bungeni kwa ajili ya hotuba yake rasmi.

Inasemekana kwamba kesho yake, badala ya vyombo vya habari kuangazia hotuba ya Malkia viliangazia mabadiliko yaliyoonekana kwa Diana.

Categories
Burudani

Bobi Wine atimuliwa kutoka kituo cha redio huku akiendeleza Kampeni

Mwanamuziki wa nchi ya Uganda Bobi Wine kwa jina halisi Robert Ssentamu Kyagulanyi anaendeleza kampeni za kuwania urais kwenye uchaguzi mkuu ujao nchini humo.

Safari yake katika kuwania nafasi hiyo ya juu kabisa ya uongozi nchini Uganda imekuwa yenye masaibu tele, kuanzia kwa mikutano yake kutibuliwa kwa vitoa machozi hadi kutiwa mbaroni.

Jana asubuhi Bobi alitimuliwa kutoka kituo kimoja cha redio katika mji wa Hoima. Mapema jana, Bobi na wawaniaji wa nyadhifa mbali mbali za uongozi katika eneo la Bonyoro na wale kutoka Kampala kupitia chama chake cha National Unity Platform NUP walifika katika kituo cha redio kwa jina “Spice Fm” kwa lengo la kufikia wafuasi wao.

Inaarifiwa kwamba kabla ya kuingia hewani, Bobi Wine alionywa dhidi ya kuzungumza lolote baya kuhusu Rais Yoweri Kaguta Museveni.

Lakini yapata dakika tano tu baada ya kipindi kuanza, kukatokea bwana mmoja ambaye alimwamuru Bobi Wine na wenzake kuondoka kwani amearifiwa kwamba hawafai kuwa katika eneo hilo.

Bobi Wine na wenzake katika studio ya Spice Fm

Bwana huyo baadaye alitambuliwa kama naibu msimamizi wa kituo cha redio cha Spice Fm.

“Polisi na wanajeshi walizingira jengo la kituo cha redio cha Spice Fm na kutulazimisha kuondoka.” alielezea mwaniaji huyo wa urais kwenye ukurasa wake wa Facebook.

Mbunge huyo wa Kyandondo Mashariki anasemekana kulipia muda ambao hakuutumia kwenye kituo hicho cha redio kulingana na risiti ambayo imekuwa ikisambazwa kwenye mitandao ya kijamii.

Kwa sasa anataka tu kujua kutoka kwa tume ya uchaguzi nchini humo ikiwa ni kosa kutumia vyombo vya habari kwenye kampeni.

Categories
Burudani

Tuzo za MAMA kuandaliwa nchini Uganda

Sasa ni rasmi kwamba tuzo za muziki barani Afrika au ukipenda MAMA au Mtv African Music Awards za mwaka 2021 zitaandaliwa nchini Uganda, tarehe 20 mwezi Februari.

Haya yalibainika jana kutokana na tangazo la MTV. Hii ndiyo mara ya kwanza kwa tuzo hizo kuandaliwa nchini Uganda na itakuwa pia mara ya kwanza kwa tuzo hizo kupeperushwa kupitia mitandao ya kijamii.

Mwezi Agosti mwaka jana, serikali ya Uganda ilikubali kwamba tuzo za MAMA za mwaka huo ziandaliwe nchini humo mwezi Disemba lakini hilo halikutimia.

Mwaka huu wa 2020 janga la Corona limefanya mambo kuwa magumu na kusababisha kuahirishwa kwa tuzo hizo. Muda huo wote Kampala mji mkuu wa Uganda umekuwa ukisubiri kwa hamu kuwa mwenyeji wa tukio hilo la kimataifa na sasa ni rasmi kwamba litatimia.

Tuzo za MAMA ambazo hudhaminiwa na kampuni ya MTV iliyo na makao yake makuu huko New York Marekani zilianzishwa mwaka 2008 na hafla ya kutuza washindi mwaka huo iliandaliwa mjini Abuja nchini Nigeria.

Nchi ya Kenya iliwahi kupata nafasi ya kuandaa tuzo hizo za MAMA mwaka 2009 katika Kaunti ya Nairobi uwanjani Kasarani.

Mwaka huo, Nameless na Wahu walishinda tuzo katika vitengo vya mwanamuziki bora wa kiume na wa kike mtawalia huku Amani, Wahu na AY wa Tanzania wakitumbuiza kwenye hafla hiyo.

Nchi nyingine ambayo imewahi kuandaa tuzo hizo ni Afrika Kusini ambayo ilifanya hivyo mwaka 2014, 2015 na 2016.

