Categories
Habari

Naibu Rais William Ruto awahimiza wakenya kudumisha Amani na Umoja

Naibu wa rais William Ruto ametuma risala ya heri njema kwa waislamu wote wanapoanza mwezi mtukufu wa Ramadhan.

Kwenye ujumbe wake, naibu wa rais alitoa wito wa umoja na mshikamano wakati wa shughuli hiyo ya kimataifa.

Akiongea kwenye video katika mtandao wa Twitter, Ruto aliwahimiza washiriki wote wawaombee wakenya wadumishe amani na umoja katika nyanja zote.

Ramadhan ni mwezi mtukufu wa kufunga, kujichunguza na kusali kwa waumini wa kiislamu.

Inaadhimishwa kuwa mwezi ambao Muhammad alipokea ufunuo wa mwanzo kuhusu Quran ambacho ni kitabu kitakatifu cha waislamu.

Kufunga ni mojawapo wa nguzo tano kuu za Uislamu.

Hii ni mara ya pili waislamu wameadhimisha mwezi wa Ramadhan tangu kuzuka kwa janga la Corona hapa nchini mwezi Machi mwaka uliopita.

Baraza kuu la waislamu hapa nchini-SUPKEM limemtaka rais Uhuru Kenyatta atumie rasilmali za serikali kusaidia jamii ya waislamu hapa nchini wakati huu wa mfungo wa Ramadhan.

Kaimu mwenyekiti wa kitaifa wa baraza hilo Al Hajj Hassan ole Naado, alisema serikali sekta ya kibinafsi, washirika wa maendeleo wa humu nchini na hata kimataifa wanapaswa kuwasaidia hasa wakati huu ambao ulimwengu unakumbwa na janga la Covid-19.

Categories
Habari

Visa 991 vipya vya Covid-19 vyanakiliwa hapa nchini

Wizara ya afya imesema kuwa watu 991 zaidi wameambukizwa virusi vya Covid-19, kutokana na sambuli 6,417 zilizopimwa katika muda wa saa 24 zilizopita.

Kulingana na wizara hiyo, hiki ni kiwango cha asilimia 15.4  cha maambukizi ya Covid-19 hapa nchini.

Idadi jumla ya maambukizi nchini sasa ni 147,147 kutoka sampuli 1,571,244 zilizopimwa tangu mwezi Machi mwaka jana.

Kati ya visa hivyo vipya, 956 ni raia wa Kenya ilhali ilhali 35 ni raia wa kigeni ambapo 543 ni wa kiume na 448 ni wa kike.

Mwathiriwa mchanga zaidi ni mtoto wa umri wa miezi saba na mkongwe zaidi ana umri wa miaka 99.

Watu 370 wamepona kutokana na ugonjwa huo, ambao 214 kati yao ni wale waliokuwa wakipokea matibabu nyumbani huku 156 wakiruhusiwa kwenda nyumbani kutoka hospitali mbali mbali kote nchini.

Idadi ya jumla ya waliopona kufikia sasa ni watu 99,580.

Jumla ya wagonjwa 1,607 wamelazwa katika hospitali mbali mbali nchini huku wengine 5,996 wakihudumiwa nyumbani.

Wagonjwa 239 wamelazwa katika chumba cha wagonjwa mahututi ICU, ambapo 47 Kati yao wanatumia vipumulio na 161 wakipokea hewa ya ziada ya Oxygen. Wagonjwa 31 wangali wanafanyiwa uchunguzi.

Vifo 26 kutokana na maambukizi ya ugonjwa wa COVID – 19 vimeripotiwa na wizara ya afya katika muda wa mwezi moja uliopita.

Idadi hiyo sasa inafikisha 2,394 watu waliofariki kutokana na ugonjwa huo nchini.

Wakati uo huo,wizara hiyo imetangaza kwamba kufikia siku ya Jumatatu, watu 526,026 wamepokea chanjo dhidi ya ugonjwa huo.

Kutoka idadi hiyo, 122,984 ni wahudumu wa afya, 42,343 ni maafisa wa usalama, 76,753 ni waalimu, huku 283,946 wakiwa raia wengine.

