Categories
Burudani

Coy Mzungu azawadiwa gari

Mchekeshaji wa nchi ya Tanzania Coy Mzungu alizawadiwa gari na usimamizi wa Wasafi Media kampuni inayomilikiwa na Diamond Platnumz na ambayo inadhamini tamasha la Cheka Tu ambalo alianzisha Coy.

Diamond Platnumz mwenyewe ndiye aliwasilisha gari hilo kwa Coy Mzungu jambo ambalo hakutarajia wakati wa awamu ya Mzizima ya tamasha hilo la Cheka Tu.

Coy alikuwa jukwaani na mchekeshaji wa Kenya Eunice Mamito na Diamond akajiunga nao na kutangaza kwamba alikuwa amepitia tu kushukuru wote waliohudhuria tamasha hilo na kumpokeza gari Coy Mzungu.

Kwa mara ya kwanza, ukumbi wa mikutano wa jumba la kibiashara la Mlimani City Jijini Dar es Salaam ulijaa tangu kuanzishwa kwa tamasha hilo la vichekesho.

Baada ya kutangaza zawadi hiyo, Diamond alimwelekeza Coy na wengine nje ambapo gari lenyewe lilikuwa limeegeshwa. Kwa furaha nyingi alipokea zawadi yake Coy Mzungu na hata kusimama juu ya gari lenyewe huku akishukuru usimamizi wa Wasafi.

Wakati wa kuondoka nchini Tanzania Eunice Mamito alimtania Diamond Platnumz akisema kwamba anastahili kukumbuka kina dada anapogawa magari.

Mamito ni mmoja wa wachekeshaji wa Kenya ambao wamepata nafasi ya kutumbuiza kwenye tamasha hilo la vichekesho nchini Tanzania. Wengine ni pamoja na Sammie Kioko, Eric Omondi na Mc Jessy.

Categories
Uncategorised

Nkechi Blessing na Bobrisky warushiana maneno

Wawili hao ni maarufu nchini Nigeria, Nkechi kutokana na uigizaji kwenye filamu za Nollywood na Bobrisky kutokana na hatua yake ya kuamua kuvaa na kuishi kama mwanamke ilhali alizaliwa mwanaume.

Tatizo lilianza wakati Bobrisky au ukipenda Okuneye Idris alipata mahali ambapo Nkechi Blessing Sunday amemtaja na kumrejelea kama hayawani kuhusiana na kioja kinachoendelea cha mashabiki kuchora “Tatoo” zao.

Bobrisky alimsuta Nkechi huku akisema kwamba yeye hufurahia amani hata kwenye mitandao ya kijamii na kwa kumtaja alikuwa anaamsha joka.

Kulingana naye muigizaji huyo anatumia jina lake kujitafutia umaarufu kwenye mitandao ya kijamii na ikiwa anataka amani asiwahi taja jina lake tena.

Alimtaka muigizaji huyo kumwomba msamaha moja kwa moja ikiwa zogo lao ni la kwisha ingawaje hakutaja hatua ambayo angechukua ikiwa hangeombwa msamaha.

Bobrisky ambaye ana mazoea ya kugawia mashabiki wake sugu hela, alimtaja Blessing kuwa mtu asiye na utajiri wa kutosha ili kuwashukuru mashabiki wake kwa zawadi ghali anavyofanya yeye.

Nkechi ambaye kwa sasa anaishi nchini Marekani,alikataa kujibu shutuma hizo za Bobrisky lakini baadaye akaamua kumjibu kupitia Insta Stories.

Haijulikani ugomvi wa wawili hao utaishia wapi lakini ni burudani kwa mashabiki wao kwenye Instagram.

Categories
Burudani

Ruge Mutabaha akumbukwa

Ni miaka miwili tangu Ruge Mutabaha kuaga dunia na wengi wamemkumbuka mwanabiashara huyo ambaye ni mmoja wa waanzilishi wa kampuni ya Clouds Media nchini Tanzania.

Kabla ya kuanzishwa kwa kampuni hiyo Ruge alikuwa amezamia kazi ya kuandaa tamasha kubwa kati ya biashara nyingine ambazo alikuwa akifanya.