Mwaka 2011 hadi 2014 tuzo hizo hazikuandaliwa, zikarejea mwaka 2014 hadi 2016 na tangu wakati huo zitarejea tena mwaka 2021.

Categories
Burudani

Sihitaji walinzi nalindwa na Mungu, Koffi Olomide

Mwanamuziki wa muda mrefu wa nchi ya Congo Koffi olomide au ukipenda Le Grand Mopao au Boss ya Mboka amefichua kwamba yeye huwa hatembei na walinzi kwani anaamini kwamba analindwa na Mungu.

Koffi aliyasema hayo kwenye studio ya Wasafi Fm wakati yeye na Diamond Platnumz walikuwa wanazindua kibao chao kwa jina “Waaa”.

Hapo hapo kwenye kipindi cha ‘The Switch’ ilifichuka kwamba Koffi ana ujuzi wa kiwango cha juu katika mchezo wa Karate maanake ana “Black Belt”.

Alisema kwamba akikasirika yeye huwa mbaya na anaweza kuumiza mtu na ndio maana wakati wote anajituliza na kupoesha hasira.

Ama kweli ana ujuzi huo ikikumbukwa teke aliyomrushia mmoja wa wacheza densi wake katika uwanja wa ndege nchini Kenya kitendo kilichosababisha atimuliwe hata kabla ya onyesho lake.

Boss ya Mboka anatarajiwa kuendelea kukaa nchini Tanzania kwa muda kulingana na usemi wa Diamond kwamba ana video nyingine anafaa kuandaa.

Duru za kuaminika zinaarifu kwamba video hiyo ni ya kibao cha Koffi na Nandy au ukipenda African Princess. Wakati wa mahojiano Koffi alifichua kwamba ameshirikiana pia na Nandy kwenye muziki na dada huyo amekuwa akimsukuma wafanye video lakini akampa Diamond nafasi ya kwanza.

Alipoulizwa kuhusu kitu ambacho amependa sana nchini Tanzania, Koffi alisema kwamba ni wanawake ambao kulingana naye ni warembo.

Tukio jingine ambalo linatarajiwa kumweka Koffi nchini Tanzania ni ziara inayofanywa na Wasafi Media kwa ushirikiano na Tigo na Pepsi ambapo Diamond alimwalika kwenye ziara ya mwishi mjini Daressalaam. Jana mwanamuziki huyo alikwenda kwenye mkahawa wa Shilole kwa jina Shishi food kwa chakula cha mchana.

Categories
Burudani

“Nashukuru Mungu kwa kunipa mzazi mwenza kama Zari” Diamond

Mwanamuziki wa Tanzania Diamond Platnumz au ukipenda Simba au Chibu Dangote amemsifia sana mzazi mwenza kwa jina Zari Hassan.

Akizungumza jana katika kituo cha redio cha Wasafi Fm kwenye kipindi cha ‘The Switch’, mmiliki huyo wa Wasafi Media alifichua kwamba hana uhusiano wa kimapenzi na Zari mzaliwa wa Uganda anayeishi na kufanya biashara nchini Afrika Kusini.

Diamond alikuwa amekwenda kituoni humo jana kwa ajili ya kuzindua kibao walichoshirikiana na Koffi Olomide.

Alisema wanasaidiana tu katika malezi ya wanao wawili na alikuwa amekuja kumletea watoto kwani hakuwa ameonana nao kwa muda wa miaka miwili.

“Miongoni mwa watu ama wazazi wenzangu ambao ninaweza nikawasifia, yaani nasifia katika namna tunajua namna gani ya kuishi kama wazazi ni Zari.” ndiyo baadhi ya maneno aliyasema Diamond.

Alisema pia kwamba anafarijika kuona kwamba watoto wake wana mama kama Zari na alibahatika kuzaa naye na anashukuru Mungu.

Kuhusu wanawe kulelewa na baba mwingine Diamond alisema hakuna tatizo bora aruhusiwe kutagusana na watoto wake anavyotaka.

Wanawe wakiwa nchini Tanzania, Diamond alipata fursa ya kurekodi kibao na mtoto wake wa kike Tiffah na amesema kibao chenyewe kitazinduliwa kabla ya mwisho wa mwaka.

Zari anasemekana kuwa ana mahusiano mengine ya mapenzi naye Diamond akasema bado yuko peke yake hajapata mpenzi.