Categories
Habari

Moses Kuria na washtakiwa wenza waachiliwa kwa dhamana ya shilingi 75,000

Mbunge wa Gatundu Kusini Moses Kuria pamoja na watu wengine -29, wamekiri mashtaka yaliyohusishwa na ukiukaji kanuni za kuzuia msambao wa ugonjwa wa Covid-19 katika mahakama moja ya Kiambu.

Kila mmoja wao alitozwa faini ya shilingi elfu-75 au kutumikia kifungo cha miezi sita gerezani.

Washtakiwa hao walifikishwa Jumanne mbele ya hakimu mkuu Stella Atambo, ambapo walikabiliwa na mashtaka matano, likiwemo la kujiburudisha kwa pombe, kukosa kudumisha umbali unaohitajika baina ya watu, kukosa kuvalia barakoa, kukosa kutii maagizo yaliyoharamisha mikusanyiko ya watu na ukiukaji wa kanuni za kafyu.

Walikuwa wamekamatwa mwendo wa saa tatu usiku, katika kituo cha Havilla Cornerstone Gardens huko Karuri siku ya Jumatatu pamoja na watu wengine 19.

Polisi walipata vidokezi kwamba kulikuwa na mkusanyiko wa watu sawia na ile ya kisiasa, jambo ambalo linakiuka kanuni za kuzuia kusambaa kwa ugonjwa wa Covid-19.

Kiambu ni miongoni mwa Kaunti tano ambazo ziliwekewa marufuku ya usafiri huku saa za Kafyu zikianza saa mbili usiku. Pia mikusanyiko na mikutano imepigwa marufuku katika kaunti hizo.

Kaunti zingine ni pamoja na Nairobi, Machakos,Kajiado na Nakuru.

Categories
Habari

Abdulkadir Haji ameapishwa kuwa Seneta mpya wa kaunti ya Garissa.

Abdulkadir amechukua mahala pa babake marehemu Yusuf Haji aliyeaga dunia mwezi Februari mwaka huu.

Abdul aliidhinishwa na viongozi, wazee na wataalamu wa kijamii kutoka kaunti ya Garissa kwa heshima ya marehemu babake.

Kufuatia kuidhinishwa kwake, alifaa kuwania kwa tiketi ya chama cha Jubilee lakini hakukuwa na mpinzani.

Tume huru ya uchaguzi na mipaka kwenye ilani katika gazeti rasmi la serikali mnamo tarehe 6 mwezi huu ilimtangaza Abdulkadir kuwa seneta mteule wa Garissa kwani alikuwa mwaniaji pekee aliyetangaza nia ya kugombea kiti hicho.

Maseneta wenzake wameelezea imani kwamba Abdulkadir atawahudumia wakazi wa Garissa huku akifuata nyayo za marehemu babake.

Baada ya kuapishwa, Haji alitoa hotuba ambapo alimwomboleza Marehemu babake aliyefariki mwezi Februari mwaka huu. Pia aliwashukuru Maseneta kwa kusimama na kusaidia familia hiyo wakati walipompoteza baba yao.

Seneta huyo wa Garissa alielezea changamoto wanazopitia vijana hasaa wakati huu wa janga la Covid-19.

“Vijana wengi wamevunjwa moyo na changamoto si haba wanazopitia,” alisema Haji.

Umaarufu wa Abdul ambaye ni mwanabiashara tajika, ulijiri mwaka 2013 alipotekeleza hatua ya kijasiri ya kuwaokoa watu katika lile shambulizi la West Gate lililotekelezwa na magaidi.

Categories
Kimataifa

India yaidhinisha chanjo ya Sputnik V kukabiliana na Covid-19

Chanjo ya tatu dhidi ya ugonjwa wa covid-19 imeidhinishwa nchini India, wakati ambapo kumeripotiwa wimbi la pili na ambalo ni hatari zaidi la maambukizi ya Corona.

Dawa ya chanjo ya Sputnik V kutoka Russia imeidhinishwa kuwa salama, na itatumika kwa njia sawa na zile za dawa ya chanjo ya Oxford-AstraZeneca, ambayo inatengezwa nchini India kwa jina la Covishield.

Sputnik V imedhibitishwa kuwa na asilimia 92 ya kinga dhidi ya Covid-19, kulingana na matokeo ya utafiti wa awamu za mwisho mwisho yaliyochapishwa kwenye jarida la The Lancet.