Mmoja wa wale ambao wamemkumbuka Ruge ambaye alifariki tarehe 26 mwezi Februari mwaka 2019 ni mwanamuziki na mtangazaji Baba Levo.

Baba Levo amepachika picha ya marehemu Ruge kwenye akaunti yake ya Instagram na kusema kwamba atakuwa mpuuzi ikiwa hatakumbuka mchango wa Ruge kwenye maisha yao na muziki wao.

Levo ameendelea kwa kusema kwamba Marehemu Ruge Mutabaha ndiye alimtengeneza hata Diamond Platnumz lakini hajui walikosania wapi.

Amemsifia marehemu Ruge akisema alikuwa jasiri muonyesha njia na anaomba Mungu amsamehe makosa yake naaendelee kumweka mahali pema.

Inaaminika kwamba Diamond na marehemu Ruge hawakukosana ila tofauti zilitokana na ushindani wa kibiashara maanake baada ya kupata hela kwa muziki, Diamond aliingilia biashara sawia na ya Ruge ile ya kampuni ya utangazaji ambayo inaitwa Wasafi Media.

Mutahaba alizaliwa huko Berkeley, California nchini Marekani mwaka 1970 lakini akarejea Tanzania ambako alisomea kuanzia darasa la kwanza hadi shule ya upili kisha akarejea Marekani kwa ajili ya elimu ya chuo kikuu.

Categories
Burudani

Sherehe ya Harry Belafonte

Mwanamuziki mkongwe ambaye pia ni mwanaharakati Harry Belafonte atakuwa na sherehe ya kuadhimisha miaka 94 tangu kuzaliwa na wageni waalikwa ni wanamuziki tajika kama vile Jay-Z, Usher na wengine wengi.

Belafonte ametoa mchango mkubwa kwa sekta ya muziki nchini Marekani na inaonekana kwamba wanamuziki wengi wanatambua hilo na ndiyo maana wameungana kwa ajili ya kuendeleza mazuri yake.

Harry Belafonte hana habari kuhusu sherehe hiyo ambayo imepangwa na itakuwa tamasha ambalo litaendeshwa kwenye mtandao Jumapili hii tarehe 28 mwezi Februari mwaka 2021. Pesa ambazo zitakusanywa kutoka kwa tamasha hilo zitakwenda kwa shirika lisilo la kiserikali kwa jina “The Gathering for Justice”.

Wakati wa sherehe hiyo ya Harry, mwanamuziki na mfanyibiashara Shawn Carter maarufu kama Jay-Z atakabidhiwa tuzo la “Gatekeeper of Truth” kutokana na mchango wake katika uanaharakati nchini Marekani.

Mwanaharakati Carmen Perez-Jordan alielezea kwamba Belafonte ambaye wanamrejelea kana “Mr. B” amekuwa wa muhimu kwenye makundi ya kutetea haki na Jay Z amechukua usukani kutoka kwake.

Jay Z amekuwa akisaidia sana kwenye mipango ya hafla za utetezi wa haki nchini Marekani hasa wakati wa siasa na amekuwa kielelezo kwa kizazi cha sasa na vizazi vijavyo.

Tuzo hizo zilianzishwa kama njia ya kuenzi muigizaji na mwimbaji Paul Robeson ambaye alikuwa kielelezo kwa Harry Belafonte alipokuwa wa umri mdogo. Robeson alikuwa anapenda kusema kwamba wasanii ndio walinzi wa ukweli na ndio sauti ya mabadiliko kwa ustaarabu.

Wanaotarajiwa kuhudhuria hafla hiyo ya jumapili ni pamoja na Tiffany Haddish, Lin-Manuel Miranda, Charlamagne Tha God, Kareem Abdul-Jabbar, Susan Sarandon na Pete Buttigieg, Common, Danny Glover, Chuck D, Bernie na Jane Sanders, Stacey Abrams, Tamika D. Mallory, Rev. Al Sharpton, Aja Monet, Mysonne The General, Bryan Stevenson na wengine.