Sifa alizomimina Diamond kwa Zari zinafanya wanawake wengine ambao ana watoto nao kuonekana vibaya sana. Bwana huyo ana mtoto wa kiume na mwanamitindo wa Tanzania Hamisa Mobeto na mwingine wa kiume na mwanamuziki wa Kenya Tanasha Donna.

Categories
Burudani

Waaaa!! Diamond na Koffi

Hatimaye Diamond Platnumz na Koffi Olomide wamezindua wimbo ambao wamekuwa wakitayarisha. Wimbo wenyewe unakwenda kwa jina “Waaa”.

Diamond ndiye anafungua wimbo kwa maneno, “Anachukua anaweka waaa” ambayo anarudia rudia naye Mopao chini kwa chini anajitambulisha na kutambulisha Diamond kama ‘Le general Dangote’ na ‘Le grand Mopao Boss ya Mboka’, kisha Diamond anaendelea kwa kusifia mwanadada mpenzi wake akisuta mahasidi kwamba lolote wanaloona baya kwa mwanadada huyo haliwahusu.

Mopao anaingia japo kidogo tu kwa sauti yake nzito ndiye anatoa neno ‘Waaa’ ambalo lipo kwenye pambio.

Baadaye Mopao au Koffi anaingia na ile Seben yake ya ‘Papa Mobimba’ naye Diamond anaingia na mtindo wa kusalimiana kwa miguu mtindo ambao ulipendekezwa kama njia ya kuamkuana na kuzuia kusambaa kwa virusi vya Corona. Anashauri watu pia kuzingatia kanuni za kuzuia kusambaa kwa Corona.

Anaimba, “Usiniguse usini touch tusalimiane kwa miguu, usinisalimie, usinikaribie kuna Corona.” mambo yanayokwenda kinyume na msimamo wa serikali ya Tanzania ambayo ilitangaza kwamba hakuna tena virusi vya Corona nchini humo.

Kuna watu kadhaa wa karibu ambao wasanii hao wawili wamewataja kwenye wimbo huo kama vile binti yake Koffi kwa jina Didi Stone na Mama Dangote.

Wawili hao wamejulikanisha sauti ya wimbo tu, video bado.

Kabla ya kuzindua wimbo huo, Koffi alipigia debe wimbo wake kwa jina ‘B’ados’ huku akisihi Wasafi Media wawe wakiucheza.

Simba alimwalika Koffi ahudhurie ziara ya mwisho kwa jina “Tumewasha na Wasafi” ushirikiano wa Wasafi, Tigo na Pepsi ambayo itakuwa Jijini Dar es Salaam.

Categories
Burudani

David the Student anaugua Corona

David Kangogo maarufu kama David the Student ametangaza kwamba alipimwa na akapatikana kuwa na virusi vya Corona na sasa amejitenga.

Kupitia Instagram David ambaye alikuwa mchekeshaji kwenye kipindi cha Churchill, alielezea kwamba alianza kujihisi mgonjwa ijumaa tarehe 20 mwezi huu, Jumamosi akakwenda hospitali kupimwa Covid – 19 na Jumapili akazidiwa.

Jumatatu tarehe 23 ndio alipata majibu ya vipimo ambayo yalidhibitisha kwamba alikuwa ameambukizwa virusi hivyo.

Alisema kwamba ameanza kujitenga kwa siku 14 inavyohitajika huku akishukuru wote kwa usaidizi. Mchekeshaji huyo anakumbusha wote kwamba ni muhimu kufuata kanuni zote za kuzuia kusambaa kwa virusi vya Corona kama vile kuvaa barakoa, kunawa mikono kila mara na kuhakikisha umbali unaohitajika kati ya watu.

Haya yanawadia siku chache baada ya David ambaye sasa anaishi na kufanya kazi Marekani kukumbwa na kisa cha ubaguzi wa rangi nchini humo.

Yeye ni mhudumu wa teksi na alidhulumiwa na abiria mmoja mzungu ambaye alikuwa ameandamana na mke wake. David anahudumu chini ya kampuni kwa jina “Lyft” na alibeba wawili hao kutoka mkahawa mmoja na pindi alipoingia kwenye gari mzee huyo akavua barakoa, na David akamsihi aivalie ndio mambo yakaanza.

Mzee huyo alimtusi na hata kutishia kukojoa kwenye gari lake. Video ya tukio ilisambaa sana kwenye mitandao ya kijamii na imesababisha mwanaume huyo mzungu afutwe kazi na kupigwa marufuku kwenye mkahawa alikotolewa siku hiyo. Hata hivyo Bwana huyo ameomba msamaha akisema kwamba alilewa sana hadi akajisahau.