Hadi sasa India imetoa zaidi ya dozi million 100 za aina mbili za dawa zilizoidhinishwa –yaani (Covishield) na(Covaxin).

Kuidhinishwa kwa dawa ya chanjo ya Sputnik V, kumejiri siku moja baada ya India kuipiku Brazil kama nchi ya pili kwa kiwango kikubwa cha cha maambukizi ya corona duniani kote.

Baada ya kunakili zaidi ya visa milioini-13.5 vya maambukizi ya corona, India sasa inashikilia nafasi ya pili nyuma ya Marekani ambayo imenakili zaidi ya visa milioni-31 vya Covid-19.

Huku Brazil ambayo imenakili visa million 13.4 ikishikilia nafasi ya tatu kote duniani.

Categories
Habari

Bei ya Unga wa mahindi inatarajiwa kupanda kutokana na uhaba wa mahindi nchini

Ushirikishi na mawasiliano duni kati ya chama cha wasiagaji nafaka-CMA na halmashauri husika katika sekta ya mahindi huenda ukasababisha uhaba wa zao hilo.

Chama hicho kimesema ushirikishi duni umesababisha hali ya utata kuhusu marufuku ya hivi majuzi ya uagizaji wa mahindi kutoka Uganda na Tanzania.

Chama hicho kimesema hatua hiyo itasababisha uhaba wa mahindi na kuongeza bei ya unga.

Wasiagaji wanaitaka serikali kuamuru kutolewa kwa akiba ya mahindi kwenye maghala ya kitaifa ambayo yamepimwa na kuhakikishwa hayana kuvu,ili kuhakikisha viwanda vya usiagaji unga vina mahindi ya kutosha.

Kwenye taarifa kwa shirika la habari nchini-KNA,chama hicho kilifurahia hatua ya kupiga marufuku uagizaji wa mahindi kutoka nje ambyo wakati mwingine huwa na sumu ya kuvu na kutaka halmashauri husika kuharakisha shughuli ya upimaji wa mahindi.

Chama hicho kilisema kuwa sasa bei ya gunia moja la mahini lenye uzani wa kilo 90 bei yake imepanda kwa shilingi 300 kutoka bei ya shilingi 2,500,huku Bandali ya unga wa mahindi ikiuzwa kwa bei ya shilingi 1,250.

Categories
Habari

Patricia Kameri-Mbote asailiwa wadhifa wa jaji mkuu

Tume ya huduma za mahakama siku ya Jumanne inamsaili Profesa Patricia Kameri-Mbote kwa ajili ya wadhifa wa jaji mkuu.

Profesa Kameri-Mbote ni profesa mtafiti mwanzilishi wa kituo cha kimataifa cha sheria kuhusu mazingira-IELRC na mkurugenzi wa mipango wa kituo hicho katika kanda ya Afrika.

Alisomea shahada ya sheria katika Chuo Kikuu cha Nairobi,Chuo Kikuu cha Warwick,Chuo kikuu cha Zimbabwe na kusomea shahada ya Uzamili katika chuo kikuu cha Stanford.

Kwa sasa ni profesa mshirikishi katika kitivo cha sheria,Chuo Kikuu cha Nairobi na wakili wa mahakama kuu ya Kenya.

Profesa Kameri-Mbote ni wa pili kusailiwa baada ya Jaji wa mahakama kuu Chitembwe Said Juma kusailiwa jana.

Jumla ya wawaniaji 10 wa wadhifa wa jaji mkuu watasailiwa akiwemo Jaji Martha Koome,Jaji Marete Njagi,Phillip Kipkichir Murgor,Jaji Nduma Nderi,mshauri mwandamizi wa maswala ya sheria Fred Ngatia,William Ouko,Moni Wekesa na Alice Jepkoech.

Kutoka jumla ya maombi 133,ni wawaniaji 10 tu walioorodheshwa kwa usaili huo kwa ajili ya wadhifa wa jaji mkuu.

Categories
Kimataifa

Ismail Omar Guelleh achaguliwa bila kupingwa kuiongoza Djibouti

Kiongozi mkongwe wa Djibouti Ismail Omar Guelleh alichaguliwa tena kuwa rais kwa muhula wa tano kwa zaidi ya asilimia 98 ya kura zilizopigwa.