Categories
Burudani

Mamito apeleka ucheshi nchini Tanzania

Mchekeshaji wa Kenya Eunice Mamito yuko nchini Tanzania kwa ajili ya kuigiza kwenye tamasha kubwa la vichekesho nchini humo ambalo linajulikana kama “Cheka Tu – Mzizima Edition”.

Tamasha hilo ambalo hudhaminiwa na Wasafi Media litaandaliwa kuanzia saa moja unusu, usiku wa leo tarehe 26 mwezi Februari mwaka 2021 katika jumba la kibiashara la Mlimani City Jijini Dar es Salaam.

Kuna wasanii wengine wengi ambao watatumbuiza kwenye tamasha hilo kama vile wachekeshaji wa Tanzania, Coy Mzungu, Kiredio, Mr. Romantic kati ya wengine na mwimbaji wa nyimbo za injili Christina Shusho ataimba huko.

Kuna wachekeshaji wa Kenya ambao wamepata fursa ya kuhusika kwenye awamu za awali za tamasha hilo kwa jina “Cheka Tu” nao ni Eric Omondi, Mc Jessy, Profesa Hamo na Sammie Kioko.

Mchekeshaji wa nchi ya Uganda Patric Salvado pia amewahi kuhusishwa kwenye tamasha hilo ambalo lilianzishwa na Coy Mzungu kwa jina halisi Conrad Kennedy ambaye hujiita Rais wa uchekeshaji nchini Tanzania.

Mamito ndiye mchekeshaji wa kike wa kwanza kutoka Kenya ambaye amealikwa kutumbuiza kwenye tamasha hilo kubwa la uchekeshaji nchini Tanzania.

Zamu ya Eric Omondi, Mc Jessy na Salvado ambayo ilikuwa tarehe 2 mwezi Januari mwaka huu wa 2021, Diamond Platnumz alihudhuria na wakaigiza pamoja jukwaani.

Coy Mzungu aliweka video ya kuonyesha akimlaki Mamito kwenye uwanja wa ndege na baadaye wanaonekana wote na Eric Omondi na huenda naye yuko nchini Tanzania kwa ajili ya kipindi chake cha “Wife Material” na tamasha hilo ila hajatajwa kwenye mabango.

Categories
Burudani

Eric Omondi apimana nguvu na Diamond Platnumz

Mchekeshaji huyo wa nchi ya Kenya anamtania mwanamuziki wa Tanzania Diamond Platnumz kwa kile ambacho anakitaja kuwa kushambulia Afrika mashariki kwa kupata wapenzi na watoto.

Eric anasema alimwonya Diamond kwamba atalipiza kisasi lakini hakuamini na kwamba anajua sasa ameshachoka kukimbizana na wapenzi analea watoto.

Diamond Platnumz ana watoto na wapenzi wake wa zamani kwenye nchi zote za Afrika mashariki ambazo ni Kenya, Uganda na Tanzania.

Nchini Kenya ana mtoto na msanii Tanasha Donna ambaye anaitwa Naseeb Junior kama yeye na siku yao ya kuzaliwa ni moja, ukienda Uganda ana Zari Hassan ambaye ana watoto wake wawili, Princess Tiffah na Prince Nillan na kwao Tanzania anayejulikana ni Hamissa Mobeto ambaye ana mtoto kwa jina Dillan.

Eric alitoa video inayomwonyesha akiwa na mwanamuziki na muigizaji wa Tanzania Gigy Money ambaye ni rafiki wa karibu wa Diamond Platnumz anapoanza kulipiza hatua ya Diamond ya kunyakua warembo Afrika Mashariki.

Wimbo ambao ametumia kwenye video hiyo ni “Kwaheri” ambao umeimbwa na Jua Cali na Sanaipei Tande ishara kwamba Gigy amehama Tanzania na kumwacha Diamond na kuja Kenya kwa Eric Omondi japo yote hayo ni uigizaji tu.

Kulingana na maneno, picha na video kutoka kwa Eric Omondi kwenye mitandao ya kijamii, Gigy Money na Betty Kyallo huenda wakawa wahusika kwenye awamu ya pili ya kipindi chake “Wife Material”.