Tunamtakia David afueni ya haraka.

Categories
Burudani

Wimbo wa shukrani, Size 8 na Rose Muhando

Mwimbaji wa nyimbo za injili wa Tanzania Bi. Rose Muhando amekuwa akishirikiana na waimbaji wa Kenya katika nyimbo na wa hivi punde kabisa ni Size 8.

Video ya wimbo wao kwa jina “Vice Versa” iliwekwa kwenye Youtube jana tarehe 24 mwezi Novemba mwaka huu wa 2020 na hadi sasa imetizamwa zaidi ya mara laki mbili.

Wimbo wenyewe ni wa kumshukuru Mungu kwa mema na kwa kuharibu mipango mibaya dhidhi yao. Teddy B ndiye alitayarisha wimbo huo huku mume wake Size 8, Dj Mo akisimamia mradi wote.

Maeneo ambapo video ilitayarishwa yalipambwa vilivyo na mavazi ya wawili hao pia ni ya kuvutia kwani ni ya rangi zinazong’aa.

Wimbo huu wa shukrani unaonekana kuja wakati mwafaka baada ya waimbaji hawa wawili kukumbana na mambo magumu maishani.

Rose Muhando aliinuka sana katika kazi yake ya uimbaji akawa nyota wa Tanzania na hata Afrika Mashariki baadaye akafifia na alipojitokeza tena, akaelezea masaibu ambayo kulingana naye yalipangwa na kutekelezwa na watu wa karibu.

Mwanadada huyo alikiri kwamba alipoteza mali yake yote magari na majumba kwa hali isiyoeleweka na afya yake pia ikadhoofika.

Lakini kwenye video ya wimbo Vice Versa anaonekana kama ambaye amenawiri ki afya.

Size 8 naye alifichua maajuzi kwamba alipatwa na matatizo ambayo yalitishia maisha kipindi ambacho alikuwa na ujauzito wa wanawe wawili ambao wote wamezaliwa mwezi Novemba lakini miaka ni tofauti.

Mashabiki wa waimbaji hao wawili wanaonekana kufurahia kazi hii kulingana na maoni waliyoweka kwenye youtube. Mwimbaji Stephen Kasolo pia hakuachwa nyuma. Anawapongeza kina dada hawa akisema kwamba wataendelea kushikilia pindo wakisonga mbele.

Kasolo ambaye pia amewahi kufanya kazi na Rose, anarejelea wimbo wa Rose Muhando kwa jina “Shikilia Pindo la yesu”.

 

Categories
Burudani

Tangazo la Diamond Platnumz mkurugenzi mkuu wa Wasafi Media

Inatokea kwamba tangazo ambalo lilikuwa linasubiriwa kwa hamu na ghamu kutoka kwa Diamond Platnumz sio kuhusu kuzinduliwa kwa collabo yake na Koffi Olomide.

Tangazo lenyewe ni kuhusiana na ushirikiano wa kibiashara kati ya Wasafi Media, kampuni ya mawasiliano ya rununu nchini Tanzania Tigo na kampuni ya vinywaji ya Pepsi.

Kampuni hizo tatu zitakuwa na ziara katika sehemu mbali mbali nchini Tanzania kwa lengo la kuongeza mauzo.

Akizungumza kwenye makao makuu ya Wasafi Media huko Mbezi, mkurugenzi mkuu wa Wasafi Media Abdul Nasib au Diamond Platnumz alisema kwamba kampuni hiyo ya utangazaji inashirikiana na Tigo na Pepsi kutembelea wateja wake katika mikoa ambapo vituo vya Wasafi vimewashwa na ambapo vitawashwa.

“Linaitwa Wasafi tumewasha na Tigo na unajiburidisha na Pepsi mpaka basi!” maneno yake Diamond hayo.

Kulingana naye hawajapata nafasi ya kushukuru wasikilizaji na watazamaji wao kwa kupendelea Wasafi Media na hii ni nafasi nzuri na njia bora ya kumaliza mwaka.

Msafara wenyewe utaanza tarehe 28 mwezi huu wa Novemba mwaka 2020 katika eneo la Kahama na utahusisha wasanii wa kampuni ya Wasafi na wengine wa nje na orodha kamili itatolewa baadaye.

Wasimamizi wa mauzo kutoka kampuni za Tigo na Pepsi pia walizungumza kwenye kikao hicho na wanahabari ambapo waliahidi wateja wao mengi mazuri kwenye msafara huo.