Hata hivyo uchaguzi huo ulisusiwa na upinzani.

Raia wapatao 215,000 walisajiliwa kupiga kura kwenye kinyanganyiro kati ya Guelleh mwenye umri wa miaka 73 na mfanyibiashara asiyejulikana ambaye hakuonekena kuwa tisho kwa kiongozi huyo ambaye amekuwa mamlakani tangu mwaka wa 1999.

Shughuli ya kuhesabu kura ilianza muda mfupi baada ya kufungwa vituo vya kupigia kura saa moja usiku katika taifa hilo la upembe wa Afrika ambalo liko katika eneo muhimu la kibiashara kati ya bara Afrika na rasi ya mataifa ya kiarabu.

Waangalizi wa uchaguzi walisema uchaguzi huo uliandaliwa kwa njia shwari.

Awali baada ya kupiga kura katika mji mkuu ambako wakazi wengi wa raia milioni moja wa Djibouti wanaishi, Guelleh alipongeza jinsi uchaguzi huo ulivyoandaliwa kwa njia shwari.

Categories
Habari

Visa vipya 1,030 vya Covid-19 vyanakiliwa hapa nchini

Nchi hii imenakili visa vipya 1,030 vya maambukizi ya Covid-19,kutokana na sampuli 8,316 zilizopimwa katika muda wa saa 24 zilizopita.

Kiwango hiki cha maambukizi kwa mujibu wa wizara ya afya ni asilimia 12.4.

Idadi jumla ya visa vya maambukizi ya ugonjwa huo humu nchini sasa, imefikia 145,184.

Kati ya visa hivi vipya, 995 ni vya raia wa wakenya ilhali visa 35 ni vya raia wa kigeni.

Nairobi ingali inaongoza kwa visa 401 ikifuatiwa na Nakuru kwa visa 68,Kiambu 64,Kakamega 53, Machakos 51 Mombasa 51, na Uasin Gishu 44.

Wagonjwa 422 wamepona ugonjwa huo, 105 kutoka hospitali za humu nchini ilhali 317 ni kutoka ule mpango wa kuhudumiwa nyumbani.

Jumla ya wagonjwa waliopona sasa ni 98,605.

Kwa sasa kuna wagonjwa 1,616 waliolazwa katika hospitali mbali kote nchini, ilhali 4,243 wako chini ya mpango wa kuhudumiwa nyumbani.

Vifo 21 zaidi  vimeripotiwa humu nchini kutokana na matatizo ya kiafya yanayosababishwa na ugonjwa wa COVID-19.

Kati ya visa hivi, wizara ya afya inasema visa vitano vilijiri katika muda wa mwezi mmoja uliopita ilhali vifo 16 vikiwa vile vilivyoripotiwa kuchelewa baada ya kutokea tarehe tofauti.

Wagonjwa 247 wamelazwa katika kitengo cha wagonjwa mahututi,46 kati yao wakiwekewa vipumulio na wengie 170 wakipkea oksijeni ya ziada.

Wagonjwa 31 wanafanyiwa uchunguzi.

Categories
Kimataifa

Safari ya China katika kukabiliana na umaskini

Je, siri ya China kupunguza umaskini ni nini?

Usawa wa kijinsia katika elimu ni muhimu kufanya umaskini ‘kutorithiwa’.

Na Hassan Zhou

Ofisi ya habari ya Baraza la Serikali la China hivi karibuni ilitangaza waraka uitwao “Kupunguza Umaskini: Uzoefu na Mchango wa China”. Waraka huo umeeleza jinsi Chama cha Kikomunisti cha China CPC kilivyoongoza watu wa China kupambana na umaskini katika miaka 100 iliyopita.

Mwishoni mwa mwaka jana, China ilikuwa imetimiza lengo kuu la kutokomeza umaskini uliokithiri kama ilivyopanga, na kwamba katika kiwango cha sasa ambacho ni juu ya kile cha Benki ya Dunia, watu karibu milioni 100 wanaoishi vijijini wamejikwamua kutoka minyororo ya umaskini.

Lakini je, siri ya China ni nini?