Categories
Burudani

Nandy na Billnass wameachana

Wanamuziki Nandy na Billnass wametengana baada ya uhusiano wa kimapenzi wa muda mrefu. Mara ya kwanza kwa watu kukisia kwamba mambo sio mazuri, ni wakati Nandy alijitokeza kutangaza kwamba pete ya uchumba aliyovishwa na Billnass ilikuwa imepotea.

Wengi walihisi kwamba Nandy alivua pete hiyo mwenyewe lakini amekuwa akijitetea akisema kwamba alivuliwa na mashabiki bila kujua kipindi cha kutumbuiza kwenye mikutano ya Kampeni mwaka jana.

Mara nyingine ni wakati alikwenda kumlaki mwanamuziki Koffi Olomide kwenye uwanja wa ndege yapata mwezi mmoja uliopita na alikuwa amemwalika kwa ajili ya kufanya kibao naye.

Nandy hakuwa na Billnass jinsi wengi walitarajia lakini Nandy alisema kwamba mpenzi huyo wake alikuwa naye kwenye mipango yote hata ingawa hakuonekana huko kwenye uwanja wa ndege.

Baadaye Nandy na Koffi walitumbuiza tena kwenye tamasha lililokuwa limeandaliwa na Clouds Media kwa ajili ya siku ya wapendanao lakini Billnass hakuonekana huko. Mamake Nandy alipohojiwa siku hiyo alisema mambo kati ya wanawe yalikuwa sawa na alikuwa anasubiri tu wampe siku ya arusi.

Billnass na Nandy

Siku ya kuzindua kibao chake na Koffi kwa jina “Leo Leo” kwenye kipindi cha “Leo Tena” cha Clouds Tv Billnass pia hakuonekana na Nandy aliendelea tu kumtetea akisema anamuunga mkono kwa kazi yake.

Nandy mwenyewe alitangaza utengano wake na Billnass wakati alikuwa anajibu shabiki mmoja ambaye alimwita mke wa Billnass kwenye picha aliyopachika kwenye Instagram.

Shabiki huyo kwa jina carinamarapachi aliandika “Mrs Billnass love uu more” naye Nandy akamjibu “Single”.

Categories
Burudani

Firirinda Weekend!

Mkurugenzi mkuu wa bodi ya kuorodhesha filamu nchini Kenya KFCB Daktari Ezekiel Mutua ametangaza Wikendi inayoanza kesho kuwa wikendi ya Firirinda.

Kwenye ukurasa wake wa Facebook Dakta Mutua aliandika, “Nimetangaza wikendi ijayo kuanzia kesho Ijumaa hadi Jumapili kuwa wikendi ya Firirinda kwa heshima yake na kwa ajili ya kusaidia mwandishi na mwimbaji wa wimbo huo ambaye anaugua Mzee Dickson Munyonyi. Wapiga muziki kwenye hafla zote za wikendi hii wanaombwa wacheze wimbo huo na kuhimiza mashabiki wao kuchanga fedha za kusaidia kulipa ada ya hospitali ya mwanamuziki huyo mkongwe ambaye anaendelea kupokea matibabu. Nambari ya kutuma fedha hizo kwa njia ya simu itatangazwa baada ya sisi kuwasiliana na familia na mimi nitaanzisha mchango kwa shilingi laki moja. Tuujulikanishe wimbo huu lakini zaidi na la maana ni kuutumia kusaidia mwimbaji wake ambaye anatupa kumbukumbu huku tukisherehekea utamaduni wetu.”

Dakta Mutua anasema changamoto ya Firirinda kwenye mitandao ya kijamii inafaa kuchukua mahala pa ile ya Jerusalema!

Alitumia nafasi hiyo pia kuomba yeyote ambaye anafahamu familia ya mzee huyo awasiliane naye ili amuunganishe nayo.

Kulingana na Mutua, Firirinda ni neno ambalo linatokana na maneno mawili Free la kiingereza na Rinda la kiswahili kuashiria vazi la kike.