Ebu tuangazie jinsi familia kadhaa za kichina zilivyofanikiwa kuondoka kutoka umaskini, ili upate jibu la swali ili.

Mwalimu Julius Nyerere alisema, “Ukitaka kumsaidia masikini, somesha watoto wake”. Lakini katika juhudi za kuondoa umaskini kwa njia ya elimu, hali ya kutozingatia usawa wa kijinsia ni mojawapo ya vizuizi vinavyohujumu ndoto hii.

Mwaka 2018, mwalimu wa sayansi Peter Tabichi wa shule moja katika kijiji kilichopo eneo la Bonde la Ufa, Kenya alishinda tuzo la mwalimu bora duniani.

Yamkini wanafunzi wote katika shule hiyo walitoka familia maskini, na tukio la wasichana kuacha masomo kwa sababu mbalimbali lilikuwa ni jambo la kawaida.

Mwalimu Tabichi alizitembelea familia za wasichana hao mara kwa mara na kuwasihi na kuwahamasisha wazazi haswa wale ambao hawakuwataka watoto wao kuendeleza masoma na kuwaozesha, wawaruhusu waendelee na masomo yao.

Ukosefu wa usawa katika kupata elimu kutokana na ubaguzi wa kijinsia pia upo katika baadhi ya sehemu maskini nchini China. Bibi Zhang Guimei aliyefundisha wanafunzi katika sehemu maskini kwa miaka 40 siku zote ana matumaini ya “kuwawezesha watoto wa sehemu maskini waingie katika vyuo vikuu bora”.

Baada ya kutafuta michango kwa muda mrefu, mwaka 2008 alifanikiwa kuzindua shule ya kwanza ya wasichana ya serikali ambayo wanafunzi hawalipi gharama yoyote. Wanafunzi wanaoandikishwa katika shule hiyo wote ni wasichana walioshindwa kuendelea na masomo yao baada ya kumaliza masomo ya shule ya msingi kutokana na umaskini.

Na katika miaka 12 iliyopita, shule hiyo imewawezesha wanafunzi zaidi ya 1,800 kujiunga na vyuo vikuu.

Mwaka 2020, mwalimu Zhang alipata tuzo ya kitaifa ili kupongeza juhudi zake katika kuondoa umaskini.

Nchini Tanzania, zaidi ya theluthi mbili za wanawake hawawezi kumaliza masomo ya shule ya sekondari, huku wanawake nchini Kenya wakichukua theluthi moja tu ya watu wanaosoma elimu ya juu.

Mbali na umaskini, sababu nyingine muhimu ya kufanya wasichana kuacha shule ni unyanyapaa dhidi ya wanawake, lakini kuacha masomo kwa wanawake nako pia kutafanya umaskini kurithiwa na kizazi kijacho na kusababisha mzunguko mbaya.

Ni kwa kuzingatia elimu tu, wanawake wanaweza kubadilisha hatma yao na hata ya familia nzima, na mwisho kupata mlango wa kupitia na kuafikia  maisha bora, kwani imenenwa kuwa “elimu ni ufunguo wa maisha”.

Miaka 28 iliyopita, picha ya yenye maandishi “nataka kusoma shuleni” iliwafanya raia wa China tumkumbuke msichana anayeitwa Su Mingjuan pamoja na macho yake makubwa ya kutamani elimu.

Kutokana na msaada wa serikali na jamii nzima, msichana huyo alimaliza shule ya msingi, shule ya sekondari, shule ya sekondari ya juu na mwisho kuingia katika chuo kikuu.

Sasa anaishi maisha mazuri, na pia amezindua hazina ya kuwasaidia wanafunzi wa vyuo vikuu wanaotoka familia maskini.

Kutoka mtu anayepokea msaada hadi mtu anayetoa msaada, kutoka msichana maskini hadi mtu anayeishi maisha yenye heshima, maisha ya Su Mingjuan imenikumbusha msemo mmoja wa Kiswahili unaosema “ukimfundisha mwanamke mmoja ni sawa na kuelimisha jamii nzima.”

Ikiwa una swali ama maoni kuhusu makala hii, unaweza kuwasiliana nami kupitia anwani zifuatazo:

Barua pepe: 64909787@qq.com

Facebook: @yoyoasema