Categories
Burudani

Nkechi Blessing aomba msamaha hadharani

Kwa muda sasa kumekuwa na mtindo wa kushangaza nchini Nigeria, ambapo mashabiki sugu wa watu maarufu wanachora picha za watu hao maarufu kwenye miili yao au kuandika majina yao na wengi wa watu hao maarufu wanaonekana kushukuru mashabiki hao kwa kuwapa pesa.

Kisa kama hicho kilitokea kwa muigizaji wa filamu za Nollywood Nkechi Blessing Sunday na akawa mwepesi wa kusuta shabiki huyo wake ambaye aliandika herufi za kwanza za jina lake kwenye mkono wake.

Blessing alimkaripia msichana huyo ambaye alitambuliwa tu kama Oyindamola kwa kuandika herufi hizo kwa wino wa kufutika kwa nia ya kupata pesa kutoka kwake.

Muigizaji huyo ambaye pia ni mwanabiashara amejipata pabaya kwenye mitandao ya kijamii nchini Nigeria ambapo amekashifiwa kwa jinsi alimchukulia shabiki wake na amelazimika kuomba msamaha hadharani.

Nkechi Blessing Sunday ametumia akaunti yake ya Instagram kuomba msamaha ambapo amepachika picha ya mazungumzo yake na shabiki huyo wake ambayo yanaonyesha kwamba tayari walikuwa wamezungumza kwa simu.

Nkechi anasihi wafuasi na mashabiki wengine wamsaidie kuomba msamaha na pia wamsamehe kwa kosa alilotenda na kutelekeza shabiki wake sugu na hata kumtusi badala ya kumwonyesha mapenzi.

Haijulikani hatua atakayochukua Nkechi kwa kushukuru shabiki huyo wake kwa kumwonyesha mapenzi.

Mwanadada mwingine kwa jina Ewatomi Gold alichora sura ya Bobrisky kwenye mwili wake jambo ambalo lilisababisha babake mzazi amkane na Bobrisky pia hakuwa amemtambua kwa hatua hiyo.

Baadaye Bobrisky alimtafuta na kumzawadi pesa na kuahidi kumpa zawadi nyingine nyingi.

Categories
Burudani

Jennifer Lopez asifia mwanadada maarufu kwenye Tik Tok

Charli D’Amelio ni binti wa umri wa miaka 16 ambaye sasa ni maarufu nchini Marekani kutokana na wingi wa wafuasi wake kwenye mtandao wa Tik Tok ambao ni wafuasi milioni 108.7.

Jambo hilo limesababisha atambuliwe na wengi na wa hivi karibuni ni mwanamuziki wa muda mrefu Jennifer Lopez au ukipenda J’Lo.

J’Lo alikuwa akizungumza kwenye mahojiano ambapo alisema Charli kwa sasa ndiye kijana maarufu zaidi nchini Marekani na sio tu kwa sababu anasakata densi kwenye TikTok bali pia kwa sababu anajua anachokifanya na anajua pia kuvutia wengi ambao wanataka kuwa kama yeye.

Lopez alifichua kwamba mara ya kwanza kukutana na Charli ni wakati wa shindano la mpira wa miguu kwa jina Super Bowl mwaka 2020 ambapo alipata nafasi ya kutumbuiza naye jukwaani.

Charli D’Amelia anasema kusifiwa na nyota mkubwa kama J’Lo ni jambo zuri na hajui aseme nini. Msichana huyo alipata fursa ya kuwa kwenye orodha ya Time100 ambapo J’Lo alikuwa ameandika makala hayo.

Time 100 ni makala ya kila mwaka ya jarida maarufu la “Time” na huwa yanaorodhesha watu 100 ambao ni maarufu kwa mwaka huo na ambao wana ushawishi mkubwa.

Kwenye makala hayo J’Lo aliandika, ” kufikisha wafuasi milioni 100 kwenye TikTok sio jambo dogo. Nilipokutana na Charli D’Amelio kwenye Super Bowl LIV mwaka 2020, niliona ana mvuto wa kipekee ambao kila msanii anahitaji ili kuvutia umati.”

Mwaka jana, Lopez alimhusisha D’Amelio kwenye mojawapo ya video zake za nyimbo.